غار وحمامة

ويـن اظمكـم ياليتامـه .. وغار ماعندي وحمامه
محيره ويدي عالخدي .. ولابعد إي خيمة عندي
وغار ماعندي وحمامه
********
جلجل الليل وصفـت يمـي البداية
وانـه ادري بـقصـتي إبـلا نـهاية
وين اخبـيكم واخــبي هــل سباية
وانه ماعندي بقت بس هل عبايه
زغيره ما تكَدر تضمكم 00 إي وحك أصواب عمكم
وجلجـل اللـيل أبظلامه
وغار ماعندي وحمامه
********
عـمـه حـكَم ما ألــوم انـه بجيكـم
حيره يـم نسوان اظلن لـو اجيـكم
صعبـه هـاي الليلة ادريهه عليكم
وشبيدي عالصار عمه وشبيديكم
مـا بـقـى واحــد يجينه 00 والعليل اسمع ونينه
وحسين مجتول وعمامة
وغـار مـاعندي وحمامه
******
حيـره مـدري اشلون نومتكم يعمه
وهذا راس حسين يمكم يجري دمه
انـه ادري اليــوم صارت هيـه لمـه
كـل طفل حـار بركضته وضيع أمـه
منذهل من هل الرزية .. وتركض وياه المنية
وجنهه مــو طـف القيامـة
وغـار مـاعـندي وحمـامة
********
ادري مذهولين من هول المصيبه
خيل تركض والـوكَـع منكم تصيبه
كـل حبيب الـيــوم فاكَـــدلــه حبيبه
مـثل عـاشركــم ولا شفنـه عجيبة
وحشه هاليله عليكم 00 حـيره شيسكت بجيكم
وكل طفل يصعب منامة
وغار ماعندي وحمامة
********
ليلة ادريهـه اشكثـر صعبه علينه
وليهـــل أبـدمـعـته متــنام عــينه
عـمـه وشتنفع بعــد دمعـة بجينه
مـاتــرد حسين الراح مـن اديــنه
عمه ماظنه يجيني .. يل تهيجون ابونيني
وتاكـل ابكَلبي المـلامــة
وغـار مـاعندي وحمامه
*******
مـثل هـاي الليله مامـرت عليه
أشمـــا اسكتـكم تبجـيكم رقـية
وجـرت ياحسين مو نيران بيه
كَابلوهـه وكَلهه تتباجه سـويه
وانكشف ليلي بصباحه .. وما خلص إلا بنياحه
وللفـجـر بانـت عـلامــه
وغار ماعندي وحمامه

بقلم الشاعر/ محمد هاشم الحسناوي