منتدى جامع الائمة الثقافي

أفة يسعود
چيلات الحرامية فشكَهن شد
وانتَ برنو التلمض
على اركَاب الزلم ترعد
ها يسعود..هور الغيم غطه الحد
نسه اطواره.....ولا نهضن مساحيك يسون سد
ركس سكان المهيله
اشچم دله بسماها أهلال.. متشيله وتفطر اكَلوب
هم اللسان ألك وتريد تحچي النوب
هم تكَول عندي اچفوف
والزنجار سد الطوب؟
كلشي يصير
هم صل الحماد انوب ما يكَرص
هم صكَر البدو تدوهن ولا يكَنص
ها يسعود
ما تردس.....؟
اشچم مطبَگ عزف للخير متخورس؟
اشچم شمعة علكَنالك ..
عفتها وأصبحت هندس؟؟
اشچم اربعطعش مرن..
واجن وبنومتك تخنس؟؟
هم فالولة المكروهة ما تكَنص؟
وي يسعود
لا عمه..ولا خوله..
هنيالك دظل نايم..
صريم أفراشك اشطوله
مثل امعاجب الرعيان تتوجه أعله عاكَوله ..
زرعك تلف ناعوره
وحكَك ركس ماطوره
ولو ظليت هيچي تروح
سباحة أبطن خوره
وي يسعود
ما تذكر
ولا عتك حلم خايف
نمت وعيون ألك تنطر..
تعد ساعات دنياها وتتوع المر
شنهو العركَل ازنودك يالمشكر
موش انته الهدمت أدول
موش انته الدفنت الذل
ها يسعود....لا نخوة
ولا چيله التسرد الغيم وتعت الشمس كَوة
ولا چنك...يسمونك صكَر شلوه
وشل هور المجرة.ولا ماي الصعد علوه
ها يسعود
چا وينك
زرزور وتعله أعليك
واندل كل مچامينك !!!
بزلة صبخ من أنهير وتفلش جواهينك
ولا بيرغ حشيم يكد
ولا عايل زلمنه ترد
تره يسعود....چيلات الحراميه
فشگهن شد
وأنت برنو التلمض على ركَاب
الزلم ترعد

كتبت بتاريخ : ١٩٧٦، للشاعر زامل سعيد فتاح(الناصرية 1941 ـ 1983)