الوفـاء المطــلق

الجميع مطلوب

الى امه

الا

العباس

****

ياهو الجازه امه بكل تعبهه وياه

بس عباس وحده الوفه تربيته

اخر كلمه كال باخر الانفاس

حك ارباج يمه اليوم وفيته

سهرت اعلل خيم كد ما سهرتي اوياي

وخدر زينب يايمه بروحي باريته

ورحت يم النهر هزيته هزت موت

وشلت مايه وشمرته وبيه ذليته

رويتيني بحليبج يمه ما ناسيج

انه التاريخ يمه بدمي رويته

لوليتي اعلصدري وسيفي عالركاب

يمه الجيش كله اينام خليته

وادعني وحضنته بروحي ابو السجاد

مثل حضنج هذاك وذيج حنيته

ولعيونج يايمه وخاف تبجي بيوم

شوف اعيوني فدوه بسهم طفيته

ولجفوفج هذني الدللني هواي

ويه اجفوفي طاح النجم خليته

ولو يايمه اعرفج هسه شتكولين

يمه رباي فدوه حسين وفيته

اريدك تنجرح لكن بدون احساب

الجرح كون اعلطولك يمه سويته

وماريدن فقط بس جسمك المجروح

اريدن حتى ضلك ينجرح ريته

اريدن اليسولف بيك ياعباس

من ذكرك مواقف ينترس بيته

مصطفى الميــاحــي

احسنت شاعرنا المبدع على كلمات الوفاء
لوحة شعرية رسمت لنا كيف ابي الفضل العباس وفى تربية امه الطاهرة
لكي ترفع رأسها امام سيدها ومولاها الامام الحسين عليه السلام

وادعني وحضنته بروحي ابو السجاد

مثل حضنج هذاك وذيج حنيته

الله الله على روعة العطاء
ايها الاخ المتجدد الوفي
يا رحمة الباري
محادثة تسقي الارواح المتصحرة
بين ابواب الحوائج ام البنين وقرة عينها العباس
صلوات الله تعالى وسلامه عليهما

اللهم صل على محمد وال محمد وعجل فرجهم والعن عدوهم
الابداع ليس بالشيء الجديد عليك شاعرنا الغالي مصطفى المياحي
حياك الله على هذه القصيدة المتميزة
اسال الله لك دوام التوفيق

ابا الفضل .. نبع من الوفاء ,وبحر من التضحية
ابدعت واجدت في وصف وفاء قمر بني هاشم
تقبل شكري ومروري..