-5-
والصرة جبتها معطرة خضيره
ومن عدها يلوِّح بيرغه العباس
ومزوِّر عَلك شباج للقاسم
وبيها اسماء تتنومس باسمها الناس
ومن الخيمكه
هم جبتْ الك تذكار ،
ردات الفرات ، وزنجيله بعاشور
والرادود فاضل يشعب بصوته
” يحسين بضمايرنا .. احنا بيك آمنا “
والحمزة الزغير ينحب بجابر
” والله ياجابر .. ما جرت
هيجي مصيبه ولا سدت
ما تدري بالكوم اشكصت
حركوا خيمنا علينا “
والمقتل يجوده بصوته “الكعبي”
والأسواق كلها مجللة بأسود
تدك وتنوح
وتزيد المآسي ….والجروح اجروح
جرح ينزف على الماضي
وجرح مفتوح عَ الحاضر
وما بسمر جرحنا وطاب
ولا فاد الدوه وعطاب
” جرح البينا لو بـ…؟
كفر واحنا بعدنا ” انجاب .
* * *
جثيره اهمومنا .. لاجن فرح بيها
ومن هذا الفرح .. جبت الهوى شكبان
وجبت لك غزل ، مظفور بالوجنات
مشدود بهوى السمرة وجفن وسنان
وجبت جارك سلام ، من عد المحبين ،
من الثورة جوادر
والسدة ومريدي
جبت ردات “ابن جونه “
سعيد وفاخر العوفي :
“اصبح يا صبح ….. ونشيّل البارات “
وحس ” خماس ” يطلع ويتسدون حيل
ويشك الهدم..يبزخ على الجلمات
يطك ويصفط اعلى التيل
ويهيم بغفل ..يركض على السدة
وأخوه كاظم – يتبعه ، وجنه عيب ايشوف
ويرد عَ السلف ، ويجسر البيبان
ويناشد حسن : إشلون خيري انعوف ؟!
وجبت وياي ،
حجي هواي
من عباس وعدَيِّن .
وجبت هوسة كريم وكاظم اشنين :
” انت دعلج … وانت كوسج .. .وانت نيص
وانت حاتم …وانت كسرى …وانت عنتر بالحرايب من يغيص
انت هَبْهَب …وانت الازرك …من يهب لازم يجيس
هي : يهديب الشايل حمله ،
وحمل الطايح شاله وياه !!”
جبت ضحجات ” عم “كوزي “
ومهوس وابن مجمان
جبت لك رمل من حازم
وخبز تنور من مريم
وعلج بستج جبت …
من العلوية بنورة
بعدها بثوبها الأسود
و لا خط الكحل فد يوم رمش إلها
وظلت محزنه وتبجي ،
وحلفت بالحسن جدها
نذرها لو ترجع تسوي
وتطش الهيل ومبلس
وجنبش عَ السطوح يصير
وجواد وكهوته تصير ملعب دوم
وفريق الطوبه هم يحضر
ويصير البزخ كل يوم
وابن مشخول كاطع …
إيهلهل بصوته
إيرج الطرف صوبين
يلجي بطكة اصبعتين
ويحشم الدنيا وتنبهر العيون
هذوله أهل الجوادر يل تنشدون
وسبع تيام انذر إلها
والثامن شفيعه بحضرة الكاظم
تنوح وتندب اعلى حسين
وتشد عَلك للمرحوم
وتسوي الفرح شيلان للزهرة
وتوزع الهريسة ع َالطرف والحي
وتعمل خبز للعباس
وبيوم الربوع تعلك شمع ولياس
وتسير ع َ الخضر وي مجرى النهر
وينك يا الخضر يالتحظى بالزينة
يعود افلان كون إلنا ،
يل منك رجا ، ومنك تجي العينه
جبت اسوالف وحيد بن كماش
لو مر بالعكد
طش الفرح وانطه
ولو يعثر غفل ، مرة ويطيح بكاع
إيسب كل الحزب
وخليف أبو جنطة ؟!
-6-
وأيجه اعلى الدرب
نشدتني عنك يوم
وكالت لي العزيز ما هلهلت داره ؟!
واخنكني الدمع ، والعبرة وازتني
وهميت الجدم ، خاف السؤال يعود
وحط بي الوجد كانون من ناره
وصرت مشعوب واتعثر
ولا شوف الدرب
ولا ميز احجاره
كل هاي السوالف ، بيها الك ظنه
كل نسمه التهب ، من ريحتك جنه
يلغايب دعود إلنه .
* * *
وزرت أهل الصويره ، وربعك أهل الكوت
ونشدتني ربيعة واخوالك السراج
وصاحوا من بعد ييبه ولك بسكوت
عزيز ابن الأخت ولنا عليه احكوك
كلت : حاضر ” أيبه ” وضحكوا على الصوت
وكالوا حسجتك ماترهم علينا
يا بن اختي الحجي يحتاج ليه انعوت
وزتوني بشكر ومأصلات الخيل
لحدود المدينة وكالوا الله واياك .
* * *
وذكرتك بالمجر وبهورة الحمار
وجكات البيارغ ناشدت عنك
وبهور الصحين لاكتني طرادات
ويعط السمج والطابك امنصب
تناشد دوم أبو محمد
والفريجات هم تنشد ،
والفرطوس صاحت من توالي الهور
هلا بكل أصله ، وعرف ينعد
والشويلات أهلك ناشدوني بغيض
حطوا بالسلف تفكه وسبع رايات
وعتبوا ع البعد ذاكَ
وكالولي الصبر إلنا وعليه انبات
وكل أهل السواعد ذكروا الكطعة
ونهوتهم صفت مذكورة بالديوان
هوسوا بالحجيمي وناشدوا عنك
وكالوا لي العدل دومه يظل زعلان
وجبت صوت المجر وياي
وأهل الكرنه والسده
وعلي الغربي شكوا أهله
ولحوا حيل بالنشده
وعتبوا عَ المحب اجثير
وكالوا لي : صدك ينسى ؟!
وكلت : هيهات ما ينسى
ومن نص السلف واحد سبكني ببيت
وصاح أهل الوفى إلهم عليَّ وصيت :
-لا تظن هاي اتصير ….. حي ونسى طرواك
بالحشر لو كفيت ….. . هم أوكوف وياك !!
وهم أهل العزير اتنادموا وياي
هذا ايصيح جيبه إلنا بليالي الدوس
وذاك يكول شبكه اشباك
جيبه على الشريعه ، وخل يشوف الناس
ودَّه مجتف وي طروش بالكفه
وخل يوكف على الجيحه ويفرع الراس
والكحلا هم تنشد
وتودي السلام بود
وأهل الجلعه هم صاحوا
عليك الله كون تعود
والغراف شد شراع
وجك ابيرغه وزامط
وكال البيه ، بيه النا
وعلى الشطره الزلم تنعط
وسلام أهل الخضر
والحمزة والقاسم
والكوفه تودي اطروشها لغماس
وحلفوا بالشهيد حسين
يودوا لك تمر شكبان
وعباية جاسبي زينه وبشت أدعم
وحجايات وي هوسات
موزنة بعدل … وكل لفظة بيها انغام
بيها المثل هم مضروب
بصياغة علمنا حسين ابن قسام
بدوان الكلام ، وربطة الجلمة
وسنجاف الكلام وصورته وفهمه
كالولي : يظل تذكار
حيث الجلمة هم موقف
وعلى هذا الاساس وينحسب معدود
من أهل الكرم والراي والأشراف
واخلاص الوطن ، بيه ينحسب محمود
ومن أعلى المضايف جبتلك مكوار
من ربعة سكر وياسري وعدنان
ومنيشن عليه اجفوف معروفة
ومكتوب بزهو فوك الطرف بالدم :
الطوب أحسن يو مكواري
وسلام من أهل النجف مخصوص ودولك
بوذيه معدلة تشرح ظروف الحال
تخبرك ع الجرى وشما وكع ونكال
وكالوا زين خل يسمع :
وخل يحلل ويقنع
هذا الصوت من عدنا
ومن باطن جرحنا انسجله بدمنا :
” أعاجم بالنجف تسري فتاها
وهم أول رهط خذلوا فتاها
حسافه اعلى الشعب فكر فتاها
بسبب ذوله الفتو بالمرجعية “
-7-
وجبت لك فرش من فراتنا الأوسط
وجبت لك عِدِل ومصلى
ومخدة ركم امطرزه بغزلان
وجبت يشماغ من عدهم
جديد امنكش بأسود
وجبت اعكال مرعز من صنع عَليان
وبشت وجاسبي وخاجية من الصوف
من سوق الجديد لو حدر المشحوف
وهم سبحة يسر ومعطرة بريحه
وقوطية تتن تفتر على الديوان
بورقها البافرة وهم لونها الفضي
وتفرها الأيادي والجكاره اتلف
والسهرة تطول وليلها يمضي
وجبت لك تخم حيو اصلي
وجراز بلحيته وهم صخاري الماو
والمحبس عقيق وشذرته حمرة
ومزور بالنجف ومقرؤ له بآيه
وبزبند بحرز وآيات ويَّ اعوَذ
وجبت لك خزرة سليمان
ضد كل السحر وضد كرصة الحيات
وضد الحسد وي العين
كل الدبيب هم لو جنت نعسان
وعظم هدهد جبت لك وهم نياب ذيب
اصنع ما ردت بيها ،وحاذر تاذي المعبود
وخاف الله بصدك ،
من كل سحر معمول لأن كل سحر بيه باطل
والباطل أبد مردود
وهم خنجر جبت ومفضض بعروه
وسليه جبت وفوكها مخيط
وشب وزيركون وملح هم أوياه
وكومة سيتلي وشص وشمع أبيض .
جبت لك دعا من اصريوط
وتربه ومسبحه
ومسواج من عنده
جبت لك آية الكرسي
بخط الزعفران ، أورق هم أصفر
وجبت لك هم جزو عمه
وقريته بزيبر و ريوان
وهم بيه ريشة الطاوس
ومضموم بسفط أخضر
كل هاي الحوايج بيها إلنا اعراف
ومو صدفه تمر ويطريها الخاطر
لأن فد يوم إنت تعود
ولزوم اتعرف كل جلمه ،
وما يتشاطر الشاطر
وإنت امأصل ومعروف ،
وشعبنا يناطر مناطر
* * *
جبت محجالك من الصوف ،
والجزوه الشعر
وثبات من عاكول
والبرنو خذوها من السلف كوه
دم تدمع عليها العين
لن اسمك عليها وبيها الك تاريخ
إلك بيها الذجر عد السلف والهور
من جانت ربعنا اتزامط بحجام
وبهور الغموكه وسطوة اليمشون
وهوستهم علت بخورة الهدام
– حط بيها مشطين لخالك !!
جبت كشوه وحليب وروبة المعدان
جبت لك فوح عنبوري ،
مشتول بنبع دهله
جبت لك ماش ومنسف
يبرج جنه نجم سهيل
ودكه امركشه نكازه وشهله
ومدكوكة تمر ، هم بجتلك وياي
مسحونه بعرف ودكاتها بجاون
ورصاع وزبد ،
وهم خبزة السمره
وست دراهم من الجاي ،
وكبصة دارسين
ونومي البصرة
وجبت لك خضارم حطها عن العين
ودلاعه طفل .. تلجي على الكصه
حطها براس طفلك ، من يدير الحول
ولو نجل اجدامه شيلها وكصه
وجبت لك بالعليجه أوياي
كل زوري اللبط بالماي
وكل جيمه سعف مخلوطة بالمطال
شعواط السمج من عدها كله يفوح
يدك ثايه كرم إلكل غريب ايلوح
وللتذكار هم جبتلك الطاسه
وكله وشربت وجدريه جدرية صفر
وسدانه وملح وطرنبه متروكه
وهم جبت الربد ودوسة المسحاه
وجبت سجة الفدان و المحد فوكه
* * *
ومن أعلى الفراتي جبت إلك صوغه
عتابه وميمر مذيل
وطكة اصبع ، وركص جوبي
“الساس” بساسها يلجي
وراس الشده مصيوغه
ع الميمر وع الميمر وع الميمر …إحنا بطبعنا عَ الغزو ما نصبر
يا بو نخيله اعلى المتن …خانتنا
أحزابنا بنص البلد …خانتنا
ياحيف فد واحد طفر … خانتنا
واصبح عميل وللغرب يتأمر !!!
* * *
-8-
واغاني من الحويجه اهناك
ابن عكار ينشدها
أغاني اتبجي المهموم
يفيح الشوك من عدها
يمول ع الربابة نياح
يشدك للأرض غصبا
وتهل دموع
يناشد بالربابة اجموع
يحرك ساكن البيدا
ويلجم كل كلب موجوع
يتل الدمع من عينك
تثغب و لتحن اضلوع :
” كصى بي الوكت .. والدهر حزني
نحيل ودوم اباري العيس حزني
ألوما السيس حز نابت لحزني
عبث ما شال بيه ورد وزها “
* * *
ومن ديالى جبت لك أجمل الأشعار
وعبد الله اسم شاعر
من بهرز صديقي يعاتب بموال
يناشد كاظم الكاطع
يسأله ع النخل والبير والمسحاه
وعن صحته ودوام الحال
وعن صفارة الحارس
وعن رمدة الشمس ومعصبات عيونها بغيم الكدر
رد للسلف خبر زلمنا الما وصل منهم خبر
وعن اهلال أبو العيدين
شلون اصبح اسم مهزوم
خادم صار لامريكا
يتباهى بوزاره و باع تاريخه
وحلفني أوصلك حجي الموال
وأنا بكل أمانه جبت الك مكتوب :
يا حيف طلعوا جذب ….. ربعي الجنت منهم
خانوا اعهود الوفا …. ولا صح فعل منهم
وياهم كضيت العمر …وارجى جنت منهم
والسلوى منهم صفت … سجن وعذاب أو وعد
ليل الحزن داملي ……واسعى وكابر واعد
اسنين ضكت الهجر ….واحسب هذاكه وعد
ومن يوم حان الوعد … جذبوا علي كلهم
وانصاب مني الكلب … وصار العمر كله هم
بالناس بان العجز … وشل الفكر كلهم
وماطلع بيهم رجل …. يحجي العدل وانصاف
لو تنشد على الوفي .. شوف الوفي وين صاف
معلوم فعل الخزي …. يسوي الرجال انصاف
وكصرت حجي العدل … جي ما شفت لي شهم
ودرد الحجي بلفظهم …. مكلوب سهم شهم
يا ناصح الروح … كلي شرد ابادر شهم
مو عطل مني الجدم … والحيل ما بيه يسع
يا لايمي اعلى الصبر اشجندوب كلبي يسع
بسبعين مر العمر … كل التجارب يسع
لجن فلا حسبت … هذا الجرى منهم
* * *
وربعك هم تناشد دوم
أهل مريدي والشلبه
وأهل الحي تشد بيرغ والكياره والسده
وأهل الداخل يصيحون
نريد أبيات من عنده
وهم خط الجوادر كال :
لازم نبزخ برده
كام وصاح ابن عوفي
ورددها ابن جونه سعيد
وما تعب حده :
– يجي الليل.. واشجي لك
عيني يبو ترجيّه ..
وردحوا يا ترف … والأرض صارت باث
ولجولك الدنيا … ارجالها وأحداث
وما تعرف شكو شبيهم ،
كلها مسودنه
والعكل صار لواث
* * *
عنك تنشد الدنيا
نسوان وزلم واطفال ويَّ اشيوخ
وعلي الساري نشد
وجفه المكطوع
هم شاهد دليل الي جرى على الناس
ما ساوم أبد ولا هو شكا الذله
وظل نشمي وعزيز وما يوطي الراس
وجليلة الشاعرة هم تذكر اعكالك
ومنادم شعرها واياك
بين البستة والموال
ومن تذكر ، تحن ادموعها وتسوح
وتشك الزيج … تكعد بالأرض وتنوح
اشجم مره إلتعتني من وسط هاالناس
وآنا ابجي عليها بكل صدق واحساس
وما أعرف شكلها …ودوم اظل حاير
وغيرت الدرب من صوبنا لبيتك
لاجنها بوكاحه اتدور واتداير
يا بن امي صدك … بجتني فد مره
اترجيتها اتكف النشد عنك
وكالتلي “أفا ” هيج الأخوة تكون ؟!
وصرت أندب وعض
واتسلى ببهامي
ما تعرف المغزى ولا تعرف العيب
وتحول غفل ، وتصير جدامي
ولج اشبيج ؟ كلتلها ،
اتكلي مسودنه
وهواي جتالي
وبعث اختك عليها ، تشرح القصه
وتشرح هالمصايب ودومة الغصه
لاجنها بكت ، اتشمشم اخبارك
وتروح باللهم وتردد أشعارك
يمته تعود لديارك
وصرت خايف من النسوان
ومن طركاعة السوده
تسويلي الشعر بسكوت … وانت بسيره محموده!؟
محد شايل الغيبه أبد عنك
بس هاي السوالف .. إشلون اجت منك ؟!
هذي وحده اوعدت ،
مشيجيخات نحسبها
وانا اخشى عليك وتعرف انوالي
والجلمه الحسينه دوم تحسبها
لاجن والحسن
كل الطرف مدحوك
وطيبوا خاطري بذاك الحجي النعتوك
* * *
-9-
وليله من الليالي … اطرشت للشعله
وقريت الفاتحه وأديت هالواجب …
إذْ صالح دبش انطاك عمره
وباصات الحكومه .. نزلتني بعيد
وشفت صورة رجل بعكاله ايعاتب
وعلى الشواكه مر جدمي
وشفت نفس الشخص مرسوم جدامي !
نشدت الواكف وظهره على الصوره :
– ثواب لجدتك .. متكلي هذا منين ؟
ضحك ذاك الشخص …
واتبسما لي وكال :
انت من العكد لو هاي إلك مره !
كلت : عفوا ، غريب … وساكن الثوره
كام وكلي جلمه بساع :
هذا ابن الفحل عبودنا الكرخي
هذا اتخاف منه كل ملوك الكاع
لو يحجي القصيده … ولسانه الفلت .. يرخى
وانطاني المجرشة
هي وصور عبود
وقرا لي المستهل واشلون بيها ايجود
” ذبيت روحي ع الجرشوادري الجرش ياذيهل
والله لكسر المجرشة .. وانعل أبو راعيها “
وهم باص الحكومة الخمسه والخمسن
عند الصالحية ..آخر الموقف
وتعطل عليْ .. مثل كل مره
ولراس الجسر..
تمشيت أنا إبخطوات
وانشدت على الطرف كالولي لكريمات
ومربع جبت لك منهم يلعلع
بحس فاضل رشيد ومناوب الدبو
“حركتيه للكلب .. عيني يسعديه ! “
ومن فطنوا عليْ
مو طيرهم… شايه
دعوني ، وكعدوني ،
وهم نسيت الباص
وردوا بالمربع :
– ها يسعديه .
ودشداشه امفصله ..
هم جبت الك منهم
إبجيب ورج ، والياخة كرخية
وكيوه امتكزة .. وخيطها ابريسم
ودكه فاس ع الشاهول
وجراوي انعجد بطارف الشطفه
* * *
وجبت لك طور بغدادي
من شيخ المقام …محمد وربعه
بيه يجود ويجوِّد ،
ويشد القريحه لو بغت سمعه ،
يلي هجرتونا … يمته تذكرونا “
يمته نجي ع البال … وتساعدون الحال “
يمته .. يمته تذكرونا
وجبت يوسف عمر من يلجي بالردات
ومن يصعد بصوته الحيل
ومنه تحومر الوجنات
ويغني الحسيني ويكسر البسته :
” يا خشوف إل على المجريه
وابنكم … فزز الفختيه
ابنكم صابني ورماني ..
وسهام لحظه .. بالحشا مرميه .. “
وهاشم رجب بالجوزه ينوح واياه
ولن باكي التخت يتلاكف البسته
وحس الجالغي موزون ومرتب
والنغمة التجي ، ما تعرف الفلته .
* * *
وردتني الصور لهلي ..
وجابلت العمارة والمجر صوبين
ثغبت اعلى الأرض والماتوا البيها
ونحت مرتين
وبجيت بطور يونس
لو شدا مخالف
ولو يبست هجع
تترادى منى ضلوع
أشب مجنون كلي وكل كتر موجوع .
لا لا ولك ،
زعلان منهو الزعلك
من بعد كل ذاك الوفا
تنسى الحبيب إل دللك
، ، ،
كل ساعة ينشدني الكلب
والنار بضلوعي تشب
كلي اش جرى لهاي العرب
ومنهو بحجيهم خردلك .
، ، ،
تدري علينا إتامركوا
ذوله الحثاله التركوا
عافوا الدين وأشركوا
ياحيف بيهم ربع الك .
، ، ،
وآنا على الجرف
وبعيني الدمع همال
ومن ذاك الكتر ، جاوبني منهم صوت
وشلت راسي غفل ،
ردد عليَّ وكال :
” يا مفارجين النزل …
عودوا لمنازلكم
بعد النا بيكم رجا …
ولنا ضمد بيكم
يهزنا نسيم الصبح
من يمر طاريكم
يمته على احبابكم … يا خلتي تحنون “
وحط بيَّ شاعب غفل
واحرك دليلي بنار
وهدومي وجت عليْ
والعكل مني اندار .
، ، ،
ومن هناك
جبت صورة عرس ” وردة “
وصندوك الخشب وتذكره منجم
ومركومة البسط ، والعدل وي الحواس
ومن عندها جبت ،
هم جرغد وشدة
ومراية ومشوفه يم مشط هندي
وديرمها البسيط الما عرف حده
جبت مرود كحلها ومن تدير العين
تخزر ، وال تصيبه يكنطر بساعه
ومن ينفل شعرها ، والكصايب سود
يتسودن عبد وتصير طركاعه
ويبست والسلف ايصير إله رادود
ويرادد كريري ويبست بمسعود “:
” بويه ، عينه اشكبرها …سار الظعن وابعد يازماني “
بويه صد ليَّه واختليت … سار الظعن وابعد يازماني “
والله ، ما اعرف فسرها …سار الظعن وابعد يازماني “
بويه ما ادري بزعل لوغيض … سار الظعن وابعد يازماني “
ويشيط وهم يسرد الثوب
ويثغب بالثنية ، ويكسر التنور
ويعاود البستة ، ويلطم اعلى الراس
وينوح بصدك وبصوته المكسور :
” بويه – شكرا الكصيبه … سار الظعن وابعد يازماني “
والله – وتعارج الخيال …سار الظعن وابعد يازماني “
بويه – كلمن نصيبه … سار الظعن وابعد يازماني “
بويه – صار الجسم بالليل …سار الظغن وابعد يازماني “
ولو يشتد غرامه ، ايصيح باعلى الصوت
ويجر “الغافلي” و”محمداوي” اوياه
ويبجي اعلى المرز ابطور ركباني “
ومن يشهك يغير طوره بسرعة
ويحول ” عالدشت ” وبنغمه إيراني.. ويبجي لو عزف سردال
ويبوس الربابه ، وراسه ايفرعه ..
-10-
جبت صورة اسعيده اتركش بجاون
وهم يمها العجل مربوط بالجوله
مره اتصيح عل الفروخ
ومره اتدك ورد واكرنفل بهاون
وأمي اتجيم التنور ،
وبصفها السدانه ومعجنة ولواث
ومصيوغه العزيزة اتناغي المغزل
وتضرب بالشعير ، بإيده ومنخل
والديج الهراتي يجول بالربعة
وجلبنا “ابخيت” واكف عَ المرز ناطور
وامورش إذانه وفنه ليكربه
ودهدار السلف ، هم يكرى بمسحاه
يرجب ع السواجي الماي
بيده ايطوف العبره وحسن وياه
إيعلمه مهنة الفلاح … واشلون اليساجي ،
يكتسب خبرة
والسركال “عبد حمود “
كاعد بالمضيف إيدخن الغرشه
صحت له فلان !
كلي : انجب !!
واتعلم الاصول وكعدة الديوان
وصرت مخلوس من عدها ، ودرس واتعلمت منه
وتعلمت الحجي … ومرادد ليحجون
واعرفت الاصول ،ومكصد الغاية
واعرفت ليناحي .. وزماط كل طالوب
واشلون الفصل ، وشدة الراية
واشلون الودي يجمعون ، بالصندوك
واشلون الفريضه ياخذ العطوى
واشلون الحكم ايوصله برايه
* * *
وبصف الشريعه جارنا ” إعميد “
حايطهم نصيص .. والهردي أظن مكسور
يذب وتصيد سليته
ومشكبن بلمهم
هم سمج وطيور
وعانية مجيد امحمله بحنطة
وبراك الجهف ، مدكوك إلها ثبات
وبراس العنج دنبوك أبو العروة
وموزر حميد إمشكل بثوبه
و مراواحه طويل ، ايدوس بالإذره
وعَ الشاطي انفرش ،
مده ، وحصر ، وبساط
ومخاد الركم ، تتغاوى للملكه
وطرادة علي بالجرف مرجيه
والمردي انشجخ حد الجرف والماي
وبصفه صفط عبود “لجليكه “
واولاد السلف ، تسبح بكتر الهور
وعمك هاشم بمسحاه
يحفر بالسواجي …
ويراقب الماطور
ومحيسن مكيف بالغنم يسرح
ايدك بمطبجه ، ويركب على الكرّه
وهي اتزاكط وتضرب عليه ازواج
لو حط الجلال وجبن من حدره
وحليمة ال ترصع .. عافت الموكد
وراحت ع الطبك … حسبالها الطابك
والكحيله فرسنا تعاند الخيال
ترفض غيرك يحط السرج بيها
وأختي اتهلهل بصفها صباح وليل
و تكول الأصيلة تريد راعيها
ولاحت بالمرابع فرش وبساطات
وحصران وهطر ، واشباب معمورة
وظل بيرغ اجدادك من بعيد يلوح
وظل موكد مظيفه موجره ناره
وظل البيت والربعه
وظل الكوسر مشبج
وتصوصي الديار ، ومحزنه بلياك
ومهضومه المساحي والربد مكسور
وهم مي الشريعة تغير بمجراه
ومروز الحراثي اتميز الجدمان
وظل الشلب ما محصود
وشكارة “علك” بعدك لفها الكيض
والسنبل يبس ، وما مش إله حاصود
ومغامس الشبلي اتحولت داره
وغرب فوك حداري
وجابل بيت فيصل .. ومشتت وصيهود
سلام أمي البجت
والجاره جيتايه
وسلام لعمتي كويغد
وسلام الساهيه وناهيه
وسلام اجكيره وام جواد البعدها اتدخن مزبن
وسلام لوصتك ياخوي
شلتاغه العزيزه اتكول الك شاره
وسلام بهيه وأم حسين
واختك كاملة وفضة واسعيدة
والحديثة ال تحبها فاركت حينا
وصار إلها كيان وبيت
لاجن تلهج بطرواك
وتنطر ع الدرب كل يوم
وصارت جده وتتناك
ولا تنساك
وتعاتب تكول اتريد”خط ” منك
وصورة مجومة جي ما تمل طرواك
و حلفتني بحيلب أمك ..
أوصل لك عدل هـ البيت:
” يل غربت وياك … هاك اخذ العيون
خافن لعد الغير ….صدن يكولون “
وانقل لك سلام الجانوا ويانا
ربعك بالعمل وبذجرك يلهجون
” دنخا ” بكل صبح
ينشدني عنك دوم
هو ” ومايكل ” وإيشو وشليمون
ظمولك كتب حطوا عليها اسمك
وصورة من الجريدة لشعرك ورسمك
وما أعرف يخويه اشبيها ما بيها
وانت تعرف يخيري ما أفرز الخط
لاجن شوكهم خلاني احسن بيها
وكالولي : بعلم ، حققها علامه
وهو ابرز “علَم” عدنا بعلم لاجداد
وكلت : يا هو التقصدونه ؟!
وكالوا لي بفخر :
كوركيس بن عواد
والفيلي غلام حسين
هم سلم لك اوياهم
وكال اعلى العهد باقين .
والدنيا علينا اشهود
منخون الأخوة ، ولا نبيع الكاع
وهذا عراكنا واحد وطن بحدود
وبعالي اصواتنا ، نتكلم ونحجي
ما نرضخ لعد محتل
لا نرضى بعشيرة تبيعنا بوعود
” وبحي بجي ” وكلنا نغني ” الهربجي “
وخشان العماري ،
جنه جك نداف
مثل الزيبكه ، يلجي ويخدر الجاي
ولو صار المنادم وعنك يسألون
يبجي بزاويه مثل الطفل بهداي
وهم جاسم وخوه أحمد .. ابن كحيكح
اتعرفه !!
ردوا – ع الرمادي – وهم اجوا صدفه
جثير اهواي نشدوني
لاجن بالستر ، وبخوف ، وبلهفه .
-11-
الك صاحب ، ذكرنا – مره من الصين
واجتنه اخته تدور
تنشد الوادم
المرأة ، جبيره وخاطيتها العين
وصلتنا العصر – بمهافت الجادم
ومدري شلون وصلتنا !!
ولا أحد درى بيها !؟!
نشدناها بخجل : يا خاله إنت منين ؟!
– اخت “هادي” ياعمه وكلفاني أوصل
– اطيكم ها الرسالة الجايه من الصين
شربت جايها وكامت
وشكرناها ومشت
وامك خنكها الصوت
وفضينا الرساله … واعرفنا اشبيها
تحمل ” هادي العلوي “
و”ديوان الوجد”
ومسامرك عنده
وقرينا آخر سطر .. كتباه ..
كبل الموت
ضد كل احتلال والسانده ومده
وتعال وشوف … شوف امك
تبجي وتندب باسمك
وتكول ابني العزيز ، كل فاهم يعرفه
وتعال وجيب لك شاطر … اللي يكدر يسكتها .
وظلت تبجي طول الليل … وابنك – يوسف – بسدها
وهم هاي الرساله علمتنا ادروس .
وعرفنا انميز بربعك
وعرفنا الأصيل ، واعرفنا – الخارم –
واعرفنا الشهم ، باخلاصه لشعبك .
* * *
واعرف فد شخص ،
من “ربعك” ليحجون !!
مسجل بالحزب
ومساند أمريكا !؟!
يكتب بالصحافة …
ويحجي بالإعلام “
يستشهد بالجدل ويكول “تكتيكا”
نشدته اعلى السبب ،
وعن الجرى والصار !!!؟
كال : الظرف موضوعي
وعامل خارجي
واسباب أخرى اكبار !؟!!
ونشدت آخر بسيط ، ويحجي بالحسجه
ولك شنهي السبب؟!
– مكلوبه الحسجه !؟!
وبزخ يمي ،وبست ،
ورادديت وياه :
– محد يعرفك يالبن .. غير اليمردك بيده
هذا الحرامي الكضوه … بعد العذر شيفيده !
وخلصنا ” البست “
واردف علي وكال :
– خربت يشحيل اطني افلوسي !
* * *
أو وحده من الحبايب …
ليله “المحيا”
بديها ادراغ من فضه ، ولجت بالباب
ردت ” ردتك ” حلوه بليالي الصيف
وردحت بالمجان البيه جنت تقرأ
وفرعت ها الكصايب وابد عيب اتهاب
وماجت بالمشد ومعدلات الصوت:
– الخيل بالكمره حلو … ممشاها
الخيل عافتنا ولا …عفناها !
ونساوين الطرف طلعت ،
وردن ع الحجت ، وتناغمت بيها .
وشالنها الحبايب ، وسط ذيج الدار
وصوت أمك علا وهلهلت ليها
فكت كل حزنها ونزلت وياهن
ولبست هاشمي والردة ردتها :
– يمحيه …. حييناك
والعايش الله….
ايشوفك !
* * *
ومن صار الطبك والخيمكه انصبت
شفت اختك تعاين سيفك المغمود
شفت دمعه اعلى خدها ، بغفلة وانسجبت
ولمن زورتها بعين ،
جابت لي الدرع والدركه وثغبت
وكل ضيم العزا اتداور ابيتي
صحت : يحسين يامظلوم ..
جاوينك ياحيدر تحضر الشدة
وآنا بها اللكد … واندك علي الباب
” وليشبهون ” اجوني ..
وناشدوا عنك
وكلت الهم : جريب وتخلص العدة
ومن شافوا دموعي خلوا وراحوا
* * *
اجيت وليك متعني …
أريد احجي سوالف أوجرت بيه
وانقل لك صور ، متسرمدة بروحي
حدت بي مثل السيف
وكلما أذكرك ،
إتبشط اجروحي
حرت شحجي – يخويه –
وابتديك اشلون ؟!
ويا صورة الاحطها … إملونه بفد لون !!
أريد أبدي كلامي …
بصاحبك عريان
نشد مره عليك وهل الاعيون
وثلث جلمات حط بيدي
ومشى عني وتركني بين الاظنون
– “كصرن يا حسافة وما خذن ثار
و وصل بيهن كصرهن ، حد المتون
يمشن ملاوذ مشيهن حد الاكتار
و ولاوهن الجانوا عيب يلوون
ما مسحن دمع والدمع مدرار
وما وصلن لخدي ، مسحن اشلون !؟!
تعال وجيب جف ليمسح النار
وانا مكاطف جمر ، بركان العيون
يم باب الحزن ليليه خطار
وجن ناس العرفهم ما يظيفون
وانا وحزني ربينا اثنينا ازغار
وشربنا اهمومنا من فرد ماعون ..”
بديت بها الحجي … جي ما اصدمنك
حيث الناس تنشد
وآنا اشكف واداري
بكل نشد عنك
حرت ياخوي وي الناس
وانت تعرف طبعنا ما تدير اوجوه
صرت مرات اجذب وآكل بروحي
ومرات الدمع يدفك وكول انسوه
حط بي الدهر طعناه مسمومه
وكل طعنه اعلى اختها اتزيدها قاطات
صرت متوالف لهمي واعرف اشبيه
وصرت أسحن وادك واتسلى بالحسرات .
* * *
-12-
ونشدوني – الأمن – عنك
جثير هواي
حطوا بيتنا تحت النظر والعين
وصرت كل يوم أحضر وانسئل عنك
وكل مرة الاجي …
اتموت مني الروح
ومن أدخل عليهم اتشاهد
وأيس واعتبر هاي المنيه بهاي
هانوا شيبتي ياخوي
والوادم علي اشهود
وطلعوا كل خبر عنك
وشوهوا صورتك عمدا
لاجنك ” ذهب ” والوادم اتعرفك
آخ شعظم بلوتهم !!
يعرفون النغل
وامه وأبوه امنين
مي ميزون طلبتهم
ويس الهم عرف
” لا بالحسن وحسين “
جذب حطوا ” إسم الله ” على البيرغ
وجذب ” حجوا لبيت الله
وجذب ساروا على “السنة “
ما إلهم علاقه ، بلا عرف وبدين
ولا عرفوا عدالة
بيومهم وسنين ،
بلانا الله بخبثم
من اجوا للدار
خربوا كل ضمير بكل طفل والصار
طيروا نومي من عيني
وصار بعكلي الوسواس
وأخاف احجي درد كلبي
واخاف اتحاجه وي الناس
بكل شبر … حطوا نذل مدسوس
وحطوا ع البريد ..
شارة ورقم منحوس
ويلويني الحزن مرات …
ومرة اصبر على البلوى
ومره تشوغ مني الروح
ومرة اضعف واعاندها بصبر كوة ،
وكلما ينتهي التحقيق
انذر لجلك انذوري
أكثر من ألف نشده
وكل نشده ، تذوب الروح
إمِّن بالحسن ياخوي كل نشده تشيب الراس !!
يشيب الطفل من عدها
ولا يبقى عقل واحساس!؟
وخفت كلش عليك اهواي
وبسري ناشدت رب العرش بسكوت
ياربي الظلم … لشوكت !!
وليمته !!
وخرَّت دمعتي وسالت
وعليَّ الفاظهم “هالت
ألف موضوع طلعوا لي
وجابوا لي شهود اهواي
وكلها مزوره ..
بلجت يذلوني !!
وصبرت اعلى الصبر كوة
وشفت الموت بعيوني ،
وكعد يمي … ودوى براسي
وسرى طيفك على عيوني
وشفتك أكبر من الموت
وكلت أصبر وهاي المرة هم اتفوت
وفرجها الله وكضت ..
وتشاهدت بيها
وطلعت ..
وع الدرب حراس
ومن أمشي .. علي حراس
وتابعني شخص …
وبلحية رز وماش
بسمل بالجذب ..
سلم علي وكال :
– تساهل بالحجي .. وانطي شكو عندك
وخزرته وشاط بي ابليس
وتعنيته وطفر … ولحكته بمسبات
وفلت منى وشرد
وما بيست ياحيف
وكلت اكضيه …
واللي ايصير … خلي يصير
مليت الحياة … إلكها دنا وتحقير
وطنت النفس ع الموت
وبروحي علا ، ازماطي بكل صوت
أو ودعت المرة وفروخي والجيران
لأن طبع الغدر عادة
بكل ناقص يريد ايصير
وبعد منها اتركوني …وأيسوا مني
وعرفت العاطفة وذلها
وعرفت المرجلة وفنها
ومن عدها عرفت ، معنى البطولة
وهيبة اليحجون
واشلون ليزامط ما تخونه اظنون
وعرفت اشكد قوي إنت
وعرفت اشكد وفي إنت
لاجني – يخويه – ما قريت علوم
وربيتك وانت كصمول
واطلع بالفجر ، وارجع ، وانتْ بالنوم
واعذرني – يخويه – ما اخبرت سرك
أشوفك ” جاهل ” بعيني
وحسبالي الكبارة … امقادم الأيام
لاجن بالشدايد ، بينت موصوف
والوادم تعرفك … نشمي ومقدام
واسنين العسر … خلتني احلف بيك
وخلتني أزامط ، واحجي بطولي
وصار اسمك علم
لكل بيت من عدنا
لاجن ، أخبرك ياخوي …
مرت الشدة من بعدك
وإنت امعدل وتعرف !!!
والصار بقدر … مكتوب ومسجل
” كريمة ” اختك ، اجاها مكابل الصاروخ
وطفل الرضع منها مات وياها
وهم عدموا اخوك حسين
واخوك حسين عدموه الفجر
وخذوا داره غصب ، وبهذلوا ناسه الفروخ
وحرموا كل طفل من المدرسة والعيش
وامك صار بيها اجنون وما كملت شهر … إلا وصفت ميتة
ومطشر طفت عينه
وصار امداوج وي الشوف
وضاجت بي كل الكاع … والدنيا اصبحت سودة
وين انطي الوجه …
ولياكتر أنوي
نكبة وحلت بها الدار
مصيبة وبس علي تندار
جثيره اتشمتوا بينا
وجثير النشدوا علينا
وكل هذا الحجي … امدون ومكتوب
وله اشهود و حوادث ،
وهم جرح واندوب
وعيب انجوز منك … بل تعرف الحك
وانت أدرى بدليلي من تخيط الشك .
-13-
شحجي لك بعد …
كل شي انطبع بالروح
أورجك ع الصدك ؟!
غركت سفينة نوح !
جبت وياي .. ضيم هواي
جبت حزن وفرح وهم ذجر الموت
جبت ضيم الحصار ، وخنكة الطاغوت
جبت كل الكلام الساكن بروحي !!
جبت أشعار كلها اتسولف جروحي !!
جبت الساني مجتف
جبت كل الحقيقة الحجيت امخالف !!!
جبت خوف السنين العشعش أوي الناس
جبت أسماء ءكل الفقدوا الإحساس
جبت جروح كلها منيشنة بمسمار
جبت الآه والعبرة …
وضلوع امكسرة
ما فاد بيها جبار
وجيت مشيم بموقف :
ما خنت العراق ،
وساوميت الروح ..
وما خنت الشعب
لا ولوكع مذبوح
وتركت أهلي ،
وديار الحي ،
وعش امجوجب اعلى فروخ
جبت ” دفتر اهمومي “
الخافي والمستور
وفيت الأمانة …
وكل نذر منذور
وما عندي ” حساب ” ،
مقيده ببنوك
ولا جير وخفت ،
ولا نخل وعثوك
ولا أعرف أخاتل ،
بعمري ولا عرفت البوك
وبطرك الهدم جيتك
ما ساومت كل ظاغي
ولا ِملت لحكم باغي
إجيت وراسي كلش فوك
إجيت وجسمي كله حروك
واعلن صوتي بنبرة :
– أرفض كل اسم محتل
حت لو كان “أبو الزهرة “
ولا أرضى بشفاعه
صادرة من احزاب
تساوم كل وعي بروحي
تحرف جبلتي ومحراب
ولا ” دين ” ليساوم تحت ألف حجة
ولا “مذهب ” يبرر صيغة العدوان
ولا أقبل فتاوي تحرم اجهادي
وقاوم بالنفس والصوت
واعارج كل عدو للموت
واجيت وليك متعني
أعرفك زين واندلك
زين اعرف شكو وشبيلك
واعرف عرجك ورسك
متزامط جذب وتخون
أعرفك ذاك لبروحي
شهم واتنومس بزودك .
، ، ،
إلك رس الفعل عشرين
ولك تاريخ من سومر
إلك فعل الحضارة في مرابع أور
وغيرك – بالجذب – ينبش له عن اجذور
انت اول حرف معروف بالدنيا
وانت أول سفر اتسجله الألواح
كلكامش إنت وانكيدو وتموز
اشلون اتصير نَصه وتقبل بها العوز !؟
إنت معروف باصلك ، وبسواد الكاع
إنت رمز الحسين الما نشرى ولا نباع
إنت طين الشواطي الحر
إنت دجلة ورشيد وهيبة المأمون
إنت رقعة وقلم
ومخطوط يتباهي
وانت الفلسفة ومجادل اليحجون
ومو صدفة انحرك متحفنا المعلوم !!!
ولا صدفة انسرق ثور المجنح…
و رمز آشور ؟!!
هناك – اجلاب –
باكو كل أثر تاريخ
وهناك أغراب
نصبوا ” شله ” معروفة
وكل خاين نذل بيها
ومسجل بالدفاتر كل اسم طرطور
وكل واحد ردح وتسابك اعليها
والخان العراك
مثل القرد منبوذ
ها بالك تطيح وتزلك اوياهم
غداره الدَنيا … والفلك دوار
والتاريخ يشهد .. سجل اسماهم
وهم كل يوم إلهم ، ميت ألف صوره
وطبعات الأصابع … ماتتيه الأيد
وشعبك يعرف التاريخ واسراره ،
ولابد ما تخضر الكاع
ما تمحل أرضنا
والأصيلة اتجيب
ألف سرجون بينا مخمر ومدفون
واكماط الفحولة شده “سنحاريب “
وهاي الفترة غط وانبك
واولاد الحرام امزاود اعلى البوك
لاجن ليلهم محدود
ومن غبشه الشمس …
تطلع على الدنيا
واحساب الخيانة امسجل ومعدود
لتغرك الموجة الجاية من ابعيد
ولا نهر النشف ميه وصبح صيهود
كلها اتعود ..
وانت تعود …
وكل نشمي العرف حده
عليه اعهود ،
ثم يعود وراح يعود
إله بنص السلف ديوان
وحجاية سمر ،
وسيرة مكتوبة
ما يبقى العراق بها الشكل ينزف
هاي أيام وتعدي ،
وكل خطوة الخطاها ” الشخص “
محسوبة !!!
بالك يا شريف اتخون
تعود ع الصبر وافطر على المضغة
عمرك … هم عرفت اشبيه
أقل من المضى الباقي
احذر لا توسخ الشيب ،
ولا تفطر على افضاله
وتكسر هيبة أيامك
دكلي .. اش تعتذر ،
لو خاطبك ابنك ؟!
عن عمرك مضى …
وتاريخك وسجنك ؟!
وعن “فكر ” التناضل بيه
عن أيامك وحزبك !؟
معقوله الشرف مصيون
عد ” أمريكا ” بعرفك ؟!
جا ياهو الذبح ” عادل ” ؟!
وياهو “لفهد” كص عمره ؟!
أناشد والنشد مطلوب
والينشد جواب يريد !!
شنهي معنى التحرير ؟!
شنهي الفرق بالتزوير ؟!
وشنهي ميزة اللاحق ؟!
وشنهو الفرق بالسابق ؟!
مو كلهم فصيله مفصله من اذياب
لا معنى الشرف عدهم
ولا بيهم أصيل إمأصل من أصلاب
رحم الله الرصافي الكال :
من أين يرجى للعراق تقدمٌ
و سبيل ممتلكيه غير سبيله “
والباع الأصل جذاب .
-14-
واخبرك عَ النفط باكوه
ومي دجله صفى وشاله
والفلاح يركض دوم ،
والعامل ردي حاله
يركض والعشا خباز
وزاده الدخن ونخاله
وظل البيت للمطيره
وللقجمه وخشم مقنوص
وتلاعبت باركانه
أنذال وإسامي اشخوص
وصح ” المثل ” بيه اليوم
” لكل نعجه ” حزب راعي !!
وهاي ” الطوله ” لأمريكا
تروح وتلعب بها الحوش
وسايسها ” نذل ” ماجور
ياخذ كل أمر من “بوش “
* * *
إجيت أحمل قصص
إمأرخه بتاريخ
عن ” هور الغموكه “
وجتلت ” صويحب “
وعن هبات ” ازيرج ” ساعة الملكى
وعن صورة كريم الفجر الثورة
وعن اخته وسفر طاس الأكل للريس الزاهد
وعن سيرة حياة اللي إلي أجو بعده
وعن أحزاب ” جانت للشعب قبله
وبليلة وضحاها بدلت تسعين
وتذكرت الشعر والشاعر المالوم
” عاشرت الصدك سبعين ..
طلع حتى الصدك جذاب “
يا تمن الشاميه
أكل كل زينك المشخاب “
وهوس واحد بجلمه
وطك بطك حجى الحاله :
” الجان ايدن … صار اخشاله ” محمداوي “
* * *
جبت اسوالف اتشيب
لاحك يرتضيها … لا ولا الباطل
” المحيبس ” لعبنا غيروا طبعه
والطالوب يلعب وكل لعب باطل
وكلها اتصيح من تلعب :
– ” ألعب أنا ع اليمين … وطلج هذا هاليسار “
وهم زفة العرس
تنصاب بالصاروخ مكر الذيب
ومنعوا ع الرمادي كل مشي وطلعه
زيفوا كل كتر بالروح
وخنكوا كل ضوا شمعه
و”مجلسنا النيابي “
محد ايعرفه
إسم كل عضو بالمجلس
مدروس بعناية امزكه با مريكا
” وأبو ناجي “
إييد زلمه وربعه
وظلوا ليوره أصحابنا “الزينين “
وافروخ الزنى صاروا لك القدوه
اجيت وجبت هالصوره
اجيت ونارها بروحي
اشجم مرة لخطفني الموت
واشجم زادت جروحي .
، ، ،
إجيت وليك متعني
واطلب شوره من عندك
إن جان ابن العراق تكول
وما تبخل علي سرك
دايف طينك بيدي
ابن امي وازامط بيك
بالحظ والبخت تحلف
وتشد راية العباس
وتتوجه على القبلة
وتحلف والشهود واياك
ولقرآنا اتقبله
متخون الملح والزاد
ولا تساوم نذل محتل
ولا ترضخ لعد طرطور
باسم الأجنبي يحكمك
وهم تحلف “بداحي الباب “
وايدك لازمه الشبه
متخون العراق بيوم
ولا فد يوم تنسى الناس
وشهادة عابد لربه
ويشهد كل “سلف ” عبود القبيلة
ولبو محمد وبزون
وبني حجيم وازيرج
وموسوي ولامي
وكل باجي الحمايل
إلك كلها شهود
وسندنا انحطه بالشباج
وبحضرة علي حيدر
ليخون العهد مبتور
أصله وما يدش ديوان
شهادة باطل بحجيه
ولا ينكل بيه اجدام
وكل اهل الفرايض
تنعل بموتاه
وهم راس العشيره يكول :
خسيس وتنجسر عصاه
ولا يقبل جرش ذباب
وكلها تصيح ، حيل واياه
هذا ” العهد ” بيه ارضى
وبيه اقدم …وبيه افعل
وصحتك وانت هالسامع
ترفض عرضي لو تقبل ؟!
* * *