اسلامك عمره ساعة ..

هاي بياوكت ماحاجة للسيف
شوكت صار احتياط ودور ماله
بدون السيف طوعا يصلح الكون
كبل المهدي يامصلح صفاله
كل يوم اليمر طف عدنه وحسين
ترسمه اشلون وتوضح الجراله؟؟؟
ابدال السيف ورده اتخلي مسموح
نحر عبد الله شتخلي ابداله !
ابدال اخيام زينب تشعل ابخور !
وشتكول اطلعت تلعب اطفاله!
غير كلشي ممكن الا عباس
بلا جفين خليه اعله حاله
موعباس هذا السالم ايعود
والبالك ابد ماكو اعله باله
لو ما طاح جفه وباسته الكاع
ماي اوجوهنه ايطيح ابداله
شلون اتريد ترسم عنده جفين!
زينب ما تعرفه بهيج حاله
ماترهم ابد ينجمعن بيوم
عنده اجفوف بس تنسبي اعياله
بعد ياورده هاي اتعوض السيف
وغير الدم منو ايشيل الرساله
اسلامك عمره ساعة ابدون فقار
ومحمد ما سلم حتى بخياله
اولو موجود شيئ ايعوض السيف
جا حيدر ابد ما لحضه شاله .

مصطفى المياحي..