النص الكامل لكلمة السيد مقتدى الصدر خلال لقائه بكوادر التيار الصدري

النص الكامل والحصري لمنتديات جامع الائمة عليهم السلام لكلمة سماحة السيد القائد مقتدى الصدر خلال لقاءه مع الكوادر المتقدمة من الخط الصدري الشريف
بتاريخ 27\2\ 2011
اعوذ بالله من الشيطان اللعين الرجيم
وصلى الله على محمد واله الطيبين الطاهرين
تحت ظلم الاحتلال وظلم جيوش الظلام لي بعض النقاط اذكرها والقيها على مسامعكم لعلنا نستفيد حبيبي السفينة جاي تمشي تمشي بسرعة لابد ان نمشي ويّه الركب ثلاثة امور في اعناقنا امانة امام الله عز وجل وامام الناس اجمع وامام دماء الشهيدين الصدرين هذه الامانات الثلاثة يجب ان نحافظ عليها
الامانة الاولى الدين والمذهب الامانة الثانية العراق الحبيب الامانة الثالثة وبعتباركم اداريين وقياديين في مكتب السيد الشهيد هذا العنوان العظيم والشريف فيكون المكتب هو الامانة الثالثة التي في اعناقنا والحفاظ عليها بالنسبة لنا واجب مقدس، الحفاظ عليها مو يعني نوگف حمايات حولها لا مو شرط الحفاظ عليها بسمعتنا باخلاقنا بديننا بتصرفاتنا ، واحد من ايحط على راسه لعمامة هم يجب ان يحافظ عليها مو يتصرف تصرفات خاطئة وعلى راسه تاج رسول الله(صل الله عليه واله) وكذلك هذه الامانات الثلاثة يجب عليكم الحفاظ عليها بما اوتيتم من ايمان وبما اوتيتم من اخلاق اني اعرف الجميع جميعكم يمتلك الاخلاق السامية والعالية جميعكم يملك الايمان والدين والحرص والاخلاص لكن لا معنى انّو هاي هيّه انتهت اني مخلص فهاي هيّه اني مؤمن فهاي هيّه لا حبيبي وفوق كل ذي علم عليم ، اتكامل بالخلاص اتكامل بالدين اتكامل بالايمان اتكامل في كل المستويات حتى الادارية وكذا وسأتي بها واحدة بعد الاخرى ، فهذه الامانات الثلاثة انخلّيها اوسمه، اوسمة شرف من اگول اوسمة شرف تره احنه ما معروفين لولا الدين والعراق والمكتب فنحن نتشرف بيهه مو نتشرف بيهه يعني نتعالى واتصير اخشومّنه عالية، لا بالعكس التواضع سمتنه والايمان وكذا وكذا من الامور التي ذكرناها ، اذن نحن العاملون في مكتب السيد الشهيد قدس سره وهذا عنوان ضخم سواءاً اتعقلوه او ما اتعقلوه ما ادري لكنه عنوان مهم جداً كان ولا زال كبيراً، يجب ان يبقى كبيرا يجب ان يبقى كبيرا بالله ابشنو خو مو ابوحده ،لا بيكم يبقى كبيرا فما دام انتو باقين على نهج الشهدين يبقى مكتب السيد الشهيد عاليا والا فلا، فيجب ان يكون كل العاملون في مكتب السيد الشهيد على النهج الصحيح وعلى النهج الحق فانتم ان شاء الله رجال الصدر، رجال الدين، خل انگول رجال الله فعليكم ان تكونوا على قدر المسؤولية، مسؤولية عظمى القيت على عاتقكم موجود اني ما موجود هي هاي مسؤولية ابرگبتكم ترضون ما ترضون هم هي مسؤولية ابرگبتكم، بعد اللي يتصدّه الهذا العمل يجب ان ايخلّي كلشي ابّاله فهذه المسؤولية اذا كانت في رقابكم فحافظوا على هذه المسؤولية ،اني دا اكرّر حافظوا على هذه المسؤولية.
من ضمن الامور اللي منها او بسببها اتگدرون اتحافظون على هذه المسؤولية شنو ان شاء الله احنه كلنه اخوه، صارت اكو خل انسميها تقسيمات للتيار الصدري يعني هيكلة للتيار الصدري اكو قسم مكاتب والمؤسسات الاخرى والهيئات والمراكز والممهدون والمناصرون والكذا والجناح العسكري،الجناح المدني، الجناح الثقافي كلها هذه اجنحة، كلها هذه فروع،كلها هذه مؤسسات،جهة سياسية جهة مو سياسية ثقافية اعلامية اجتماعية لكنها كلها تصب في هدفاً واحد،واياكم والتفرقة مو واحد ايجر يمنه وواحد ايجر يسره،واحد يمشي ليگدام وواحد يمشي ليوره هدفنا واحد فاذن اذا حققنا الهدف الواحد،هسه هو الهدف بعدنه ما واصلينه احنه هدفنا واحد اذا هدفنا واحد نگدر نمشي هي هاي سفينة وتمشي بالبحر واحد ايريدها تمشي يمنه،واحد ايريدها تمشي يسره وواحد يريدهه كذا وكذا، اذا ما نتفق على مشيتها ما ممكن نمشي تره .
يجب ان يكونوا صفاً واحداً لا خلاف ولا اختلاف اني ما اگول لانّي لست مسيطر على القلوب ولست مسيطر على قلوبكم ايضاً لكنه يجب ان تكون قلوبكم قدر الامكان متصافيه في ما بينها نزيل الحقد نزيل الضغينة نزيل التنافس اللا مشروع، اني اركز على هذه النقطة، التنافس اللا مشروع يجب ان يزال،صحيح تنافسوا على درجاتها السيد الشهيد السيد الوالد ايگول بس مو معناتها نتنافس تنافس لا مشروع،التنافس مفتوح ولكنه يجب ان يكون بالطرق الصحيحة فعليه يجب ان يكون بين كل مؤسسة من مؤسسات التيار الصدري تنسيق تام وكامل وحسب القواعد والقرارات والاوامر الادارية ،حتى يمشي بجسم، جسم واحد مو ايد تاخذ يمنه وثانية تاخذ يسره وعين اتباوع مكان ومدري العين الثانية اتباوع مكان، لا ما ننتج نتاج انتوا جاي اتعبون وجاي اتخلصون في عملكم فباقي فد شي واحد وهو التنظيم الاداري والتنظيم اللي بداخل المكتب واتگدرون تمشون مشي سريع ان شاء الله بعون الله تعالى. وعلى العامل،انا احاول اختصر قدر الامكان حتى لا اطيل عليكم، صفات العامل ايضاً مهمة يتحلى بها الذي يعمل في مكتب السيد الشهيد سواءاً كان من داخل الحوزة او من خارجها،كتمان السر،كتمان السر بيه ثواب امام الله سبحانه وتعالى وامام الناس ايضاً، مو كلشي كون احنه مثل غرفة مفتوحة امام الجميع اشتغل،اشتغل اكو امور عامة يجب ان يعلم بها الجميع لكنه اكو اعمال خاصة يجب ان لا يطلع عليها الجميع.
والاخلاص والامانة، الاخلاص اذا كان فيكون هناك امانة، حرص على مكتب السيد الشهيد هو هذا هم امانة، امانة على ممتلكات مكتب السيد الشهيد، مكتب السيد الشهيد من اعني بيه مو معناته اعني جميع الفروع وجميع الملحقات بعنوانه العام. محبة الاخرين من اعمل، اني كاعد وره كرسي وره ميز وره ما ادري شنو، من اعمل خو مو اعمل لاجل نفسي
زين اذا اعمل لاجل نفسي صرنا مثل هاي الحكومات التعبانة اللي جاي توكع وحد ة وره اللخ تعمل لنفسها مشت عليها 30-40سنة لكنها وگعت فاني ما اريد هيج حبيبي اعمل لغيرك وان كان عدوك اعمل للصديق واعمل للعدو، الصديق سيثبت على الهداية والعدو سيهتدي بهداك وبعملك گول لا .
محبة الاخرين حتى لو كان عدوك حبيبي حبه الا ماخرج بدليل، بدون تعدي على الاخرين وبدون تعدي على اسسي، لهم اسس ولهم قواعد يمشون عليها ولي قواعد واسس امشي عليها خلال هذه اجد الروابط والمشتركات بيني وبين الاخرين لأمشي لان احنه مو انريد بس نبني اني كلتلكم الامانات الثلاثه مو بس انريد نبني مكتب السيد الشهيد ، مكتب السيد الشهيد ان شاء الله مبني بانفاس محمد الصدر لكن انريد نبني عراق انريد نبني دين فلازم من التماسك الاسلامي عامه وهذا لايكون ايضا الا صفة اخرى وهي التواضع ويّه التكبر كلشي ما يمشي اذا اني خشمي عالي الكل تنفر مني هم گول لا، بس اللي يتواضع باخلاقا حسنة وحلوة تمشي اموره بالله هسه مدري، المهم ليش حبينه محمد الصدر، اخلاق ، احلى ما فيه اخلاقه غير انصير ناخذ منه شويه شويه حتى يحبنه المجتمع لو اتريد المجتمع ينفر منا ويبتعد عنا نكسب الاخرين ام نبعدهم اذا انريد نكسبهم يجب ان يكون ذلك بالاخلاق بالتواضع إني اوصي امام الله اني حي او ميت اذا ما تتواضعون اموركم ما تمشي اني ما گلت انتو ما متواضعين لعله الكثير بيكم متواضع اني ما ادري امام الله شنو مشيه شنو طريقه الله العالم لكن اني اگول المتواضع خل يبقه متواضع ويزداد في تواضعه والما متواضع خل يتواضع .
امر اخر جدا مهم ولعله هذا اگدر اگول شبه مفقود من التيار الصدري مع شديد الاسف الالتزام بالنظم والقوانين والاوامر والقرارات حسب الهرم من الاعلى فالاسفل ، من الاعلى فالاسفل يعني شنو احسن منك لا مو شرط ن مو لطيفه احچيها لعله چايچي في مكتب السيد الشهيد احسن من مدير مكتب السيد الشهيد نفسه مو شرط لكن كلن يعمل حسب الامر الذي كلف به او القرار الذي كلف به مو شرط يعني اعلى مني مستوى اداري يعني اعلى مني مستوى اخروي لا هذا موشرط ابدا بالعكس لعله الذي يتواضع ويعمل عمل اقل خو لعله احسن ان احچيته واحچيهه مرة لخ وحدة من ميز التيار الصدري عند الاخرين انه نفسه هذا تلگاه مسؤول هيئه مسؤول مكتب تلگاه ورى ثلاث اشهر يعمل عمل اقل من ذلك بمستوى كثير حبيبي وتلگاه وراه باعلى من ذلك بكثير فالذي يحسن يصعد والذي يسيء ينزل هذه صفه حسنه حبيبي لا يستعملهه ضدكم الاعداء ويخلوهه بگلوبكم انه ها احنه يوم نازلين يوم صاعدين، لا هذه جيده جدا، زين نتوسع اكثر (العراق ) يمر بحالة وبمرحله حرجه هسه سياسيا او اجتماعيا او شعبيا هذه تقريبا امور ثانويه لكنها اعني به منعطف صعب من الناحيه الخدميه ينتخب بالحكومات وهو رايح شسويله الحكومات ما اعرف الله العالم، يريد لقمة العيش يريد متطلبات العيش ماء كهرباء خدمات اخرى وقود سلام امان هواي امور ماكو داعي نعيدهه لكن ياترى هذا بس واجب الحكومه بس الحكومه تخدم الشعب مكتب السيد الشهيد الصدر يجب ان يخدم الشعب واني اتصور وخصوصا في الاونة الاخيره الشعب يتطلع الى رايكم يتطلع الى ما ستفعلون وخصوصا السياسين وبعضهم موجودين ويسمعون لا موفقط على السياسيين حتى العمائم حتى اگلك الفراش بمكتب السيد الشهيد هم كون يخدم من اعلى وادنى واوسط يجب ان يعمل الجميع لخدمة الشعب العراقي اتنسقون عمل ويّه مسؤوليكم لخدمة الشعب العراقي احنه بدانا انشكل لجان حتى لتنظيف الشوارع حبيبي اطب للنجف الاشرف تخجل حبيبي من اتشوفهه اطب الكربلاء تخجل اتشوفهه اطب البصره تخجل اتشوفهه اطب بغداد تخجل اتشوفهه من الوساخه اللي بيهه اذا الحكومه ما اتحس احنا هم ما انحس زين انته تگعد تشتكي كهرباء ماكو كهرباء ماكو خو انته هم اسعى الى ايجاد الكهرباء الا بمظاهرات انتظر المظاهرات خو مثلا اجلت ستة اشهر مع انه محد اجلهه لكن اسعى الى ان اتسوي ماء كهرباء اخدم وطنك، بس ارجع واگول يجب ان تكون هذه النقطه بتنسيق وتنظيم تام مو كل واحد راح اخذله اثنين من صحبانه طب على الماي والكهرباء ها ليش ما اتسولنه الماي والكهرباء –لا- عمل منظم سوف نشكل ان شاء الله لجان منكم من الحوزه ومن المكتب للعمل من اجل رفع معاناة الشعب العراقي .
يتبع في الصفحة الثانية

امر اخر يجب ان يكون مكتب السيد الشهيد وافراده من قيادات وعمال في منأى عن الدنيا ومنأى عن حب الدنيا – حب الدنيا راس كل خطيئه- والخطيئة الصغيره اشويه اشويه ... شصير اچـبيره تكبر تتنامى صحيح تتنامى اقل من الحسنه ، الحسنه تتضاعف عشرة امثال لكن السيئة لا تتضاعف لكن بالتالي مثل المرض أي مرض بجسمك ايصير اذا تركته وما التفتتله وما داويته تلـگاه يتفاقم ويتضاعف اما اذا استعملت الدواء الناجع والناجح يقضى وبمشيئة الله يقضى على هذا المرض فــ إحنه انريد نقضي على هذا المرض انه ماندخل الى الدنيا ،الدنيا بحر متلاطم ومفتوح الاطراف اذا تدخله تغرك حبيبي واذا تدخل هذا البحر اشراح ايصير يلهيك عن خدمة الشعب ، يلهيك عن الامانات الثلاث الدين والعراق ومكتب السيد الشهيد، مثل ماگـال السيد الوالد في لقاءه قدس سره مع ائمة الجمعه ولعله موجودين يخليلك مزلق ويخليك على المزلق ويدهنلك المزلق ويكلك لا تزلك ، فهذه الدنيا هيج هيه مزلق ومدهون حبيبي اول ماتخلي رجلك وين تلكه روحك جوه، تعال يعمي وطلعني وانا ما اطلعك.
احدهم : على حب الاسلام والمحافظ على الاسلام وعلى حب السيد القائد مقتدى الصدر والولي المقدس محمد الصدر الصلاة على محمد وال محمد باعلى اصواتكم، اللهم صل على محمد وال محمد وعجل فرجهم والعن عدوهم
السيد : كلكم راعا وكلكم مسوؤلا عن رعيته هذه هم مقوله تثبت ما اقول والا الراعي اذا مايهتم برعيته تنتهي القضية زين وقلنا الهدف واحد فما هو الهدف هو رضا الله سبحانه وتعالى باي الطرق مره بالعباده والعمل الشخصي ومره بالعمل الاجتماعي العام وانشاء الله انتم كليهما تقومون به هم العمل الشخصي والديني والعبادي هذا خو ما اعلمكم بيه انتو احسن مني اكيد من هذه الناحية والعمل العام وباعتباري مسؤول عنكم اعلمكم مو اكثر من ذلك ومسؤول عنكم مويعني احسن منكم لا مو شرط الله العالم، زين اكرر ما دامكم عمال مكتب السيد الشهيد وكلنا عمال من اكبرنا الى اصغرنا فلا بد ان تكونوا قلب واحد وهدف واحد وهو رضا الله سبحانه وتعالى انا دا اكرر هذه المسأله ليش امام الله رب العالمين حتى اسقط ما في ذمتي اللهم اشهد اني بلغت .
زين فلا معنا للخلاف بينكم اكرر فلا معنا للخلاف بينكم أي اثنين فضلا عن الاكثر من ذلك ولو مو لطيفه انمثلكم بشركة من الشركات التجارية او كذائية الها فروع هذه كلها ترجع الى راس واحد ، مره مثال اصغير المكتب داهمو الامريكان واخذو الحاسبات منه، مكتب في فروع من فروع المحافظات قبل، وكلنا المكتب الفلاني في المحافظة الاخرى خلي كمثال، مكتب مثلا نسدت بالعمارة داهموه، ردنه انحولة من الحلة فد ثنين كمبيوترات إله، الوضع المالي مو ازين ها شلون اتحول اثنين كمبيوترات اللي هيه مالتي، من الحله شلون تاخذهه من العماره .
زين احنهه مو واحد مثل ما ديني انا وياك واحد مثل ما هدفي واحد هاي الامور الماديه الي جاي نتمسك بيهه هم هيه وحده اذا الكمبيوتر ابمكتب العماره اشتغل وخدم الشعب ونفس الشي بما كان يخدمهه بالحله هم نفس الشي وهذا مثال زغير وانتو بعد تفهموه وارجو المعذره.
زين احنه سامعين السيد الوالد قدس الله نفسه الزكيه يكول ان رسول الله صلى الله عليه واله من الحوزة الناطقة، كول لا زين واحنه هم من الحوزة الناطقة مو اذن يجب ان نحافظ على سمعة هذه الحوزة الناطقة، مكتب السيد الشهيد انا اعتبره يمثل الحوزة الناطقة الي هيه الام الكبرى حبيبي منه في مكتب السيد الشهيد وسمعة الحوزة الناطقة يجب ان تكون عاليه وانا خصيتهه بعدين بالاخير لان لها اهمية حتى اكبر من مكتب السيد الشهيد فعلى طلبة الحوزة العلمية السير والتكامل العلمي والدروس والالتزام بالدروس الحوزوية، مو مثل ما عموم الناس حبيبي عزفوا عن صلاة الجمعة الي السيد قدم دمه من اجلهه احنه هم نعزف عن شنو، الحوزة العلمية ودروسه إلي السيد الشهيد يكول انا خادم للحوزة العلمية منو منه بالله كال انا خادم للحوزة العلمية؟ !!!
فانت تمثل الحوزة العلمية خصوصا المعممين منكم فيجب ايضا الحفاظ على سمعة الحوزة العلمية فالمعمم راح ايصير شنو دبل تره هم يمثل مكتب السيد الشهيد هم يمثل عنوان الحوزة العلمية اذا جهده يجب ان يكون مضاعف .
نقطة اخيره سواء ائمة الجمع او أي فرد من افرادكم اشوف صاير قللان عن ذكر الاحتلال والتثقيف ضد الاحتلال ،لو لازم بندقيه ويحارب لو جمدناه ويكعد ويسكت زين ماكو فد شي وسط يعني بين هذا وذاك خوب لاتلزم بندقية خصصناهه لغيرك ماشي تكعد بعد لااتذكره بخطبه لا بكتاب لا مدري شنو التثقيف ضد الاحتلال واجب عليكم بالطرق المنطقية حبيبي بالطرق التنظيمية والادارية المحسوبة، محسوبه مئة بالمئة مو اغلط وفشّر هاي هو ما تاكل عدنه تحتاجلهه تنظيم ثقافية واعلامية امرتبه موجوده ان شاء الله الهيئة الثقافية والهيئة الاعلامية، لعله وصل اسماعي انو اكثر من ذلك مو فقط ترك الاحتلال كما صار من جماعات جانوا محسوبين علينه ايكعدون ويّه الاحتلال ارجو ان لا تتكرر هذه الامور نحن عدونا الوحيد هو المحتل الذي لا مجال للتقرب منه اطلاقا هم انا اكولهه امام الله سبحانه وتعالى اللهم اشهد اني قد بلغت حيا كنت او ميتا هذا لا مجال لتقرب منه لا من بعيد ولا من قريب ولا يمكن ان نهديه اكيدا فخلوه بعيد عنا وخلونه ابعاد عنه انّه مو معناه اسكت عنه واكعد اكو طرق ثقافية واعلامية يجب السير عليها لكشف حقائق الاحتلال .
والحمد لله رب العالمين
جزاكم الله خيرا على الاستماع ممنون.

السلام عليكم ورحمة الله وبركاته
شكرا لك على المرور والدعاء ممنون

ابو حمودي العزيز موفق جعلها الله في ميزان حسناتك
موفق بإذن الله ... لك مني أجمل تحية .