يا حسين العصر ردت عليك اطفوف ***وسيوف ورماح عليك ملتمه
رادو تنذبح شافوك نور الله ***والنسخه الوحيده التشبه اليمه
ظنهم لو طحت درب الفضيله ايموت ***ما يدرون كله امسجل بأسمه
لأن مثل الصدر تدعى الرجال ارجال ***مو كل الرجال ارجال تتسمى
تاهو بالظلام وانته كلك نور***والتاه بطريقه ايدور النجمه
وبالكوفه الشمس شوفتها ترس العين ***والخفاش راح يعاشر الظلمه
اوصفه بيا وصف والكمر انا ادريه ***يشعر بالنقص لو عاين الرسمه
بعد كلمة حبيبي اتطوف فوك الناس ***لشفاف اليتامى توزع البسمه
معقوله اصدك ميت وكل يوم ***بالمحسن اشوفه ويشهد الحكمه
معقوله الله كاتب عده كل حسين ***لا بد ينذبح من يصلح الأمه
لكن صدكت لمن شفت الاسلام ***عطشان ورواه الصدر من دمه
يا نور الرسول وعطر داحي الباب ***تتمنى الجنان بيوم تشتمه
يا سفان الفضيله الذلل الطوفان ***وابحر للكمال ابزود وبهمه
يا قمة علم والزهد والاخلاق ***والعز والشرف والفخر والحكمه
أظن رب العرش من خلق هذا الكون ***جاب الصدر يمه وفصل القمه
يالمصحي الضماير من سبات النوم ***ومخلي الرجال ابشرف متحزمه
احبك مو بدي جنيت من فركاك ***بس العيون وكحه وما رضت تعمى
عاشك عشك صوفي وعفت كل الناس ***والزاد الصدر والشرب والنسمه
تعدون الايمه اثنعش معصومين ***جنت اتلطعش من احسب اليمه
ما اريد الملامه وخلني احجي اليوم ***كلمه وفسر انته بكيفك الكلمه
بسواده على البياض تآمن الشبان ***بس هذا الامر من يكدر يفهمه
مو قصدي اكلك عالصدر معصوم ***بس بيه اعتقد تتشرف العصمه
اسم الله اعلى جفه وبيه ختم مختوم ***يا جف غير جف الصدر بيه ختمه
من مثل الصدر لم جفه وكت البوس ***لكن ما بخل عاليسأل ولمه
من مثل الصدر بالورع والايمان ***أو يملك صفاته ووكفته وعلمه
جن صرخة وحي والكوفه صارت غار ***انهض يا محمد فزز الأمه
نادى على الصلا والجمعه جف اتصير ***يصفع كل هبل عالكاع ويهدمه
أنهض يا صدر مو هذا وكت النوم ***محتاج العراق تساعده ابهمه
أنهض يا صدر جتنا الليالي السود ***خل مصباح وجهك يكشف الظلمه
نفس الوقعو من راد يغتالوك ***باعو هالعراق وداسو النعمه
يا حيدر علي ترضى العمامه اتطيح ***وانته بأيدك ملبسها هالعمه
يا حوزة علي انغدر صدرالدين ***باجر يا عذر للمصطفى يقدمه
أقسم يا صدر كلمن وكف عاداك ***غلطان ابابوه وخل يرجع الامه
جميلــــــــــــــــــــــــة جداً
بوركت