ياشعلان

ياشعلان
هي قصيدة شعبية خاطب فيها سيد سعيد الصافي شعلان ابو الجون بعد مماته بسنين يطلب منه العودة لمحاربة المحتل كما قد حاربه عندما كان حيا وها هي طواغيت الاحتلال من كل حدب وصوب بقيادة إمريكا تعد العدة للرجوع الى العراق فاين رؤساء العشائر من هذا الاحتلال واين هم من شعلان ؟
ياشعلان
زيح تراب گبرك گوم
بسك ما كفاك النوم يا شعلان
يلباس الخمل والجوخ وعبيدان
يا وسفه لبست الچفن وتغطيت بالتربان
ويا وسفه اطلعت مديون يا ديان
زيح تراب گبرك گوم
بسك ما كفاك النوم يا شعلان
يالطولك منارة ولو حچيت وذان
تاليها لحد ضمك عجيبه شهل الگِصر گصران
يالعيونك لضى من تشيط
وبيهن ما نِفَرْزْ النار والدخان
كرم تنوركم لو شب
لچبود السمه حلگه يمد لسان
واذا لمعت صوانيكم
تضحك معدة الجوعان
وتاليها اطلعت مديون يا ديان
بسك ما كفاك النوم يا شعلان
ريح الگيض يبس ريج دلتكم
وسافه وزنجر الفنجان
وذاك الضيم رد لهلك مثل ما چان
كسرو عود بيرغنه ومهوال العشيره انهان
بسك ما كفاك النوم يا شعلان
شلون تموت واحنا البيك زامطنه
يخناك المنايا ومن يگول تموت
انته ابن الصميده النادبه ذو النون
ومن سمعت بطاريه زاعت كل بطنها الحوت
شلون تموت يا طالوت
يالصدرك درع داوود
يالعابر بحور الموت
يا طالوت
من طگات مگوارك وگع مذهول چم جالوت
يالبظهر النهار ويا العده تلاگيت
لا بوگه ولا بسكوت
عندك بالسوير شهود
ويشهدلك جسر بربوت
يزتات الزلم لو هندس جويريد
ما ينرادلك زاتوت
دنهض يا ثخين الصوت يبن عناد يالما والمك تابوت
يالمخورس حلوگ الدان صيح بصوتك الزلزال يا شعلان
وفزع كل عشايرنه يعالي الشان
بني هاشم بني حچيم وچنانه وعزة وزبيدات
عبس چبشه الجبور بدير والگرعان
جياش وشبل وعبيد
اعاجيب وخزاعل عامر وحسان
ازيرج والخفاجه عبوده وعگيلات
بني لام السواعد منتفج زياد والصفران
الاحلاف وبني طرفه
بني والي بني عبود تميم وغانم وفرطوس والبيضان
بهادل والشويلات بني مالك وطفيله
كعب ودليم اسد وزهيري وحمدان
ركابه والجوابر عيسى والمياح
حِسن شمر بني كنعان
بني زريج وبني عارض وبني سعده
ضفير بدور والسودان
غريري ومنشك وخيگان
بسك ما كفاك النوم يا شعلان
نايم يا جعيد الراي
تحزم بالچفن يا حيد وزيح تراب گبرك گوم
بويه مرجي بكوسر الديوان
مگوارك مغندب ومهضوم
حل وگت الملاگه وساعتك حلت چا المن بعد مضموم
هدله الرسن خل يهذب مهرك لو لجد جيدوم
تدگ دگ صدرك وعيب عليك تثاوب گبال الگوم
نايم يا صگر يا حيف والغربان بربوع العراق تحوم
ياجيثوم
تفز مرعوبه لندن لسه من حلمك تسولف بيك يا جيثوم
بويه يالمابيك شي مذموم
بسك گوم
صار سنين عدنان بشواجيره الفشگ مفطوم
شنهي العطلك لساع ما عندك خبر وعلوم
هاي اهل الروايه السود تگوم تلگه خطارك
مدلها الغلايج گوم
هاي اهل الروايه السود اجتك يا سهيل نجوم
والباعو قضيتنه
يضل عار البعث بكصصهم ليوم الحشر مفطوم
يا رمز الثورة والثوار يا شعلان
بطن الجابتك حره وشريفه وجابت الشجعان
وام الگمطت مثلك يخناگ التفگ والدان
هيهات اعلى رجليها تگمط اهدان
ينسر الليل كافي النوم وكت النوم مو هساع
عند الضيج بيك اطباع خوش اطباع
عرج التوت جدمك من يعض الگاع
تگود الخوف من اذنه وعبد ينصاع
يا صل الحماد الياكل الفولاذ يا لساع
ياشجاّع يارمح الردين چم گلب منك تگطع لاع

قصيدة جميلة لاستنهاض الهمم في رفض المحتل والدعوة الى مقاومته
موفق للنشر

قصيدة رائعه واتمنى من باقي الشعراء الالهام حد الاطاعه لله
والاستقامه بشعرهم ان يكون خالص للمذهب واعداء المذهب
مثل امريكا وبريطانيه واسرائيل شكرا اخي العزيز

قصيدة رائعة في إستنهاض روح المقاومة لدى أبناء العشائر إلا أنها تحتوي على الكثير من الأخطاء الطباعية والإملائية التي تغير من معنى أبياتها فعلى سبيل المثال ( يلكاف الخمر والجوخ وعبيدان) والصحيح هو ( يلبّاس الخمل والجوخ وعبيدان ) وكلها أنواع لأقمشة كانت تلبس في ذلك الحين ، وأيضاً ( هدل الرسن خل يهدل بمهرك لو لثك حيدوم) والصحيح ( هدله الرسن خل يهذب مهرك لو لجد جيدوم) والمعنى اترك لمهرك العنان فإنه حين ينطلق يكون في المقدمة لايسبقه سابق
( كرب تنوركم لو شب لچبود السمه حلگه يمد السان) والصحيح ( كرم تنوركم لو شب لجبد السمه يمد لسان )
(يالمخورس حلوگ الزان صيح بصوتك الزلزال) ، الدان وليس الزان لأن الدان كلمة المعني بها المدفع
( هاي اهل الروايه السود تگوم تلگه خطارك مدلها الغلايج گوم) ،هاي أهل الرواية السود إجتك ياسهيل نجوم ، تگوم تلگه خطارك.....

بسم الله الرحمن الرحيم
احسنت عزيزي وطيب الله انفاسك ، لقد صححت مانوهت اليه فجزاك الله خير الجزاء يااخي في الله