النص المنضد لكلمة راعي الإصلاح السيد مقتدى الصدر اعزه الله اثناء زيارته لبلدية النجف الأشرف .. الاربعاء 22 / 12 / 2021

احسنتم النشر

بسم الله الرحمن الرحيم
وصلى الله على خير خلقه محمد وآله اجمعين
انا جئت اليوم لما وصلني من اخبار سيئة عن هذه المؤسسة، ونحن في النجف الاشرف مدينة امير المؤمنين سلام الله عليه، مدينة الكرامة والعز، مدينة الاسلام، مدينة الاصلاح، وما يصلني من فساد وتلكؤ وقصور وتقصير قد اهمّني كثيرا، وانا مستعد لأن اتلقى كافة الشكاوي بما يخص الفساد منكم ولتطوير عمل هذه المؤسسة، ولابد من وضع حل سريع وناجح لكي تستمر المدينة وتعمل بجد وعمل دؤوب، وما يحدث هنا من قصور وتقصير لابد من المحاسبة ويحتاج الى وقفة جادة وسريعة لحل مشاكل الفساد الذي استشرى في هذه المؤسسة، واللي يسكت فهو شيطان اخرس، اللي يسكت عن الفساد شيطان اخرس، فمنا وغادي أي واحد عنده ملف فساد عنده ملف قصور تقصير يوصلنياه حتى نتصرف احنا ونوصله الى مراتب عليا بالدولة لتقوم بواجبها، اذا ما قامت بواجبها ذاك الوكت نعرف المن نحاسب، نحاسب الرؤوس الجبيرة مو الزغيرة، هاي النجف الاشرف، عيب فشلة من توصل اخبار فساد وافساد في هذه المحافظة.
حتى المحافظ راح نعمل على اقالته وتبديله، ماكو داعي الى حرك اطارات والى شغب والى كذا، بطرق سياسية وبطرق دبلوماسية وبطرق قانونية، كافي ضوضاء وكافي شغب هاي مدينة المرجعية، مدينة امير المؤمنين قبل ذلك، فعليكم بالالتزام بالإصلاح، مو مقتدى الصدر تعتبروني، تعتبروني مواطن منكم وبيكم، يوصّل ملفات الفساد حتى تنحل، والا هذه كلها المؤسسة راح تتفلش للكاع حبيبي، عيب هذا الحجي بالنجف الاشرف. فأرجو ان تتعاونون ويانا حتى نحل هذه المشاكل باسرع وقت ممكن.
راح اخليلكم منسق اهنا، أي شيء، ما اريد طلبات خاصة ها، اريد طلبات عامة لاصلاح المؤسسة مو لإصلاح بعض المعاملات ومدري كذا، هاي ما اتدخل بيها، هذه آليات وهذه جزئيات ما اتدخل بيها
موظف : سيد عليك بدم محمد الصدر، عليك ابدم اخوتك ، احنه كسبة.....
القائد السيد مقتدى الصدر(اعزه الله): ها ذكّرني، بعدني ما كامل اسكت، أي واحد اهنانه بالتيار الصدري يدّعي انه بالتيار الصدري ويمثلني فهو فاسد، خلوا الحجارة بحلكه حبيبي، ماكو واحد يمثلني ، نهائياً كائنا من كان، كبيرهم وصغيرهم، واضح، تنحل هذه المشاكل، لا تجيبلي مشاكلك الخاصة والكذا، جيبلي مشاكل فساد، جيبلي مشاكل اتحل الامور وتخلي سلاسة بحل المعاملات مال المواطنين، المواطنين اهنا ديوكفون اشهر وسنين اصلا وما تنحل مشاكلهم، فبأسرع وقت ممكن أجيبلكم منسق، تجيبون ملفات الفساد وتجيبون ملفات القصور والتقصير حتى انحلها.. شكراً جزيلاً الكم.