سماحة السيد مقتدى الصدر : وهو كذلك ، أكُلك اي بس مشروط ان يكون بوجوه جديدة بعض الشيء اكو بعض الوجوه القديمة جيدة ( لو خُلِيت قُلِبت ) هاي الوجوه القديمة الجيدة مع جديدة مع تغيير شويه بالمفوضية حتى ليصير تزوير وما تزوير بتغيير قانون الانتخابات حتى ليصير غُبن للكتل الصغيرة خلي نسميهه والمغمورة اذا صار هذا الشي واتفقنه عليه اتصير كتلة عابرة للمحاصصة وانا في صدد كتابة ـ بل كتبت ـ ميثاق شرف ، ميثاق سياسي ، ميثاق وطني لجمع هذي الكتلة العابرة للمحاصصة و سنعلن عنها عما قريب ان شاء الله .
المحاور : جيد هذا هسه صار خبر حصري إلنه ....
سماحة السيد مقتدى الصدر : خبر عاجل
المحاور : اي خبر حصري إلنه ، بالشكل اللي تحدثت بيه حضرتك اكو أحد مستثنى من هاي الكتلة ؟
سماحة السيد مقتدى الصدر : الفاسد مستثنى ، الطائفي مستثنى ، صاحب العلاقات المشبوهة والخارجية وغير الوطنية مستثنى .
المحاور : أكيد أكو أشخاص ببالك او احزاب ببالك تكول هذا لا يوصلني ولا اريد اوصله ؟
سماحة السيد مقتدى الصدر: حزب البعث ، اذا موجود ما ادري هل بقيت له باقيه أو لا ما اعرف .....
المحاور : هذا الحديث كله عن أيرجعون للواجهة
سماحة السيد مقتدى الصدر : حتى جبيرهم عزة الدوري كام يحجي على صدام يكول الجيش مو جيش صدام بعد شنو يعني حزب البعث كُلش خارت قواه .
المحاور : يعني والحديث عن انو يريد يرجعوهم للواجهة ؟
سماحة السيد مقتدى الصدر: منو يرجعهم للواجهة اني موجود ويرجعون البعثية للواجهة !!! عيب .
المحاور : يعني هسه هذا ضربت بيه مشروع كامل حضرتك .
سماحة السيد مقتدى الصدر : ميرجعون ، شحدهم ، البعثي لا يرجع ، بس لا ان تكون تهمة سياسية جاهزة لكل الخصوم ، انه اني عندي خصومة وياك انت بعثي انت عندك خصومة وياي اني بعثي هاي لا ما أقبلهه ، البعثي الذي دعم صدام حسين عليه اللعنة والعذاب ولا يخدم العراق ولا نريده معنا هاي هيه ، نقطة ... راس سطر .
المحاور: هاي هسه حددت الاطر اللي بسؤالي اني كتلك لا يوصلوني ولا اوصلهم
سماحة السيد مقتدى الصدر : الدواعش يعني اذا تسميهم حزب ويريدون يطببوهم هم منقبل مية بالمية ، الفاسدين .
المحاور : اكو ناس ، أو شخصيات ممكن أتباعك ميقبلون عليه ممكن اكو تعارض ...
سماحة السيد مقتدى الصدر: مطيعين ، وجيدين ، من هذه الناحية اللي اني أكوله يسمعوه غالباً بنسبة خمسة وتسعين بالمية الى تسعة وتسعين بالمية لان يجدون اني اعرف بالمصلحة منهم حالياً وتدرون انه اكبر قاعدة منضبطة حالياً هي التيار الصدري ، كول لا
المحاور : لا ما اكدر اكول لا . زين راح تعود للتحالف الوطني لو ما تعود ؟ هسه احتاج اي
لو لا .
سماحة السيد مقتدى الصدر : ماكو نص ونص .
المحاور : لا ماكو .
سماحة السيد مقتدى الصدر : لا حاليا لا . ماعندي هيج مشروع ولا هم فتحوا موضوع ولا يجرؤون ان يفتحوا هيج موضوع يدرون راح ارفض حفظاً لماء وجههم ان لا يفتحوا هيج موضوع.
المحاور : لا مال ميجرؤون يعني ردة فعلك راح تكون قوية لهالدرجة على التحالف ؟
سماحة السيد مقتدى الصدر : لا ماكو داعي ردة قوية بس ما اريد ارجع للتحالفات ما فادتني ولا فادت العراق شقدم التحالف وغيره احنه ليش نصُب جام غضبنه فقط على الشيعة والتحالف ما ادخل حتى ويه السنة الحاليين هم تشتتوا كل واحد وحد ويه فلان وهذا ويه فلان وقواعدهم الشعبية ضاعت ومشردة مهجرين وكذا ولا اعتنوا بيهم ولا فادوهم اني ما أصب جام غضبي على الشيعة فقط بس الشيعة اعتبرهم أقربين فأصب جام غضبي عليهم مو اكثر من ذلك .
المحاور : خلينه الان ننتقل ، او توقفنه بالقسم الثاني حول قضية شكل القائمة يعني بعد هذا كلامك ما راح اشوف التيار الصدري او السيد مقتدى الصدر بقائمة شيعية بحتة .
سماحة السيد مقتدى الصدر : ان شاء الله . تفائلوا بالخير تجدوه ، قائمة وطنية بحتة ان شاء الله .
المحاور : قائمة ، من تكولي تفائلوا بالخير تجدوه يعني القائمة الشيعية شر ؟
سماحة السيد مقتدى الصدر : لا مو شر ، بس المجرب لا يُجرب .
المحاور : بس بيهم قوة ؟
سماحة السيد مقتدى الصدر : قوة المذهب من قوة العراق ....
المحاور : القوة اللي كانت ايضاً تحتاج ....
سماحة السيد مقتدى الصدر : اذا قوى العراق قوى المذهب ، اذا قوى الشعب العراقي يقوى المذهب ، نحن لا نريد ان نكون اعتدائيين نريد ان نكون سلميين مسالمين صالحين مصلحين لا ان نجر النار الى قُرصنا والى احزابنا انا ادعو كل الكتل السنية والشيعية وغيرها وعلى رأسها الشيعية ان تحاسب فاسديها مو مقتدى يحاسبهم ، هُم يُحاسبوها كما مقتدى ينزل كصكوصة بفلان وفلان وانتو أعرف خلي همه هم ينزلون كصكوصة بطريقتهم الخاصة ويكولون هذا فاسد ويكولون هذا خاطئ ، هذي الشجاعة التي تثبت ان الشيعة وغيرهم هم وطنيون .
المحاور : زين بهاي الحالة ايضاً مراح أشوفك بقائمة انتخابية بوجودك ووجود فصائل الحشد الشعبي ؟
سماحة السيد مقتدى الصدر : لا انا لست مع دخول فصائل الحشد الشعبي والمجاهدين الابطال في اروقة السياسة ، يجب ان يكونوا اعلى من ذلك كما انا منعت مثلاً في السابق جيش الامام المهدي بعنوانه في لواء اليوم الموعود في السياسة ماكو هجي شي ماعدنه هيجي شي المجاهد غير السياسي على عيني وعلى راسي ضحى بدمه وضحى بكذا بس مو انو أبيع إلهياه ازاء انطيه كرسي لو أنطيه منصب هاي عيب بعالم الجهاد .
المحاور : يمكن هذا اللي خله شركائك عدهم نوع من الغضب على حضرتك انو...
سماحة السيد مقتدى الصدر : مو بس شركائي حتى بعض ناسي هو الانشقاقات كلها بهذا السبب السياسي انو المجاهد مو سياسي ...
المحاور : وشطبق على التيار الصدري وعلى اتباعك تحاول تفرض او تجبر الاخرين تطبيقه على أتباعهم .
سماحة السيد مقتدى الصدر: اني ما جبرت ما شاء الله محد قبل شنو المشكلة باقين همه ميقبلون بالاصلاح لان وجودهم وكيانهم لا يكون الا بتواجدهم السياسي بهذه الشخصيات الفاسدة وغيرها ، اذا إنزالوا راح اي وجود الهم من العراق ، اني وجودي ولو اني اسف قد يكون بي شويه تكبر مو وجودي وجود سياسي اني موجود قبل ان يكون الوضع السياسي الحالي العراقي اني وجودي بنسبي بعمامتي بأفعالي بشعبي بناسي بأتباعي بمحبيني برضا الله عني ان شاء الله وحبي لله هذا يقومني همه اللي يقومهم شي واحد وجودهم السياسي فلان اذا أُزيل من السياسة ومن الحكومة يصير صفر الى اليسار.
المحاور : وهذا نفسه السبب اللي كلت الانشقاقات صارت بالتيار...
سماحة السيد مقتدى الصدر : نعم هواي منهم بهذا السبب وسبب حروب طائفية خرجناهم من التيار ولا زال التيار يحمل وزرها لحد الان يكولون التيار صاحب حرب اهلية مع ان المنشقين من التيار هم الذين يحملون وزرها امام الله وامام شعبي انا أعلنها لست انا ؟
المحاور : منو ذولي بعد صارت قضية مصارحة .
سماحة السيد مقتدى الصدر : انت تعرفهم ماكو داعي اذكرهم .
المحاور : اريد اعرف من عندك .
سماحة السيد مقتدى الصدر : الميليشيات الوقحة .
المحاور : بعدك مُصِر عليهم .
سماحة السيد مقتدى الصدر : نعم . وأُصر وأذا وقعنا بيدها مستقبلاً في الانتخابات الجديدة ما راح أنطيح بالفاسدين فقط ، راح أنطيح بقطاع رقاب جُدد فلا بد من تسليم السلاح بعد تحرير الاراضي المغتصبة العراقية للدولة والماسك للأراضي المحررة هو الجيش والقوات الأمنية حصراً لا المليشيات ولا الحشد ولا الوقحة ولا غير الوقحة ولا الاحتلال
المحاور : نادم على خروجك بمؤتمر صحفي مع قادة فصائل الحشد من زاروك الى مقرك ؟
القائد السيد مقتدى الصدر : اني شغلي مصلح شغلي أن اوصل إلهم الرسالة مو شغلي انه آني اصير إلهم أو تابع إلهم اني أكعد مع الجميع ما أصير تابع إلهم أصير أنه أوصل إلهم رسالة أوصل إلهم رأيي أوصل إلهم نصيحتي أو هم يوصل صوتهم إليه لعله آني خطأن سمعت منهم او سمعوا مني أو هذا كلش كافي
المحاور : ندمت على المؤتمر الصحفي بخروجك معهم ؟
القائد السيد مقتدى الصدر : لا ابداً ، وصلت الرسالة إلي أريدها أو أخذت منهم إلي أريده
المحاور : بس القطيعة رجعت أبيناتكم
القائد السيد مقتدى الصدر : لا ما كو أي قطيعة ، القطيعة فقط مع المليشيات الوقحة التي تتعدى على الشعب العراقي وهي مندسة فيهم وهي مندسة في كل مكان
المحاور : جيد ما راح تنطي أسماء كان من ضمن الموجودين في المؤتمر الصحفي ؟
القائد السيد مقتدى الصدر : ممكن ايكونون موجودين أو ما موجودون بعض أقصيناهم
بعضهم ما أنقصوا موجودين بالمؤتمر الصحفي أي نعم
المحاور : بعض قادة المليشيات الوقحة كانوا موجودين بالمؤتمر الصحفي
القائد السيد مقتدى الصدر : وصلت ألهم الرسالة وأخذت الرسالة منهم وعرفت أشلون راح أتصرف بالمستقبل بس آني ذولة ما احسبهم على الحشد الشعبي ، الحشد الشعبي بطل ومجاهد لكن اكو جهات تنحسب على الحشد الشعبي أتخاف منها الحكومة أيخاف بعض اطراف منها ايكون أنحاول نبعدها بأي صورة من الصور حتى لا تسيطر بسلاحها على شعبها
المحاور : ممكن أتوافق على أن أيكون رئيس الوزراء المقبل من عدهم ؟
القائد السيد مقتدى الصدر : من الحشد الشعبي
المحاور : من الحشد هية موجودة هاي الفكرة
القائد السيد مقتدى الصدر : آني ما أعرف هاذي حسب توافقات ، أذا كان تكنوقراط ومستقل وأبوي وكذا شكو بيهه ما عدنه مشكلة ولم يكن من المليشيات الوقحة شكو بيهه إللي أيدافع عن وطنه، بس آني اللي أكوله : يجب أن يكون الحشد الشعبي بعيد عن السياسة نهائياً عن أروقة الحكومة
المحاور : يمكن أتكرر هذا الموضوع أبمصطلح هسه أبهاي الجلسة خلال دقائق أكثير ضد قضية المليشيات الوقحة والخوف من عدهه شنو إلي أنت شايفه من عدهم الناس ما شايفيه أو شنو الخوف بالمستقبل من عدهم والناس ما شايفيه حتى الناس تفهم لا أيكول أنه بس مجرد أستهداف من قبل السيد مقتدى الصدر لأن أنشقوا من عدهه وأخذوا بعض أجزائه
القائد السيد مقتدى الصدر : ليش تفتح ملفات عتيجة عبرت و راحت
المحاور : أنت أتكول الآن الخوف من سلاحهم في المستقبل
القائد السيد مقتدى الصدر : يعني مثلاً راح أمثلك واحد أنخطف أخوه راحوا ألف وخمسمية واحد بسبب اخوه فقط أعتبرهه مليشيا وقحة
المحاور : هاي أشوكت
القائد السيد مقتدى الصدر : هاي بي الـ ( 2007 ـ ستة ــ أثمانية هيجي )
المحاور : أنت أيضاً متهمين أبوقته بيهه
القائد السيد مقتدى الصدر : مو هو كتلك أحنه متهمين ولا زلنا نحمل وزرها آني شحجيت كبل دقيقتين أتلاث مع أنه مو أحنه المتهمين ، المتهمون هم من أنشقوا عنا من عصونا من ذهبوا واتبعوا غيرنا هيه هاي المشكلة بس منو أيصدكك محد ايصدك
المحاور : من اتبعوا غيركم بأعلى مستوى القيادات أتبعوا قيادات اكبر ؟
القائد السيد مقتدى الصدر : أي طبعاً أكو حافظة
المحاور : زين قيادات دينية
القائد السيد مقتدى الصدر : ما أعرف هم قياداتهم أتخصهم ما أيخصني كل واحد يختار قيادته إلي أيريدها ويمشي وراها
المحاور : سيد أني أذا واحد سألني أكله ما أعرف ممكن بس مو أني أسأل السيد مقتدى الصدر
القائد السيد مقتدى الصدر : ما أعرف يعني ما أريد أكول ، خلهم هم قياداتهم ألهم و هم يمشون حسب امام الله وامام شعبهم وسترون ما سيفعلون وما سأفعل
المحاور : الفترة الأخيرة أتكررت ...
القائد السيد مقتدى الصدر : لذلك آني من قناتكم أدعوهم الى التوبة أدعوهم للرجوع أدعوهم الى التآخي أدعوهم الى أنه أيبطلون من حمل السلاح أدعوهم خصوصاً من أنشقوا عنا بابنه مفتوح أيدنه ممدودة كافي أنه بس أيكونوا كيان شخصي إلهم خل نبني العراق خل نبني وطنه خل نبني شعبنه خل نخدم شعبنه كافي هاي الخلافات إلي أبيناتنه إلي ما وصلت العراق وشعبه إلا للظلمات والى الفقر والى الظلم
المحاور : سيدنه افتهم بكلامك لو يرجع تحت عبائتنه لو يعتبر عدونه ويكون بيه كل الصفات السيئة إلي ذكرتهه
القائد السيد مقتدى الصدر : تريدني أنزع العباية وما يرجع هم هاي سهلة تنزع العباية مو صعبة مو مشكلة مو أنه عبايتنه ، عبايتي هي عباية العراق كل ما يخدم العراق سويه بس مو تخدم نفسك مثلاً : يتكلمون ضد العراق يتكلمون ضد الرسول يتكلمون ضد الأئمة يتكلمون ضد الأولياء محد يختطفهم مجرد أن يتكلمون على قائدهم يختطفون خطأ هذا مو أسلوب
المحاور : أزعجتهم بأتهامك الأخير إلهم بأنهم وراء عمليات الخطف عندك دليل
القائد السيد مقتدى الصدر : هو من همه أنت كلي وآني أكلك أي لو لا
المحاور : أنت كلت عناصر داخل الحشد الشعبي
القائد السيد مقتدى الصدر : آني كلت أذا كانت داخل الحشد ، الحشد يجب أن يكون ناصعاً نظيفاً فأذا كانوا مختطفون من داخلهم يجب أن يعاقبوا ويخرجوا من جسم الحشد وأذا كانوا من الخارج هذا امر آخر بس هي المشكلة اذا كانوا من الحشد كل الأطراف أتخاف أجيبهم
المحاور : لازم أنت هسه أحد الأشخاص ذاك اليوم أيكول عليك سيد مقتدى الصدر ما يتبع الأساليب ، المعهود عدنه بالسياسة
القائد السيد مقتدى الصدر : الالتوائية
المحاور : رأساً ينطيها أنت هسه أتكول مجرد أنه حجوا على قائدهم أجوا وخطفوهم
القائد السيد مقتدى الصدر : هاي أهوايه مو خطفوا واحد
المحاور : لا بس هاي الأخيرة أمبينه واضحة
القائد السيد مقتدى الصدر : لا مو فقط الأخيرة والكبلهه والكبلهه أهوايه إلها شواهد ويدعمون الفساد الذي فيهم مثلاً : وزير الدفاع مو منهم فسحبوا الثقة عنه وزيرة الصحة منهم ، روح شوف المستشفيات أتبجي قسماً بالله العلي العظيم أتبجي مو انكشفت الى آخر حادثة أولت البارحة واضحة باكوا كلاب المستشفى هاي المستشفيات أتروح أتودي الوزيرة أتوديلهه هدية لأنها صالحة وليست فاسدة أقلها أذا مو فاسدة فهي مقصرة قاصرة ابعد أنت أتريد تخدم شعبك لو أتريد تخدم وزيرتك
المحاور : ما رضيت عن صورة ذهاب قيادات الحشد للوزيرة بعد الاستجواب
القائد السيد مقتدى الصدر : حرام وممنوع وباطل بس لأنه مقتدى كال سحب الثقة أيروحون أيودون هدية مو حباً بيهه كرهاً مثلى
المحاور : لو باقي وي التحالف الوطني ومبقي كتلة الأحرار كان ممكن أيصير استجواب وتنتهي هاي المعاناة
القائد السيد مقتدى الصدر : أشحصلوا أشو كلهه صولة جرذان وصولة فإران وحنه بالتحالف أشحصلنه من التحالف ما حصلنه شي ولم نحصل على شي ولا يحصل الشعب العراقي من أي تحالف
المحاور : عليمن هاي الصولات
القائد السيد مقتدى الصدر : شنو وين جنت انت بره
المحاور : لا أربد أسمع من عدك مو انت اتكول هاي الصولات كلها
القائد السيد مقتدى الصدر : جا هاي السنين أحنه آل الصدر أتعلمنه من الشهيد الأول جبناها لهنانه ياهو أيريد يكبر يكبر أبراسنه ويكفخ بينه اتعلمنه عليه مو شي جديد
المحاور : أنتم متحملين هسه عبالي صولات جديدة وما ادري بيهه أدري بصولة 2008 ...
القائد السيد مقتدى الصدر : كل ما تقترب الانتخابات وين يجون على الاكثر شعبية على الاكثر اصواتاُ يقمعوهم ايشوهون سمعتهم حتى يأخذون اللكمة منهم كل كا تقترب الانتخابات انا اتوقع صدام مع التيار الصدري بس ان شاء الله بالحكمة والموعظة ندعو إلى كم هاي الفتن
المحاور : أنت أتحدثت عن ما اتكملت قضية بياناتك الاخيرة كمت أكو بي نوع من الهجومية على الحشد الشعبي أتخاف من قدومهم العسكري
القائد السيد مقتدى الصدر : الغير منضبطين في الحشد الشعبي
المحاور : أتخاف من قوتهم العسكرية أو تستفاد منهم سياسياً
القائد السيد مقتدى الصدر : أنا لا أتجرء ولن أجرء على أن أتكلم على مجاهد حقيقي وحسن ومحب لوطنه ومحب لدينه ومحب لعقيدته ومحب لإراضيه ، أنا أتكلم على الأفراد الغير منضبطين حتى يكون الحشد الشعبي ذا سمعة ناصعة وطيبة أمام الجميع
المحاور : راح أيكون السلاح المسيطر عليه بعد القضاء على داعش
القائد السيد مقتدى الصدر : لا صعبة جداً وخصوصاً مع وجود الغير منضبطين ولذلك أني خطيت بالشتوية مع رئيس الوزراء على أنه المنضبطين يجب أن يلتحقوا بالجيش والشرطة أذا أرادوا أو أذا وجدنا مصلحة وغير المنضبطين يبعدوا والوسط الذي هو غير منضبط ولا ماخذ ما عنده خبرة بس هو منضبط تفتج إله مؤسسات مدنية خدمية كذا يعمل بيهه يجب ألا يهمشوا بعد تحرير الاراضي العراقية المغتصبة
المحاور : ما جبت قانون الحشد الشعبي لأنه انت مو معاهم
القائد السيد مقتدى الصدر : ما مطلع عليه حقيقة ما مطلع عليه آني قد دزيت إلهم مقترحات وسلمتهه الى الرئاسات الثلاثة ولرئاسة الحشد وكلهه على أهم شي على أن يكون السلاح بيد الدولة وعلى أن لا يتدخل المجاهد بالسياسة
المحاور : يعني ما جاي تتحدث أنت أتكول يندمجون أذن أنت مو مع وجودهم كهيئة أو كتشكيل
القائد السيد مقتدى الصدر : أفضل ،أفضل يدمج ويكون الماسك للأرض بالتحرير ومسك الأرض هو الجيش العراقي والقوات الأمنية حصراً ، لا يكون السلاح بيد غير الجيش والقوات الأمنية لمحاور :خل نستفاد من الدقائق الأخيرة وأكو محور مهم بالقضية عودة الأمريكان أن كان عن طريق ما يسمى بالمصطلح السياسي ،الاحتلال البارد عن طريق شركات أمنية أو أقتصادية أو حتى عن وجود الجنود الامريكان بقواعد معينة ؟
القائد السيد مقتدى الصدر : لا بارد لا حار لا أمكاسر كله محتل أي تدخل مرفوض وآنا
سيكون لي قرار آخر في حال أذا وافقت الحكومة العراقية على دخول الامريكان لمسك الأرض في الموصل أو غيرها هذا يكون قرار حاسم
المحاور : واصلك هيج أخبار عن مسك الارض ؟
القائد السيد مقتدى الصدر : ما سامع ولكن لو على فرض سؤالك صحيح أنا سيكون لي قرار حازم ضد الدولة
المحاور : شنو شكل هذا القرار ؟
القائد السيد مقتدى الصدر : أتخذه لاحقاً وأن شاء الله أتحصلون على نسخة منه بس آني ما أضن حسب إلي فهمته من رئيس الوزراء ما كو هيج شي
المحاور : بس العقد وقع هسه ابسط شي ابطريق الرمادي الدولي طريق الانبار وقع مع شركة امنية لمسك الطريق استثمار وتأمين وحماية يعني اكو شيء واقع ؟
القائد السيد مقتدى الصدر: انا لحد الآن ما اتصور ان هذا قرار صحيح بس اذا كان قرار صحيح فهم محتلون ولنا حق استهدافهم بالطريقة الي نراها صالحة
المحاور : يعني استهدافهم عسكريا ؟
القائد السيد مقتدى الصدر: اي طبعا تدري بينا احنه كيانه مقاوم ولن نتخلى عن ذلك واستقلال العراق هو اول شيء ندعوا له
المحاور : راح تحرجون رئيس الوزراء الي انتم داعميه وهو المسؤول عن رسم سياسة البلد ؟
القائد السيد مقتدى الصدر: مو مشكلة خليه ينحرج شكوا بيهه لأن هذا خط احمر مهم
المحاور : بوجود الامريكي ؟
القائد السيد مقتدى الصدر: خو قبل أحنه الحكومات هم موافقة النه وجنا نقاوم وما تركنا المقاومة نحن في ظلف الحكومة ومو بظلف الحكومة نقاوم
المحاور : جيد ، عندك تخوف بالمجمل من مشروع مرحلة ما بعد داعش ممكن يكون المشروع التخوف من الفكر الي فرخه داعش وراح ....
القائد السيد مقتدى الصدر: السلاح الا يتحكم السلاح في الشعب العراقي وان لا نتدخل في شؤون الآخرين وان لا نزج شبابنا في محارق من هنا وهناك ، حررنا العراق نمسك العراق نبني العراق انحاول انحسن الوضع الخدمي والامني ما النه علاقة بشؤون الاخرين نحمي حدودنا هذا صحيح اما انه الالاف الناس اتروح محرقة في سياسات مجهولة انه هذا لا افضله بل هو اذا مو ممنوع فحرام
المحاور : عندك مشروع لمواجهة الفكر الي قلنا راح يترك في هذه المناطق فكر داعش يعني ثلاث سنوات داعش في مناطق عراقية
القائد السيد مقتدى الصدر: موجود مشروع ما بعد الموصل بيها نقطتين او
اكثر على انه يجب هناك ان يكون تثقيف ومداومة وتعليم وكذا هذا الفكر مو سهل ينزال
قد يكون الشخص ينزال بس الفكر مو سهلة ينزال يرادله اشهر بل سنين
المحاور : راح ايرافقه ايضا مشروعك الخدمي الي احنا بالبداية ما اعرف ....
القائد السيد مقتدى الصدر: من ضمنه كان تقريبا اربعين الى خمسين نقطة من ضمنه ثقافي من ضمنه خدمي من ضمنه انساني من ضمنه عشائري من ضمنه سياسي
المحاور : جيد ، مشاريعك بخصوص المراحل بمستقبل العراق كثيرة لكن التعاطي معاها ما كان مستوى على الاقل ألي أنتم تتمنوه ، مواقفك السياسية وتحريكك للشارع تجاه القوى السياسية اثر على التعاطي مع هذه المشاريع ؟
القائد السيد مقتدى الصدر: كتلك اثر شي واحد انه الشعب كام ايميز بين الفاسد ومن الصالح ويدعم الصالح ولا يدعم الفاسد
المحاور : بس كثرة طرح مشاريع من دون تنفيذ يطرح ثقله على وجودك وتأثيراتك
القائد السيد مقتدى الصدر: نعم المستشارين ايكلولي لا تطرح لأن اذا ما نجح هاي كسرة بيك اني المهم على ان يكون شي مستقبلي استراتيجي لعله يستفادون منه في المستقبل ما يستفاد منه الآن بس مقتدى كال واعطى رأيه بالأخير انوصيهم فد اشياء سلبية اني يمي امام الله وامام شعبي اني كلت انتهى اما هم ما سمعوا ما طاعوا ما راد الشعب هذا امر آخر
المحاور : بس خل نوكف عند قضية المستشارين ،معقولة انت عندك مستشارين ايكولون ما ادري تأخذ رأيك الوحدك ؟
القائد السيد مقتدى الصدر: ليش آني اخوف شنو شويه اعنودي صحيح بس مو معناتها مو استشاري ، استشير والقرار النهائي ألي
المحاور : هس هاي اتريد تستفزني بيها حتى اكولك أي اتخوف طبعا شلون يعني مثلا
القائد السيد مقتدى الصدر: لا اكو مستشارين بس مو معناتها دائما ايكون استشارتهم صحيحة او دائما ايكون قراري صحيح مرة همه مره احنه مرة كذا ويطلع نتيجة ممحصة وجيدة لخدمة الشعب العراقي

لمحاور : جيد الآن ما بقى عندي وقت أريد الختام يكون يمك وأريد أسمع منك كلمة للإعلام العراقي ودوره على أنه أنت بالبداية كلت أنه بعض الاشكالات عليه والبعض النقاط السلبية على الإعلام
القائد السيد مقتدى الصدر : لا يتوخى المصداقية ، يتوخى يعني صدق الخبر من كذبه ، آني الآن كاعد أبيتي ، كال مقتدى أو حجه مقتدى هذا غيري مو بس آني وآني أصلاً ما حاجي بيهه ولا كايله تكدر أتشيل تلفون وتخابر وتتأكد من مصداقية ، مو معناته أذا وكالة خبرية أجنبية نقلت الخبر فأن تكون تنقل الخبر وأذا ما نقلته فمصداقيتك الإعلامية أنزالت لا ما كو هيج شي ، المهم توخى الخبر ، المهم أنه أذا أتريدون شي مننا تتأكدون من صحته من كذبه هم أحنه مفتوحة أبوابنا وسألونا وحنه أنكلكم ، أي أو لا ، هذا إلي أريد ، أيكون تعاون ما بين الشعب وما بين الأعلام يعرف شنو معاناة الشعب شنو معاناة الآخر فيحلها
المحاور : ما أعرف أذا بعد عندك كلمة أتريد أتضيفها ؟
القائد السيد مقتدى الصدر : سلامي للإعلاميين العراقيين وأطالب بحمايتهم وأطالب بأن يكونون لهم الحرية في أبداء الرأي وأبداء الخبر لكن مع مصداقيته فقط لا أكثر
المحاور : الزعيم العراقي السيد مقتدى الصدر شكراً لك وشكراً للوقت إلي أعطيتنه أياه
القائد السيد مقتدى الصدر : ممنون شكراً لكم