مدينة الصدرالباسلة

يتكسر ضلع كلما يمسچ سوء
وتصب عيني وتوّن والدمعه تجريهه
عزيزة إنتي اليصيبچ بية أحسه ايصير
وكل ضنكة التمرچ چني أمر بيهه
عمود إنتي الخيمنه وكلنة بيچ انلوذ
نطيح بطيحتچ والغاية تدريهه
مدينة من الصدر شالت أسمهه بزود
أبيــّـــــة بكل وكت ومعذبة طاغيهه
جرت بيهه المصايب مجرى ماي بگاع
ما ذلت لچنهه بقوه تطويهه
من ذاك الوكت ليهسه تنطي أرواح
لجل آل الصدر يسعدهه تفديهه
بغضاً بالصدر چان القصد بالصار
يدرون إنتي عنده الدنيا تسويهه
ويدرونچ جبل متهزچ أكبر ريح
وإليمد إيده ليـــــــــــــــــــچ بقوه تلويهه
أحنة أهل المدينة ونبقى دوم سيوف
نگص راسه اليفكر لحظة يأذيهه
بمحمد وآله أسوة ومو عجيب الصار
إلچ بيهم مثال بعزة گوليهه
تظل هاي المدينة ويالصدر عنوان
يخسه إلي يمسهه بمفخره أحچيهه
آني أبنچ وأحبچ وإنتي أمي ودوم
أظل إعله المدن بالمنزلة أعليهه
صبراً عالجره يَمْ الأصل والطييب
وأدعي تظل آمان والله يحميهه
كلماتي / محمد العَـلوي البغدادي