((قصة الدموع))

******

قصص بدموعي هذا اليوم أحجيهه

وعيوني تسولف كل بواجيهه

يوميَّه ألي مصاب

ظل الدمه سجّاب

*******

سلاني دهري بمصيبه وره مصيبه

اذا يومه نســاني أيعيد ترتيبــــــه

على جرحه الجرحني يرد ويصيبه

يحب من كَلبــــي يسمع ونَّه ونحيبه

** يفرح لو يشوف الدمعه بعيوني

** يشمت بيَّه لو أنسب ويضربوني

يعاين ياجرح طاب

ظل الدمه سجّاب

*******

عليَّه حرَّم البسمه ميرضاهه

وروحي بالهظم والنوح خلآّهه

أيّــــــام الفرح بأيّامه ينساهه

بالاحزان بس ويّايه خواهه

** يلبس من دموعي ثياب افراحه

** دليلي يطعنه سجاجين ذبَاحه

بداهه بعصرت الباب

ظل الدمه سجّاب

*******

حسبلي حساب عد لحظات حرماني

يشوف شبيَّه مابيَّـه وبقـه أمتانـــــــي

بشهر رمضان جمَّل حزن لحزاني

بالمحراب صك عيوني وعمانــــي

** أخذ وجه الصبح والنور من عيني

**وكَلَّه شبعد عندك جيب بجّينــــي

بطرت راس أنصاب

ظل الدمه سجّاب

*******

ما كفّاه كَلبي يطعنه ويجرح

ما لحظه رحمني بيومه لو صبَّح

على جبدي لفه وبيده بده يذبَح

مايقبلـــــه زينب مرَّه لو تفرح

** من غصبن عليَّه أجرع سمومه

** أتحمَّل عذابــــه وأبقه مهمومه

من السم جبد ذاب

ظل الدمه سجّاب

*******

شَعِد من دهري جم مصيبه أحسبهه

على تراب الطفوف بدمعي أكتبهه

سلب منّي حياتي وروحي عذَّبهه

كــــــل ذرَّه بكياني حسين ذوَّبهه

** أخذ منّي الجفوف وسلَّبه الخدري

**لهنانه بعد موكافي ياصبري

من المايسوه لعتاب

ظل الدمه سجّاب

*******

من يدري بمصيبة كربله وهمهه

عله كَلب حسين كل مصايبي لمهه

كــــل أرواحنه أنذبحت نزف دمهه

أشرف ناس بأرض طفوفنه ضمهه

** ياشيعة علي واسوهه دمعاتي

** دمعك يالموالي يطفي حسراتي

أعز الناس غيّاب

ظل الدمه سجّاب