قصيدة. بحق السيد الشهيد محمد الصدر قدس سره.

الملف الشخصي · 26-07-2015, 09:19 PM

تانيني ها يازمن * ومشينه للكوفه
بالكت يمرهه الصدر * بالصدفه ونشوفه
ونحجيله كل الحجي * وسباب هذا البجي
ونكله بعده العمر * ما خلصت اطفوفه
**********************************
ونكله يومك صفه * عاشور ال الصدر
وفوك الوطيه وكع * جم اكبر وجم كمر
ويوميه شام وسبي * وعداك تشتم علي
وعيون خرسه بقت * بالخوف مجتوفه
******************************
جم دمعه عمره الحزن * حتى احسب ايامه
بعيوني يركض سهر* ما وكفت اجدامه
وحنه اعلى جرف الصبر * ونتاني جيت الصدر
لا جابه خيط الفجر * لا مرت اطيوفه
*********************************
مو موت هذا الخذك * اشتاكتلك اهل السمه
وبالجنه جمعه قمت * بحضرة علي وفاطمه
وعل منبر اتخيلك * وخلفك يصلي الملك
ونته بهذاك الجفن * وصفوف مصفوفه
************************************
ضيعنه درب الشمس * ونتاني بس شوفته
يوميه نسجد شكر * نعمه الصدر جيته
يا سيدي وهل وطن * محتاج ذاك الجفن
راية امان وسلم * يرفعه بجفوفه

مصطفى المياحي .