النص الكامل للقاء السيد القائد مقتدى الصدر اعزه الله مع قناة الشرقية نيوز في برنامج طبعة محدودة 8 / 7 / 2016

المحاورـ السلام عليكم اهلا ومرحبا بكم اعزائي المشاهدين في حلقة جديدة من برنامج طبعة محدودة ضيف هذه الحلقة سماحة السيد مقتدى الصدر اهلا ومرحبا بك
السيد القائد مقتدى الصدر أعزه الله ـ اهلا وسهلا بك
المحاورـ نشكرك جدا على اتاحة هذه الفرصة سيد
السيد القائد مقتدى الصدر أعزه الله ـ بالخدمة اهلا وسهلا حياكم الله
المحاور ـ في 30 نيسان الماضي اعلنتم اعتكافكم لشهرين احتجاجا او رفضا لعودة المفسدين للمحكمة الاتحادية حديثا حكمت بإعادة الوضع على ما كان عليه فما هو ردكم وما هي الخطوة القادمة
السيد القائد مقتدى الصدر أعزه الله ـ والله الحقيقة كان هذا القرار، قرار المحكمة مستغرب ومستهجن جداً بإعادة الفاسدين الى مناصبهم الوزارية وهذا ان دل على شيء انما يدل على احد امرين اما ان المحكمة لا تعلم بما يدور خلف جُدُر الحكومة ان صح التعبير وخلف الكواليس او انها تقع تحت ضغط من بعض الاطراف والاحزاب المتنفذة في الحكومة وعليه وان كان قيل ان هذا القرار لا تراجع عنهُ ولكنهُ صوت الشعب يجب ان يصل الى القضاء و يجب ان يصل الى المحاكم الشرعية الحكومية في العراق وعليه سنُسمع في المظاهرة القادمة صوتنا الى القضاء ليتراجع عنها قدر الامكان او لأقلها نقول انهُ لا يُقدِم على مثل هذه الخطوات في المستقبل فلا بد على الجميع سواء السلطة التنفيذية او التشريعية او القضائية السماع الى صوت الشعب ومطالبه بإنهاء الفساد، نعم هناك وضع امني متردي نحن نحمي الشعب العراقي في جبهات القتال مع الجيش العراقي البطل وكذلك نحمي الشعب العراقي من الفساد ومن الجهل ومن قلة الخدمات المتردية وما شابه ذلك فيدٌ تقاتل الارهاب ويدٌ تقاتل الفساد.
المحاور ـ طيب بس سماحتكم البعض يأخذ عليكم التغير المفاجئ في المواقف يعني حضرتكم تصديتوا للموجة الضخمة من المتظاهرين وزعمتوها وتصاعد المد الجماهيري اسبوع بعد اسبوع جمعة بعد جمعة لكن في ما بعد حدث هذا التغير المفاجئ ربما تكرر اذا اذكر حضرتك
السيد القائد مقتدى الصدر أعزه الله ـ تقصد الاعتكاف مثلاً
المحاور ـ اذا اريد اذكر حضرتك في مناسبات عدة مثلا في 2011 لما كان هناك مظاهرات في ساحة التحرير وكان هناك حماس كبير وكان هناك نوع من الرجاء للتيار الصدري انه يكون مشارك في هذه التظاهرات فبوقتها ما هي الاسباب التي دعتكم في اخر لحظة مثلا انه تنسحبون من المشاركة وايضا انتم وصفتوا بعض المشاركين بانهم من البعثيين وما شاكل
السيد القائد مقتدى الصدر أعزه الله ـ في حينها تختلف الظروف صحيح كان هناك مشاركين بحيث رفعت صورة صدام وماشابه ذلك، عموماً مو هذه الظروف و انما انا اعطيت مُهلة اتصور 45 يوم وكنت اتوقع انه بعد الــ 45 يوم سيكون هناك رد شعبي اقوى ولم يكن هناك رد شعبي اقوى على الرغم انها استمرت ،بس استمرت بمجاميع صغيرة ثم التحق التيار الصدري فصارت الاعداد كبيرة تدري انه ميزة التيار اكثر ميزة اله هو الاعداد الكبيرة اما تغير المواقف على قسمين اذا صدقَ انه هناك تغير مواقف تغير المواقف حسب الظروف و حسب المعطيات هاي واحد اثنين ليس هناك تغير اصلاً وانما قد يكون انت خلفيات ما عندك عن الموضوع فمتدري انه شنو راح يصير التوجه فأذا مثلا اذا زاد الضغط الشعبي وانه نشوف الناس مستعدة للخروج نأمر بمظاهرات مليونية قد يكون هناك في بعض الاحيان ــ ما ــ نأمر بمظاهرات مليونية او الاعتصام او ما شابه ذلك حسب الظروف المحيطة بالمشروع
المحاور ـ قصدي حساباتكم اختلفت لما تقول تغيرت الظروف
السيد القائد مقتدى الصدر أعزه الله ـ لا، حسابات المجتمع حسابات السياسيين مثلا قضية الاعتصام بالخيمة سواءً، اعتصامي الشخصي او اعتصام الجماهير اللي اعتصموا جراهم الله خير جزاء المحسنين مثلا اعطت الحكومة انه سنُغير ووعود وكذا فأعطيت فرصة للحكومة حتى لا تقول انه احنه ما راح نسوي لأنه انتم كاعدين معتصمين اعطيتهم فرصة ايضا ما أقدمت على مشروع اصلاحي وتراجعت ومرة اخرى هسه بحجج او اخرى سواء ان الحكومة او القضاء تراجع عنها هي كلها تشكل حكومة لأنه السلطة التشريعية والتنفيذية والقضائية هي مجموع الحكومة ونحن نتظاهر على جميع الحكومة وجميع المفاصل الفاسدة فيها فإذا كان هناك تقدم من الحكومة انا شوية اتراجع اذا كان تراجع من الحكومة انا سوف اتقدم وهناك خطوات اخرى سوف نقوم بها ان شاء الله في المستقبل
المحاور ـ هذه راح اجيها لاحقاً بس اذا تسمحلي نأخذ هذا التسلسل التاريخي لأن هذا مهم بالنسبة للناس حتى يفهمون المواقف لحضرتك ، ارجع الى 2011 برأيك لو بوقتها انت حضرتك قلت البعض رافع صور لصدام او كذا لكن الموضوع الاهم انه 2011 لمن ما اشترك التيار الصدري كان اكو اعطاء مهلة جديدة للسيد نوري المالكي ان يحكم والحكم هذا ترتبت عليه تداعيات خطيرة وانت تعرفها والكل يعرفها فقصدي الحسابات هذه ما كانت في بالكم انه احنه بسبب وجود بعض الناس البعثية او المتعاطفين مع صدام حسين واللي غيرهم بس هذا يغنينا عن هدف اكبر واسمى انه احنه نحاول نقطع الطريق على دكتاتورية ناشئة او شي من هذا القبيل
السيد القائد مقتدى الصدر أعزه الله ـ اكيد.. اهم اهدافنا بالمشروع الاصلاحي سواءً 2011 او حتى 2003 او 2016 انه عدم وصول دكتاتور الى الحكم فوصول دكتاتور الى الحكم معناتها سيقع العراق كما وقع في فترة المالكي ثلثينه انباع فقر جوع خوف لا خدمات حتى اللي هو اكثر شيء في العراق مشهور النفط هذا هم راح ولا واردات حتى العالم كله قلة اسعار النفط وقلة كذا و الان العراق مديون وطلب دين وقرض ايضا ولم يكون هناك اي اثر ايجابي لهذا القرض بل سيكون هو مقدمة لبيع العراق و بالتالي يكون مديون الى جميع الدول ولا يستطيع ان يسدد هذه الاموال عموماً احنه دائما نقف ضد مشروع وصول الدكتاتور الى الحكم كان في سابقاً المالكي قلت انه انا اعطيت مهلة للشعب لأنه الحكومة بحينها كالت انه انطونه فرصة فأنا كتلك من تتقدم الحكومة خطوة انا اتراجع خطوة كالت انطونة فرصة انطيناها فرصة ولم تُقدم اي خطوة؟ والمئة يوم خلصت وهكذا، وهكذا والى ان رأيت تجاوب من الشعب ضد الفساد لأنه اني كشخص ما اريد اتصير بوجهي القضية مو لأنه خوفاً حتى لا يقولون هاي ( مقتدائية ) لا يقولون تيارية فحينما خرجوا دعمتهم وحينما واجهوهم خصوصاً الميليشيات انا اسميها الوقحة، بالمتظاهرين وقاموا يطعنوهم بالسكاكين وما شابه ذلك انا مثل ما تكول شالتني الغيرة والحمية عليهم اطلعت وياهم حتى احميهم بعدين صارت قضية فساد مو فقط خدمات انا التحقت بهذا المشروع الي هو انا كنت متبنيه من السابق لكنه دعمت التظاهرات السلمية والتي اكرر يجب ان تبقى سلمية من طرفنه هسه هم يعتدون علينا او ما يعتدون علينا هذا امر اخر لأنه من الممكن دائماً الفاسدين يردون يبقون كرسيهم ويعتدون على اصغر واحد واكبر واحد في البلد
المحاور ـ انتم منهجكم تظل سلمية
السيد القائد مقتدى الصدر أعزه الله ـ المفروض تظل سلمية من طرفنا
المحاور ـ ارجع الى 2011 وبعد 2011ــ 2012 لما صارت اللقاءات في النجف و في اربيل وكان هناك نضوج لفكرة سحب الثقة وايضا الامور وصلت الى حد تصاعدي وَ وصلت للحد الاعلى وايضا حصل نوع من الانسحاب
السيد القائد مقتدى الصدر أعزه الله ـ الله يغفرله مدري الله يرحمه الرئيس طلباني خرب المشروع.
المحاور ـ قصدي انتم ما بقيتوا متمسكين بالموضوع وتماشيتوا مع فكرة التخلي عن سحب الثقة
السيد القائد مقتدى الصدر أعزه الله ـ شوف اني ليش كتلك ما عندك خلفية او ما عند الاخرين خلفية عن ما نقول انه انا قلت كان التيار الصدري عنده 40 كرسي اتصور فإذا وصلتوا الى 134 انا صوتي الاربعين كلَ الكم ما وصلوا الــ 134 وليومنا هذا انتظر لو كان المالكي موجود
المحاور ـ انت هم كررتها كلت اذا وصلو بالجديد
السيد القائد مقتدى الصدر أعزه الله ـ الان... هم نفس الشي في اقالة الرئاسات الثلاثة اذا وصلو الى العدد بحيث انا اللي يتوقف عليه ايضاً اعطيه وليومنا هذا
المحاور ـ بس في وقتها صار لقاء بينك وبين السيد المالكي اعتقد في طهران
السيد القائد مقتدى الصدر أعزه الله ـ بعد سحب الثقة
المحاور ـ لا
السيد القائد مقتدى الصدر أعزه الله ـ قبل سحب الثقة
المحاور ـ وعلى اثرها...
السيد القائد مقتدى الصدر أعزه الله ـ قبل يوم من ذهابي الى اربيل بالضبط و اني كتله رايح لاربيل كلي لتروح تشوه سمعتك وتتأذى ومدري شنو كتله اني راح اروح هم اخوانه وشركائنا في البلد كانوا وذهبت الهم لأسمع، كان اللقاء الاول ولعلهُ لحد الان الاخير خصوصاً مع الاخ مسعود سمعت وجهت نظرهم وسمعوا وجهت نظري وتوصلنا على انهُ اذا المالكي لم يقوم بواجبه نسحب الثقة منه حتى كتلهم اني شيعي او راح اسحب الثقة من واحد يدعي انه حكومته شيعية مع انه انتم خايفين كان الرئيس جلال الطلباني شويه خايف من مشروع سحب الثقة هسه لأسبابَه الخاصة بيه المهم ما صارت سحب الثقة لحد الان لأنه ما وصلوا الى 134 كرسي في حينها لو وصلوا لنتهى الامر ولما كان حدث ما حدث لا كانوا الدواعش لا كان الانبار لا كان الموصل لا كان الجوع انا اكلك لو ناجح مشروع سحب الثقة. لكن عدم الوصول الى 134 هو المشكلة حتى لو اني دخلت بالاربعين كرسي السابق هم ما جان وصلنا الى سحب الثقة لأنه هم يبقى العدد ناقص فلو اكتمل بي للتحقت بهم الى يومنا هذا.
المحاور ـ طيب نجي للاعتصام الاخير اللي حضرتك لما اجيت او قدت الجماهير بنفسك و حضرتك اتذكر القيت كلمة في وقتها او لمحت في هذه الكلمة الى هناك من يستهدفك او يهدد امنك الشخصي من كان وراء هذا التهديد
السيد القائد مقتدى الصدر أعزه الله ـ مفخخة هنا بالحنانة صارت وعندما خرجت من المظاهرة الاولى اني اللي حضرتها في ساحة التحرير والقيت كلمة، بالخروج هم ايضا الموكب هم تعرض الى محاولة اغتيال ان جاز التعبير ما صارت بيه بس نكلبت سيارة كدامي السيارة المقابيلي سيارة كبيرة كلبتها
المحاور ـ من يقف وراء ذلك برائيك
السيد القائد مقتدى الصدر أعزه الله ـ ما اكدر اكلك صريحاً لأنه ليش اخذ بالظن والتهمة بس كثير من المفسدين يتمنون زوالي، حتى لا اقود هذا المشروع الاصلاحي
المحاور ـ طيب من اجتازيت ودخلت الى المنطقة الخضراء و مكثت فيها الخيمة
السيد القائد مقتدى الصدر أعزه الله ـ مال الاعتصام، نعم
المحاور ـ اريد اعرف هاي الفترة هاي الايام انت كنت بعزم قوي انه راح تبقه اريد اعرف من حضرتك انه في ذيج الفترة نوع الاتصالات اللي صارت هل هناك صار نوع من التفاوض ما اريد اسميها مساومات او صفقات
السيد القائد مقتدى الصدر أعزه الله ـ لا، تفاوض ماكو حقيقي بس كتلك هو هذا على اساس انه جلسة البرلمان التي عُقدت اثناء وجودي في الخيمة الخضراء اني اسميها في المنطقة الخضراء على اساس انه راح يكون هناك خمسة الى سبع وزراء يتم اقالتهم وهي المرحلة الاولى وخلال اسبوعين القادمين يتم تغير البقية اتفق العبادي على هذا واعطى كلمة، نقض فريق من اهل الفساد
المحاور ـ بس قبل هذه هناك من يقول انه هناك تدخل غير عراقي هناك تدخل يمكن للسيد سليماني كان معترض على المظاهرات او يمكن ابدى انزعاجه
السيد القائد مقتدى الصدر أعزه الله ـ لا، لا اني حقيقة سمعت منه انه كال هذه المظاهرات لا تحزني ولا تفرحني ما معناتها شأن داخلي
المحاور ـ هذا الكلام موجه الكم
السيد القائد مقتدى الصدر أعزه الله ـ هذا الكلام موجه الي بالنص هاي كالها وانا افرحتني هذه الكلمة هسه لا يتدخلون بعد لا سلبا و لا ايجابا وحياديتهم كافية وحيادية امريكا ايضا هم كانت كافية هذه فادتني لا وقفت ضدي ولا وقفت معي والمجتمع الدولي كله لم يكن لا مع ولا ضد ساكت وهذا جدا فاد المظاهرات و فاد الشعب لو امريكا او ايران وقفت بالضد لكانت مشاكل هواي اكثر
المحاور ـ مو.. هو سيدنا بسبب ذلك الغمض بتلك الفترة يصير تسرب بعض التقارير والتحليلات فهناك من قال انه في تلك الفترة كان هناك انزعاج ايراني من هذا الموضوع واشبه بالقطيعة بينك وبين سليماني الامر الذي ادى الى تدخل السيد حسن نصر الله في الموضوع فهل هناك تدخل من هذا النوع
السيد القائد مقتدى الصدر أعزه الله ـ لا، عندما ذهبت في الاسبوع او العشرة ايام بلقاء العائلة في لبنان صاروا على انه اني كعدت وي السيد حسن نصر الله ـ لاـ لم يكن هناك جلسة اصلاً
المحاور ـ او ما حدث انه ادخل
السيد القائد مقتدى الصدر أعزه الله ـ ابداً ولا جابلها طاري وهو يعرف رأيي و ما يدخل يدري بيه عنودي وما يدخل
المحاور ـ طيب بــ 2008 ايضا ما دخل لما كان هناك اكو اشتباك مع السيد المالكي
السيد القائد مقتدى الصدر أعزه الله ـ تدخل مرة وحدة السيد حسن نصر الله اتذكر بالانتفاضة الاولى ضد الامريكان من شويه اشتد الوطئ علينا من الامريكان خابر كال اذا تريد نتوسط للحكومة للكذا كتله لا شكراً ما محتاجين شيء
المحاور ـ بس عموماً ماكو تدخل
السيد القائد مقتدى الصدر أعزه الله ـ اي تدخل اخر للسيد حسن نصر الله ــ الله يحفظه ــ ماكو
المحاور ـ طيب في بيروت ما صار هناك لقاء مع السيد المالكي
سماحة السيد القائد مقتدى الصدرأعزه الله ـ أشتدري بيه اني أشوف المالكي لا ابداً ماكو هيج
المحاور ـ لا ... اسألك عن بعض اللقاءات
سماحة السيد القائد مقتدى الصدرأعزه الله ـ أي نعم، نعم اخير لقاء كان قبل اربيل فقط
المحاور ـ اللي في طهران
سماحة السيد القائد مقتدى الصدرأعزه الله ـ اللي في طهران أحسنت
المحاور ـ او ما صارت بعدها أي تبادل في الرسائل
سماحة السيد القائد مقتدى الصدرأعزه الله ـ نهائياً هو حاول أني ما أكلك حاول لكني انا رفضت
المحاور ـ يعني هناك بعض التقارير
سماحة السيد القائد مقتدى الصدرأعزه الله ـ أنت لا أتخاف صريح آني
المحاور ـ لا، لا مو آني دا أطرحلك الاشياء اللي تقال بس اتواجهني بالنفي ولهذا دا أجاوزها
سماحة السيد القائد مقتدى الصدرأعزه الله ـ أكلك أي لو صحيحة من هاي الناحية ما أجامل
المحاور ـ طيب أني ردت أسألك على نية المشاركة القوية بالتظاهر بهذا الثقل هناك من يقول أن هناك دافع قوي لهذه المشاركة
سماحة السيد القائد مقتدى الصدرأعزه الله ـ باللغة العامية اكلك أياها مصخت شوهت سمعة المذهب كثير بعد وأشوهت سمعة العراق كثير بعد ما أتحملت كتلك أني طكيت بعد ما أتحملت اصبرت هسه يتحسنون هسه ايعوفون الفساد هسه يدارون المجتمع هسه يدارون المواطن هسه أو هسه واليوم أو باجر أو عكبة ما بيها مجال فأول ما أجيت يا تيار الصدري أكعد و أسكت تكتر بعد حتى أبلش بالغير التيارين أول ما بدءت تلث خطوات خطوة داخل التيار أصلاً مو للسياسيين مكافحة الفساد سميتها شكو واحد مفسد سارق معتدي كذا... بديت بسياسي التيار كلتلهم أكعدوا بعدين من طكت روحي بعدين بلشت كلتلهم بالفساد العام بعد أحنه نصلح التيار والحكومة فاسدة ما ينصلح مستحيل وأن كان نحن في غابة السياسة عبارة عن غابة أما أن تؤكل وأما أن تأكل فلذلك هسه شنو صار أستهداف للتيار الصدري كاموا أيطلعوه كتلة الأحرار خل أنسميها يطلعوهم من كل المفاصل على اساس يابه شنو هذا على اساس هذا أصلاح أني قبل كم يوم كلّي راح أقبل أستقالات، الأخ حيدر العبادي كال راح أقبل أستقالات بعض الوزراء اللي قدموها فتقبل كتلة الأحرار كتله، كتلة الأحرار هي حرة في حد ذاتها لكن أن تستهدف كتلة الأحرار لسمعتك مو زينه راح أيصير كأنما أستهداف لجهة كتله أكو أطراف أخرى أيضاً ووزراء أخرين أمقدمين أستقالات أقبل هاي ألاستقالات و أقبل هاي ألاستقالات أو الله أو محمد أو علي وياك ماكو مشكلة
المحاور ـ بس هو صحيح من أيريد أيقيل يسألك أنه تقبل لو ما تقبل كرئيس وزراء
سماحة السيد القائد مقتدى الصدرأعزه الله ـ لا.. هو مو هيج تقبل او ما تقبل يعني تنسيق أستشارة كذا شكو بيها أحسن من ذاك اللي كان حتى لو أذا راد أستشارة يكلبها بالمكلوب لا بأس رئيس الوزراء يسمع أستشارات شركائه هذا من اللطيف وليس من المعيب
المحاور ـ أني ردت أوصل الى نقطة أنه هاي المشاركة الفاعلة بالتظاهرات هي بسبب حدوث نوع من الصراع الشيعي، الشيعي
سماحة السيد القائد مقتدى الصدرأعزه الله ـ هذا ما يُقال
المحاور ـ ما تشعر أنه صار نوع من التزاحم
سماحة السيد القائد مقتدى الصدرأعزه الله ـ أنا سأقف ضد أي صراع سواءً شيعي شيعي أو سني شيعي أو سني سني أو شيعي يهودي أو أي طائفة من الطوائف الموجودة في العراق ما أقبل أي صِدام نحن لا نعتدي على أحد أذا أعتدي علينا كثوار وكطالبين للأصلاح أهلاً وسهلاً أحنه هذا مشروع يحتاج الى دماء ما أكلك لا، بس أنه أحنه نعتدي على أحد كلا وألف كلا وأي واحد يعتدي على أي جهة أخرى أنا أرفضه حتى هذا الأعتداء اللي صار بالبرلمان حينما دخلوا البرلمان صار اعتداء على أشخاص ما كنت أتمنى أيكون بهذه الألية أني كنت أتمنى أيشيلوهم سلماً يذبوهم أبصطل الزبالة أي ميخالف بس أنه يضربون لا ما اقبل
المحاور ـ يعني جنت اتريدهم يدخلون
سماحة السيد القائد مقتدى الصدر أعزه الله ـ ما اريدهم يدخلون اريدهم يقومون بما يروه مصلحة
المحاور ـ هذا اللي ذكرته
سماحة السيد القائد مقتدى الصدرأعزه الله ـ سواء يرون الدخول او عدم الدخول انا مع الشعب انا مع الشعب التونسي انا مع الشعب المصري انا مع الشعب السوري انا مع الشعب البحريني انا مع الشعب مع الشعوب دوماً ومتعاطف معهم فكيف لا اكون مع الشعب العراقي في ردت فعله العفوية اي ردت فعل عفوية لايمكن ان تنعت انه هاي بعثية او وهابية او داعشية او عنفية بعد الشعب محترك وهذه اليومين اتلاثة بالكرادة هم احركتوا كلوبهم بعد اكثر والحكومة كاعدة وساكتة ولم تحقق بالموضوع اصلاً وكأن شيئٌ لم يكن والدماء تجري، على كولتهم واحد يقتل في مشارق الارض تنزل البيانات ترف وهذولة بـ (300 ) واحد راحوا ولا بيان هيجي ولا كأنما وهكذا، فكلوبهم محروكة فلازم اتصير هاي ردت الفعل الى متى يعني يطك، يطك.. الشعب
المحاور ـ بس سماحتك انت يعني وتيارك مشاركين في الحكومة منذ البداية من 2003 ولحد الان والتظاهرات الاخيرة يعني بدأت يمكن في تموز 2015 الموجة الاخيرة من التظاهرات وتياركم اشترك بيها في 18 آذار 2016 قصدي هاي الفترة انت ولو قبل اشوية كلت انا كنت انتظر لكن مثل هاي الفترة بشكل...
سماحة السيد القائد مقتدى الصدرأعزه الله ـ ايد وحدة ما تصفك
المحاور ـ بس هذه ماتعني انه انتوا راضين عما يجري
سماحة السيد القائد مقتدى الصدرأعزه الله ـ اما في زمن المالكي تصل المشاريع الى النهاية يوقفها على توقيع واحد يعني حتى لو نريد انسوي شيء مانكدر يعني بالاحرى كلمن موجود في الحكومة ( طرطور ) احجيلكياها باللغة الدارجة مايكدر ايقدم خطوة واحدة الشيء الثاني السيستم كله فاسد وين ماتريد تصلح وين ماتريد اسوي مشروع ماتكدر يعني اذا تريد تبنيلك مو عمارة او شارع جبير بالكيلو مترات لا، تريد تبنيلك شيء بسيط هو ينباك اتلث ارباعه ماممكن يعني السيستم كله النظام كله القانون كله الدستور كله مبني على خطأ فمو ممكن ان تقدم وانت في الحكومة لكن كنا نحاول لامرين اولاً كن فيهم ولاتكن منهم اثنين عسى ان نصلح في داخل هذه القضية عسى ان نكون مصلحين مااستطعنا كتلهم تكتروا، او يا بقية هم تتكترون المفروض ولذلك بدأت ببهاء الاعرجي وعزلته على الرغم من انه انا اهنانه حاطه اتلث اشهر ماقدموا عليه شكوى واحدة
المحاور ـ راح ارجعله... بس ارجع على دخول البرلمان انت حضرتك يعني لما خيرت الجماهير وانت تعرف وجهة الجماهير وين مو صحيح
سماحة السيد القائد مقتدى الصدرأعزه الله ـ والله ماجنت اتوقع غير الصدك
المحاور ـ انت هسة كبل اشوية مو كلت انا اريدهم جان يدخلون
سماحة السيد القائد مقتدى الصدرأعزه الله ـ ماجنت اتوقع يدخلون بس من دخلوا انا متعاطف معهم
المحاورـ طيب يعني ماكان هناك فد شيء بداخلك يعني يمنع هذا الشيء لانه هذا الدخول الى مؤسسة تشريعية يعني هي المؤسسة الوحيدة
سماحة السيد القائد مقتدى الصدرأعزه الله ـ هي وينها جيبلياها وراوينياها حتى ادعمها ماهي اصلاً ان وجدت ماكو
المحاور ـ طيب نوابكم موجودين بيها
سماحة السيد القائد مقتدى الصدرأعزه الله ـ مو كلنا شلع
المحاور ـ ها شلع
سماحة السيد القائد مقتدى الصدرأعزه الله ـ الا نترجمها بالانكليزي شلع قلع انتهت هاي هي لازم يتحملون هو اذا كان بيهم فد اربعة خمسة عشرة زينين خل يتحملون هذا فداءاً للوطن
المحاور ـ انا قصدي مو صار بيها تداعيات لما كان هناك اقتحام للبرلمان
سماحة السيد القائد مقتدى الصدرأعزه الله ـ التداعي الواحد الاعلام المعادي ضد الثوار خلاص مابيها تداعيات نهائياً هي قنفة وحدة واتلطخت بمدري شنو بوية حمرة اكو بويا حمرة ما اعرف ماكو بيها اي تداعيات
المحاور ـ بس مدري يعني اقصد وصلت الى هذا الشرخ اللي صار بالبرلمان واتعمق اكثر
من صار الاقتحام بالبرلمان ماتعتقد ان هذا الشيء
سماحة السيد القائد مقتدى الصدرأعزه الله ـ اني اصور مئات القوانين معطلة منذ 2003 والى يومنا هذا هي من دخلت البرلمان صارت احنة المعطلين ملفات جابولياها هيجي رزم صناديك كلها معطلة يعني برلمان ماكو من ادخلنا، ادخلنا الى مقر برلمان مو الى برلمان حقيقي
المحاورـ اي.. بس هذا العمل يعتبر عمل ثوري
سماحة السيد القائد مقتدى الصدرأعزه الله ـ ثوري اي جيد خوش صفة هاي
المحاورـ هذا يلغي كل نتائج الانتخابات ، يؤسس لواقع جديد واقع ثوري
سماحة السيد القائد مقتدى الصدرأعزه الله ـ هسة الانتخابات اذا انت فاصللها فصل اني ماكو حتى احجيلك الانتخابات ايضاً كلها فلوس
المحاور ـ لا.. بس سماحتكم هذا الكلام يعتبر شيء خطير لما انت حضرتك تكول يدخلون الى البرلمان يعني هو البرلمان مايعني شيء
سماحة السيد القائد مقتدى الصدرأعزه الله ـ الانتخابات تهديد وترغيب بس بيد سلطة محددة
المحاور ـ والانتخابات القادمة لعد شلون
سماحة السيد القائد مقتدى الصدرأعزه الله ـ ولعلمك حتى جزء فد اثنين اتلاثة من التيار هم يسون تهديد وترغيب او وديتهم بالانتخابات حتى بعد لا يعيدوها الانتخابات يجب ان تكون حرة ونزيهة واي واحد يتدخل بعمل المفوضية اذا كانت مستقلة هذا غير وطني وخائن للوطن
المحاور ـ وكيف تكون مستقلة المفوضية
سماحة السيد القائد مقتدى الصدرأعزه الله ـ بعد هذا نشتغله ان شاء الله بالمستقبل
المحاور ـ طيب الجماهير لما دخلت للبرلمان كان هناك توجيه الهم بالذهاب الى ساحة الاحتفالات
سماحة السيد القائد مقتدى الصدرأعزه الله ـ من دخلوا قلنا لهم اذهبوا الى ساحة الاحتفالات
المحاور ـ و بساحة الاحتفالات حدث فد شيء يعني يعتبر نسبة للمتابعين قد يكون مفاجئ او لا لما صارت هتافات ايران بره بره وهذا الصدر رباني
سماحة السيد القائد مقتدى الصدرأعزه الله ـ حافظها
المحاور ـ اي.. قصدي الهتافات كانت مفاجئة من التيار الصدري لكن الغريب انه التيار الصدري اعرب عن اعتذاره وعن اسفه لهذا بس هي هتافات من جماهيرة

سماحة السيد القائد مقتدى الصدرأعزه الله ـ هي مو قضية اعتذار او عدم اعتذار احنا سابقاً كلنا اي سفارة في العراق يجب ان تكون بمأمن من الثوار انتهت نقطة راس سطر فأي واحد سواءاً
باللسان او بالايد او بأقل من ذلك او بأكثر من ذلك فهو خارج عن ماكُتب له (خلاص)

المحاور ـ يعني هذا ماكان مؤشر لعلاقات متوترة مع ايران انت واعدتني بالصراحة
سماحة السيد القائد مقتدى الصدرأعزه الله ـ لا ، هو راح اجاوبك بصراحة علاقتي بايران دائماً اشوية متزلزلة لان اني اشوية مشاغب ما يأخذون مني نتيجة نهائية
المحاور ـ بس بالنهاية ماتحيد عن يعني على الخط اللي هم يريدوه
سماحة السيد القائد مقتدى الصدرأعزه الله ــ لا،لا.. جيران وشراكة حالهم حال السعودية وتركيا والاردن وكذا مالم يتدخلوا سلباًً سواءاًً ايران او تركيا او السعودية وكل الدول لها تدخلات سلبية ارفضها رفضاًً قاطعاًً
المحاور ـ انت تعتقدهم يدخلون ولكن ايجاباً
سماحة السيد القائد مقتدى الصدرأعزه الله ـ مَن
المحاور ـ الايرانيون
سماحة السيد القائد مقتدى الصدر أعزه الله ـ ايجابية بالنسبة الهم
المحاور ـ لا، انت الان تكول ما اعترض انا اعترض فقط على التدخل السلبي
سماحة السيد القائد مقتدى الصدر أعزه الله ـ لا.. اكول انه جميع الدول المجاورة والغير المحتلة صداقة وشراكة ماداموا لا يتدخلون في الوضع العراقي بالسلب ارسال الارهابيين ارسال الكذا ارسال المليشاويين اللي ازيد من اللزوم حقدهم الطائفي اي هسة الحشد الشعبي اتلث ارباعة مو مليشيا ويدافع عن الشعب العراقي بيها باب وجواب بس بيه مندسين وبيه من يريد تشويه سمعتهم
المحاور ـ طيب هاي الهتافات ماتعبر عن واقع حال موقف التيار الصدري
سماحة السيد القائد مقتدى الصدر أعزه الله ـ شوف هي مادام ردت فعل شعبية تصير بيها أخطاء وتصير بيها امور زينة
المحاور ـ اذن هي خطأ
سماحة السيد القائد مقتدى الصدر أعزه الله ـ كما كُتب لهم هي خطأ لانه كلنالهم اي سفارة من السفارات الموجودة في العراق لايجب التعدي عليها وانا لحد الان اتعهد اذا اكو مظاهرات بعد بالمستقبل ماتوصل يم اي سفارة من السفارات وان كان هي السفارة الاميريكية تحارشت بينا بالخيمة الخضرة
المحاور ـ اها اشلون
سماحة السيد القائد مقتدى الصدرأعزه الله ـ اشوية راح نتحارش بيها بالمستقبل
المحاور ـ اشلون تحارشوا
سماحة السيد القائد مقتدى الصدرأعزه الله ـ كامت طيارة امريكية تفتر فوك الخيمة فأن شاء الله نتحارش بيها بالمستقبل
المحاور ـ اشراح يصير
سماحة السيد القائد مقتدى الصدرأعزه الله ـ بالمستقبل الله كريم
المحاور ـ طيب في بيان اخير لحضرتك ذكرت بيه احتمال او تلميح بانضمامكم الى جبهة النواب اللي كانوا معتصمين سموها جبهة الاصلاح فاريد اعرف وين نيتك يعني بالمرحلة القادمة برلمانية
سماحة السيد القائد مقتدى الصدرأعزه الله ـ صحيح.. بما انه مشروع الوزاري او الاصلاح الوزاري تعرقل ولعله المعرقل هي الرئاسات الثلاثة والله العالم فقد نتحول من الاصلاح الوزاري الى الاصلاح حتى الرئاسي ان جاز التعبير
المحاور ـ الرئاسات الثلاث
سماحة السيد القائد مقتدى الصدرأعزه الله ـ هسة الرئاسات الثلاثة او الاثنين هاي بيه كلام ونقاش بس انه اذا ماصار الاقل راح نزيد مطالبنا لكن المشكلة الكبرى هي انه من ضمن المعتصمين فاسدين واذا وصل الامر اليهم تدري بعد الدكتاتور من ايشوف، و الجائع من يشوف الدجاجة راح ياكلها مية بالمية ومن يشوف العراق قطعة كيك راح ياكلها فعليه هو هذا اللي اريد اكوله انه انسحابي من المعتصمين انما ( ما ) ردت اطلع العراق من بحبوحة الفاسدين الى بحبوحة المالكي اللي هو بعد اشد واعتى فعليه اسحبت نفسي الى ان انشوف الوضع اذا كان حقيقي للاصلاح ولا يريد الوصول الى ولاية ثالثة ورابعة وخامسة وهكذا الى ما لا نهاية بيها باب وجواب، اذا لا، نشتغل احنا وحدنا بطريقنا
المحاور ـ اشلون تتأكد من هالشيء اذا الخطوات هي راح اتم يعني قصدي انتوا عددكم بحدود ال 34 ،35 نائب
سماحة السيد القائد مقتدى الصدرأعزه الله ـ بليانا ماتم ولهذا مايكدرون ايسون شيء ماراح يرجعون الولاية الثالثة ابليانا فاذا شكمناهم وصار اكيد عدم ولاية ثالثة ذاك الوكت وحد ندخل
المحاور ـ انتوا وياهم الان في حلف مؤقت
سماحة السيد القائد مقتدى الصدرأعزه الله ـ وي منو
المحاور ـ يعني ناويين اللي من ضمنهم هذولة الفئة اللي انتم ماتثقون بيهم
سماحة السيد القائد مقتدى الصدرأعزه الله ـ اي بس هذا الشخص اعزله
المحاور ـ اي بس هم ضروريين حتى تكملون حتى تحققون
سماحة السيد القائد مقتدى الصدرأعزه الله ـ ضروريين بدون شخص المالكي
المحاور ـ يعني ماتعتقد النواب ايمثلوه
سماحة السيد القائد مقتدى الصدرأعزه الله ـ اذا يمثلوه اذن ما اتعامل وياهم
المحاور ـ وشلون تعرف هم محد يتخلى عنه
سماحة السيد القائد مقتدى الصدرأعزه الله ـ هذا شغلي اني اعرفهم
المحاور ـ طيب وين ماضين يعني هذه الجبهة انت حضرتك تكول
سماحة السيد القائد مقتدى الصدرأعزه الله ـ وين ماضين، ماضين الى الاصلاح باي طريقة كانت
المحاور ـ اريد تفاصيل الاصلاح
سماحة السيد القائد مقتدى الصدرأعزه الله ـ لكنها سلمية، طريقة الاصلاح، الاصلاح الوزاري الاصلاح الرئاسي اصلاح القضاء اصلاح المفوضية مال الانتخابات اصلاح الوضع والنظام الدستوري
المحاور ـ يعني الخطوة الاولى انه تكونون هاي الكتلة الكبيرة اللي قادرة على التغيير رئاسات الثلاث
سماحة السيد القائد مقتدى الصدرأعزه الله ـ بشرط ان تكون عابرة للمحاصصة غير طائفية اي كتلة طائفية انا ما اتدخل وشوف هم اني من اهنا اعلنها قبل ما يجي الفاصل انه انا ما اتدخل بعد بالسياسة نهائياً اني راعي للاصلاح سواء اكو كتلة احرار ماكو كتلة احرار اكو تيار ماكو تيار اني مالي دخل بعد ابداً بالسياسة نهائياً لا اريد لا وزيراً ولا رئاسة ولا اي شيء اخر نهائياً
المحاور ـ ما تدعمهم للنواب
سماحة السيد القائد مقتدى الصدرأعزه الله ـ ادعم بصورة عملية بصورة مو انا داخل فيها اذا كانت هناك كتلة عابرة للمحاصصة فقط
المحاور ـ وشنو الخطوات اللي سألتك عليها هناك تصعيد للتظاهر
سماحة السيد القائد مقتدى الصدرأعزه الله ـ اكو تصعيد بالتظاهر هسة اتشوف عما قريب
المحاور ـ يعني الجمعة القادمة
سماحة السيد القائد مقتدى الصدرأعزه الله ـ مو بس الجمعة القادمة بعد الزمن طويل
المحاورـ راح يصير هناك تهديد لدخول الخضراء ؟
السيد القائد مقتدى الصدر اعزه الله ـ هسه الخضراء صارت هينة بعد
المحاورـ إذن وين بعد على الحمراء ؟
السيد القائد مقتدى الصدر اعزه الله ـ بعد أكو أشياء أكثر وأهم بالجديد أتشوفها إن شاء الله
المحاور ـ بس هذا ما يثير القلق عند الناس
السيد القائد مقتدى الصدر اعزه الله ـ سلمية ، شعب ويريد يعبر عن رأيه
المحاور ـ بس دخول البرلمان أيضاً سلمي ؟
السيد القائد مقتدى الصدر اعزه الله ـ غير العراق ديمقراطي ، لو دكتاتوري ؟ ديمقراطي ، إذن يكفل رأي الشعب
المحاور ـ يعني بالإطر الديمقراطية أو بحركة الجماهير
السيد القائد مقتدى الصدر اعزه الله ـ حرية وديمقراطية شعبية ، ثورة عراقية كبرى
المحاور ـ بس هناك من يقول أن هذه التظاهرات
السيد القائد مقتدى الصدر اعزه الله ـ أنا أراهن أن الشعب العراقي سيزداد ، المظاهرات ستكبر
المحاور ـ هناك من يقول أن هذه التظاهرات ما تمثل كل العراق هؤلاء هم أتباع التيار الصدري ؟
السيد القائد مقتدى الصدر اعزه الله ـ لا مو صحيح ، ما تمثل كل العراق ، ماكو العراق كله يطلع ، ماكو دولة كلها تطلع بالمظاهرات
المحاور ـ يعني ما تمثل وجهة نظر أو رأي أغلبية العراق
السيد القائد مقتدى الصدر اعزه الله ـ لا أنا أشهد أن هذه التظاهرات مو صدرية فقط ، أصلاً غير الصدريين كانوا قبلنا يتظاهرون شلون صارت صدرية فقط
المحاور ـ إي بس نسبتهم يمكن عُشر بالمية من المتظاهرين
السيد القائد مقتدى الصدر اعزه الله ـ هو هذا عددهم منين يجيبون يروحون يتداينون
المحاور ـ قصدي الإرادة اختلفت ، الارادة اختلفت
السيد القائد مقتدى الصدر أعزه الله ـ المهم الجود ، الجود بالنفس ، حبيبي خو مو أروح أجيب ناس من الخارج ، آني عشرة أتظاهر، آني مليون أتظاهر، آني عشرة مليون أتظاهر ، وأنا أقول لك بعد الاحداث والتفجيرات التي راح تصير ، راح الشعب العراقي شوية يصحه
المحاور ـ بس أنت خليت شوية نوع من التشويق بالموضوع لما تكول راح تشوف ، يعني لما تكون بطريقة سلمية ، ولما تكول تظاهرات الخضراء هاي لا شيء يعني اقتحام الخضراء ، فـوين ناوين ؟
السيد القائد مقتدى الصدر أعزه الله ـ شنسوي بعد بالخضراء إحنه
المحاور ـ أكو إحتمال لتغيير السيد العبادي
السيد القائد مقتدى الصدر أعزه الله ـ والله هو مشكلته مضغوط عليه
المحاور ـ يمكن متعاطف انت وياه
السيد القائد مقتدى الصدر أعزه الله ـ ما أخفيها ، إي كشخص ما أخفيها ، ما أقول لك لا ، لأن أنت قلت لي صريح ، اقول لك صريح ، بس إذا توانى لا ما أتعاطف وياه
المحاورـ يعني لأنه يتصل بيك وياخذ رأيك
السيد القائد مقتدى الصدر أعزه الله ـ لا هو شياخذ رايي ، يجوز ياخذ رايي ويسوي غير شكل ، مو مشكلة هاي ــ لا ـــ لأنه مضغوط عليه

المحاور ـ اليتوانى ماذا تقصد بهِ ؟ عندما ياخذ رأي المالكي
السيد القائد مقتدى الصدر أعزه الله ـ لا رأي المالكي مو تواني هاي خيانة
المحاور ـ هاي خيانة
السيد القائد مقتدى الصدر أعزه الله ـ إي ، لا ، التواني يعني يقصر شوية ، يأجل شوية ، كذا ، شوية يمطمط ، أما ياخذ رأي المالكي هذا بيع للعراق ، وما أتصور ، هو سماه قائد الظرورة بعد انتهى ما يتعاون وياه ، من هذه الناحية مأمن ، يجوز شوية ايطخطخ الى بعض الضغوطات مالته بس ما ياخذ رايه بالنتيجة
المحاورـ طيب بالحديث عن العبادي وتغيير العبادي فترة من الفترات ، هل فعلاً رشحتم السيد جعفر الصدر لرئاسة الوزراء
السيد القائد مقتدى الصدر أعزه الله ـ بالانتخابات السابقة
المحاورـ لا هذه الفترة
السيد القائد مقتدى الصدر أعزه الله ـ لا
المحاور ـ أو هو لحد الآن هو بديل يعتبر ناجح
السيد القائد مقتدى الصدر أعزه الله ـ لا هو الله يحفظه ما ياخذ رايي بهذا الشي ما يدخل بأمور السياسة ، هو أعلى من ذلك أصلاً
المحاورـ طيب لما صار اقتحام للبرلمان وبعدين صار اقتحام لرئاسة الوزراء صار اشتباك يعني خفيف أو ربما شوية أقوى مع تشكيلات مسلحة مع مليشيات أو تنظيمات مسلحة أخرى
السيد القائد مقتدى الصدر أعزه الله ـ ما سمعت هيج
المحاورـ ما صار
السيد القائد مقتدى الصدر أعزه الله ـ لاــ لا
المحاورـ يعني هذا الاشتباك اللي صار بمجلس الوزراء
السيد القائد مقتدى الصدر أعزه الله ـ هم يخافون من التيار ما يسووهة
المحاورـ بس كان سرايا الخرساني هناك كانت
السيد القائد مقتدى الصدر أعزه الله ـ لا الخرساني ما دبر السوالف هاي
المحاورـ طيب إللي تبعها بعدين عمليات إحراق لمكاتب حزب الدعوة ومهاجمة
السيد القائد مقتدى الصدر أعزه الله ـ هو هذا إللي خلاني أؤجل المظاهرات بشهر رمضان
المحاورـ شلون ؟
السيد القائد مقتدى الصدر أعزه الله ـ أتصور دخل على الخط بعض الجهات يريدون يشوهون سمعة الثوار ، كما دخل خط سابقاً أرادوا يشوهون سمعة المقاومة العسكرية ، وجمدت آني جيش المهدي وجمدت المقاومة لفترة ، أنا أهم شي بالمقاومة العسكرية السابقة وبالمقاومة السلمية للثوار سمعتهم ، حافظوا على سمعتكم أيها الثوار ، فسمعتكم أهم من نجاحكم أصلاً ، فلذلك هاي صارت الشوائب الصغيرة قطعت بشهر رمضان ، للعبادة وبعد العيد إن شاء الله نبلش عالجديد
المحاور ـ طيب ما تشعر بالقلق من تنامي هاي القوة أو جبهة تتوحد صفوفها ، خلي نسميها جبهة المالكي ، مناك عصائب الحق مناك بدر
السيد القائد مقتدى الصدر أعزه الله ـ حشرهم الله معه ، لنا جبهتنا ولهم جبهتهم
المحاورـ بس هذه ما بيها مخاطر لمواجهة مسلحة
السيد القائد مقتدى الصدر أعزه الله ـ لاــ لا ، أنا من يمي ما أطلق طلقة واحدة عليهم ولا على غيرهم ما داموا عراقيين نهائياً ، المظاهرات سلمية
المحاورـ لكن هذه المظاهرات التي أنت حددتها حضرتك ، القادمة أقصد ، في المرة الماضية لما صار هناك تعرض للمتظاهرين وصد إلهم من قبل ، يعني آني ما أعرف إذا كانت قوات حكومية غير حكومية، لكن أتحدث عن المستقبل ، إذا صار مثل هكذا مواجهة ، ما هو موقفكم
السيد القائد مقتدى الصدر أعزه الله ـ نُصعّد
المحاورـ تواجهوهم
السيد القائد مقتدى الصدر أعزه الله ـ لا ، سلمية قلت لك سلمية ، شلون
المحاورـ إذا ضربوا
السيد القائد مقتدى الصدر أعزه الله ـ نصعد بطريقة أخرى ، لدينا مزيد بس ما أريد أعلن عنه ، إن شاء الله في فترة اخرى أخص الشرقية شوية
المحاور ـ طيب هذا التصاعد في جماهيريتكم وفي شعبيتكم من بدء التظاهرات أثار القلق لدى الطرف الآخر
السيد القائد مقتدى الصدر أعزه الله ـ ما يثير القلق صدقني
المحاور ـ لكن
السيد القائد مقتدى الصدر أعزه الله ـ خصوصاً أنا تدري أكثر قراراتي شتسويلي ، أتبعد الناس عني ، سحب الثقة ، مدري كذا ، ما أرضى بالطائفية ، لانه النفس الطائفي هسه كلش صاعد فول، إللي يصيّح سنة وشيعة هذا عليه اللعنة ، وهذا عليه اللعنة يفوز وياخذ الانتخابات كلها له ، مثل ما هسة ماشية ، آني من هاي يمي أي قرار أشوفه لمصلحة المقابل ، مصلحة المواطن ، أقره أقوم بيه ، ماكو خو أنت هسه تدري ثلاثة أرباع الاعلام ضدي ، هسه أبسط شي ، ولو مو لطيفة مو محلها ، مظاهرة لدعم الشيخ عيسى القاسم الله يحفظه بالبحرين ، طلعنا مظاهرة حتى قناة شيعية ما طلعتها مو هذا موضوع شيعي ما بيه بعد اصلاح وفساد
المحاور ـ هسه راح نجيها
السيد القائد مقتدى الصدر أعزه الله ـ أكول ، يعني كل الاعلام ضدنا حتى أنطيك مثال ، فما يهمني مو أنه آني شعبية ومو شعبية ،آني بعد ما أريد أصوات انتخابات لا للاحرار ولا لغيرها ، ما دامت طائفية ، أريد أصوات العراق تذهب الى جهة واحدة كون غير طائفية ، عابرة للمحاصصة تعتني بشعبها ، لا تريد تثبيت كرسيها انتهت
المحاور ـ آني سؤالي ردت أسأل حضرتك لما تصاعدت شعبيتكم يقال إنه توقيت الهجوم على الفلوجة هو كان لكبح يعني جماح
السيد القائد مقتدى الصدر أعزه الله ـ صحيح ، بس مع ذلك هم ميخالف ، المهم الفلوجة ننقذها من الارهاب ، طبعاً هي وقعت أسيرة مال سياسات المالكي السابقة ، وإن شاء الله سنحررها بأيادي الجيش العراقي الباسل والحشد الشعبي الغير الطائفي
المحاور ـ هذا ما استفزكم
السيد القائد مقتدى الصدر أعزه الله ـ من هو
المحاور ـ إنه للمرة الثانية يصعد نجم
السيد القائد مقتدى الصدر أعزه الله ـ آني صار لي سنتين أتوسل بيهم روحوا للفلوجة
المحاور ـ لا مو قصدي ، مو الفلوجة بس قصدي الفصائل التي اشتركت بالحشد
السيد القائد مقتدى الصدر أعزه الله ـ بالعافية عليهم إذا أنتصروا
المحاور ـ بس هذا ما راح يرجع بنتيجة في بغداد ، يحصلون مغانم
السيد القائد مقتدى الصدر أعزه الله ـ بالعافية عليهم إذا هم صدك حرروا الانبار وثلثين العراق إللي قام بيه السياسات السابقة بسببها ، يا ريت آني واحد منهم أصعد نجمهم
المحاور ـ أنت تعتقد الطريقة إللي تم بيها تحرير الفلوجة هي الطريقة المثلى ، يعني كل الحشد الشعبي في خارج المدينة والجيش يدخل
السيد القائد مقتدى الصدر أعزه الله ـ آني هسه هذا مو جل همي ، جل همي ما يقع على المدنيين في الفلوجة الخيرين منهم ، هسه الارهابيين خلي يولون
المحاور ـ هو آني هم عندي سؤال
السيد القائد مقتدى الصدر أعزه الله ـ بس آني أريد التمييز ما بين الارهابي وغير الارهابي مئة بالمئة حتى لو عشرة بالمئة أكو مو ارهابي مستحيل كل الانبار كلها

ارهابية وين صايرة ماكو هيج منطقة اصلاً ، حتى لو ثنين بالمية هم يجب استخلاصهم من بين الارهابيين ، أقلها العوائل ، أقلها الاطفال ، أقلها النساء ، الجيش شوية جاي يداري ، بس بعض الاطراف الاخرى ما جاي تداري ، أنا أريد أتدخل كسرايا السلام طبعاً ، إنه طلبوا بعض الجهات داخل الانبار إنه نتدخل لفصل هذه، تعيين الارهابي من غير الارهابي
المحاور ـ وصلت لك معلومات عن الانتهاكات في الفلوجة
السيد القائد مقتدى الصدر أعزه الله ـ كثيرـــ كثير
المحاور ـ طيب هذا الدور البعيد لسرايا السلام هو مؤشر صح ، يعني كيف تجده هو ابعاد لو هو برضاتكم أنتم ، وأنتم راضين
السيد القائد مقتدى الصدر أعزه الله ـ إبعاد عن ماذا
المحاور ـ عن أن تكونون قريبين عن ساحة المعركة
السيد القائد مقتدى الصدر أعزه الله ـ إحنه هسه في ساحة المعركة
المحاور ـ لا قصدي في الفلوجة مثلاً
السيد القائد مقتدى الصدر أعزه الله ـ من سامراء وإلى قريب الفلوجة
المحاور ـ بعبارة أدق أنتم بعيدين عن قيادة الحشد الشعبي
السيد القائد مقتدى الصدر أعزه الله ـ إي نعم وهذا يشرفني ، بأن أكون أنا خادم للشعب ولست قائداً للشعب
المحاور ـ لا هذه لغة دبلوماسية
السيد القائد مقتدى الصدر أعزه الله ـ لا ليش هو الحقيقة هيج
المحاور ـ لا لما تقول يشرفني أن أكون بعيد عن قيادة الحشد الشعبي لكن سرايا السلام هي قوة مقاتلة
السيد القائد مقتدى الصدر أعزه الله ـ مو حاشدة مو حاشدة
المحاور يكمل ـ مهمة موجودة
السيد القائد مقتدى الصدر أعزه الله ـ تقاتل صحيح بتنسيق لكنها لا ما يعتبرونها حشد شعبي ولا هم يريدون يعتبرون حشد شعبي ، ولا أنا أريد أعتبرها حشد شعبي
المحاور ـ يعني الامور الادارية التخصيصات الشهرية مو ماشية للحشد الشعبي
السيد القائد مقتدى الصدر أعزه الله ـ مو كل شي ينحجي
المحاور ـ حتى بهاي أكو بيها

تابـــــــــع

السيد القائد مقتدى الصدر أعزه الله ـ ولد خايبة أكو واكو مو ولد خايبة هو هيج باللغة العامية
المحاور ـ طيب كان في تصريحه قبل يومين ثلاثة السيد هادي العامري ، وأثنى به على السيد المالكي وقال هو من أسس الحشد الشعبي
السيد القائد مقتدى الصدر أعزه الله ـ مع الاسف ،هذا صوج الزواج الكاثوليكي الظاهر ، ما كان متوقع منه أبداً ، رجل المفروض مجاهد وما يتدخل بهيج أمور سياسية أنا أؤمن إيمان قاطع يجب على الحشد الشعبي أن لا يتدخل بالسياسة ، إذا تدخل بالسياسة راح تتلاص كل الامور
المحاور ـ لكن يبدو من السيد المالكي فعلاً هو مؤثر في الحشد الشعبي
السيد القائد مقتدى الصدر أعزه الله ـ شلون السيد المالكي
المحاور ـ عن طريق ولاء كل قيادات الحشد الشعبي
السيد القائد مقتدى الصدر أعزه الله ـ لا ماكو هيج شي ، هو يُبين نفسه هكذا ، هو يُبين ، خطية هو سمكة وطلعوها من الماء شتسوي تلبط شوية وتبطل
المحاور ـ هاي زعامة غير حقيقية
السيد القائد مقتدى الصدر أعزه الله ـ لا ،لا هو هيج شي
المحاور ـ بس سرايا السلام يعني ، هو الآن في سامراء يعني أنتم هذا الخط اللازمينه
السيد القائد مقتدى الصدر أعزه الله ـ من سامراء وحدك للفلوجة وما فلوجة
المحاور ـ وصارت في مرة من المرات في تكريت أنه مُنعوا من المشاركة في المعركة
السيد القائد مقتدى الصدر أعزه الله ـ أنا منعتهم
المحاور ـ لا ، طرف آخر منعهم
السيد القائد مقتدى الصدر أعزه الله ـ لا ! العدد يمنة مستحيل يطبون ، إي بس بغير أمور أكو مضايقات نعم ما أكلك بس بالحدث يطبون أول واحد ،إذا ذولاك خمسمية وألف إحنه يريدون منا خمسة وعشرة ماكو هيج شي ، بس تكريت صارت بيها انتهاكات قلت لهم انسحبوا ، لو تتقدمون تنهون الانتهاكات لو تبطلون ما تدخلون ، ما كدروا قلت لهم إنعزلوا ، وشي ثاني هم مهم هذا إنه المناطق المقدسة آني أركز عليها
المحاور ـ لحماية المناطق المقدسة
السيد القائد مقتدى الصدر أعزه الله ـ نعم ، ولذلك سامراء ، ولا سامح الله لو مكان آخر مقدس هم نفديه بالدم
المحاور ـ طيب هي سرايا السلام أيضاً كان لها وجود في بغداد أيضاً واكو ظهور خاطف ربما أثناء التظاهرات
السيد القائد مقتدى الصدر أعزه الله ـ إعتبرهم تيار جاءوا خو مو أجانب يعني بأعتبارهم تيار راد يتظاهر
المحاور ـ التيار نزل بسلاحه لبغداد
السيد القائد مقتدى الصدر أعزه الله ـ مرة وحدة صارت شوية رادت الحكومة تتحارش ورجعناهم يمكن نص ساعة ما طولت السالفة وبعد ما عادوهة
المحاور ـ يعني بأمر من عندك
السيد القائد مقتدى الصدر أعزه الله ـ لاـــ لا ، هسه مو بأمر من عندي بس كانت ردة فعل يعني شوية
المحاور يكمل ـ عاطفية
السيد القائد مقتدى الصدر أعزه الله ـ أكثر من عاطفية خلي نسميها ، ورجعوا بعد ما تتكرر
المحاور ـ يعني هذه الحضرتك تقولها من الذي يضمن بعد ما تتكرر لما يصير استفزاز لحضرتك مثلاً
السيد القائد مقتدى الصدر أعزه الله ـ لا ما يصير استفزاز
المحاور ـ هو هذا الخوف من السلاح
السيد القائد مقتدى الصدر أعزه الله ـ هسه إذا قتلوني ومتت ذاك الوقت وحد ، بعد ورا الموت شلون أطلع من القبر وأكلهم أكعدوا أسكتوا هذا أمر آخر ، بس وأنا حي ما أقبل
المحاور ـ وتعتقد أنه تكون هناك طاعة كاملة
السيد القائد مقتدى الصدر أعزه الله ـ من هذه الناحية انا اشهد لهم أنهم مطيعين لحد الآن كثوار ، وكسرايا السلام ، والفكرة التي في بالي في سامراء طبقوها مئة بالمئة الله يجزيهم بألف خير
المحاور ـ الناس راضين عنهم
السيد القائد مقتدى الصدر أعزه الله ـ الناس راضين عنهم ، وأي وقت قالوا سرايا السلام تطلع ، تطلع أنتهت إذا أذوهم ، إحنه ما جايين للأذية إحنه جايين ندافع عن الاهالي هسه هو إرهابي مو إرهابي ، هو ليش صار إرهابي ، مو الحكومة إلي كعدت ثمان سنوات شسوتلهم دمرتهم سوتهم ارهابية أوتوماتيكيا حتى لو هو مو ارهابي ، بس إذا دكينا عليه بثقافة جديدة قسماً بالله يتحول ويعوف الارهابية
المحاور ـ وأنت ماضي بهذه الثقافة
السيد القائد مقتدى الصدر أعزه الله ـ إن شاء الله ، ليش لا ، شنهي شغلي لعد
المحاور ـ وتعترف انه في الفترة الماضية الي كان يعني بعض الممارسات في 2005 ـ 2006 كانت هذه هي مؤسسة أيضاً لهذه الفجوة بين الشيعة والسنة وللخلافات
السيد القائد مقتدى الصدر أعزه الله ـ إنه شنو
المحاور ـ يعني لما صارت هناك إحنه نسميها الحركة الطائفية
السيد القائد مقتدى الصدر أعزه الله ـ لا مو حرب طائفية ، بدأت حرب داعش بمسمياتها القديمة هذه مو طائفية ، إحنه من نحارب داعش طائفياً ، هذه مو طائفية
المحاور ـ قصدي أهتزت الثقة بين الشيعة والسنة بسبب عمليات الشر المتبادلة
السيد القائد مقتدى الصدر أعزه الله ـ هسه مثلاً واحد يصيح بالمسجد سبوا علي وسبوا ما أدري منو ، هذا إذا تريد تعاديه ما تسميها طائفية إحنه من نمشي نكول السنة المنصفين يجب عدم عدائهم فإذا عاديتهم فأنت طائفي أما الارهابيين والدواعش وتنظيم القاعدة وتنظيم المدري شنو هذولة إرهاب مو طائفية هذا الارهاب تواجهه مو طائفية، آني جاي أقاتل الارهابيين في سامراء آني طائفي ، ما أعتبر روحي طائفي ، أنت من تحمي وطنك من الارهابين من حزاز الرقاب والمفخخين هذا ما تسمى إرهاب من تروح تكتلك واحد أمنا سني ابيته هو وعائلته هذه إرهابي هذا طائفي هذا أنت تصير إرهابي مو هو
المحاور ـ سيد لما سألتك عن تصريح السيد العامري يعني لمست من حضرتك انه كنت ما متوقع هذا الشي من السيد العامري
السيد القائد مقتدى الصدر أعزه الله ـ أبدا
المحاور ـ وكيف تصف علاقتك بي ألان
السيد القائد مقتدى الصدر أعزه الله ـ لا، خو مو كلمة وحدة
المحاور ـ لا، لا قصدي مو بسبب هذه الكلمة
السيد القائد مقتدى الصدر أعزه الله ـ أحاول أن تكون جيدة
المحاور ـ ما كو توتر بين بدر والسرايا
السيد القائد مقتدى الصدر أعزه الله ـ لا ما سمع هذا لا بالعكس يجوز أكثر جهة متعاونة من الحشد الشعبي مع السرايا هم بدر ألبقيه ممكن تسميهم منشقين مطرودين مدري كذا كلهم صدرين ترى هم الحشد يمكن خمسة وثمانين بالمائة صدرين إذا ما أبالغ بس بدر من هاي الناحية مو منشقة وان كان هم هي صدرية ترى بالتالي هم سيد محمد باقر الشهيد الاول الله يقدس نفسه الزكية هم تابعين أله هم صدرين فإذا تقيس هيج راح يصيروا مئة بمائة صدرين ماكو احد مو صدري، أنا أحاول البقاء على علاقة جيدة مع الاخ وملحقاته بدر طبعاً عدا وزير الداخلية
المحاور ـ هسه راح نرجعلة، أنت كيف تجد مستقبل الحشد الشعبي كان هناك تصريح من حضرتك تقول انا مع إلحاقهم بالمؤسسات الأمنية لكن طبعاً هذا التصريح يعني لاقا رفض من الطرف الآخر وبالذات تصريح....
السيد القائد مقتدى الصدر أعزه الله ـ الآن لو بعدين مرة تقول الآن ما ممكن صعبة كلش تلحقه بالجيش أنا كلت وطالبت أنه يكون المحرر الوحيد لجميع المناطق حتى سامراء يكون الجيش، يابه احنا مخيالف نلتحق بالجيش ونصير من ضمن الجيش مستعدين شهر شهرين سنة سنتين اذا نكمل رجعونه لبويتنه وكل شي منريد السلاح الكم والفلوس الكم وما قبلوا بس نحجي على بعدين اذا حُررت الأراضي وهذا ما نتمناه على الرغم من انه فد شي عسير انه يلتحقون بالجيش ولكذا ما يلتحقون بالسياسية مثلاً مجاهد ومكتول منا كذا ومن حشده ومن ناسه هواي ويجي يتربع على كرسي برلمان اوكرسي وزارة هذا اني اعتبره خزي باللغة العامية فشلة ولذلك انا جيش المهدي والآن السرايا امنعهم من ان يسجلون بأسمهم السرايا وباسم جيش المهدي وكذا، وكذا و يدخلون الى الحكومة منعاً باتاً المجاهد لا يجب أن يكون اسمه أبدا
المحاور ـ بس قصدي مستقبل الحشد الشعبي انت تراه مستقبل انه يلحق بالقوات الأمنية
السيد القائد مقتدى الصدر أعزه الله ـ اتمنى، هم ميلحقوه ثلث ترباعها تريد كرسي تكعد عليه و في امان الله او اي واحد ميريد كرسي اخلي على راسي
المحاور ـ بس هذا وين تلكي، طيب العلاقة تصل حد ألقطيعه مع السيد المالكي وانتوا يعني طرفين رئيسين بالتحالف الوطني تعتقد التحالف الوطني باقي
السيد القائد مقتدى الصدر أعزه الله ـ لا، شني التحالف الوطني شكله، ماكو كلها أشياء رمزية صورية بس للدعاية و الإعلام والانتخابات
المحاور ـ هناك نواب صدرين يعني يحضرون الاجتماعات وكذا ما يلتزمون بوحدة موقف وياهم، طيب اذا كان هو متوقف يعني ليش مايتم الإعلان انه أحنا منسحبين من التحالف الوطني
السيد القائد مقتدى الصدر أعزه الله ـ اني أعلنك انه تحالف وطني ماكوا واذا تريد اني أعلن، بس اني مو ناطق رسمي المشكلة هو ماكوا هو فد شي عملي ماكوا فد شي رمزي يجوز أكو
المحاور ـ هاي شنسميها هو التحالف الوطني كان عبارة عن توحيد لي أحزاب الشيعة فهذه شنسميها
السيد القائد مقتدى الصدر أعزه الله ـ سياسة دنيوي منحطة كُلٌ يجر النار الى قرصه لو كان انه السياسية لأمور عراقية وطنية ما جان صارت هيج جان أني انطيه وهو ينطي وياخذ ماكو واحد ينيطه بس يريد يأخذ ما ينيطه
المحاور ـ بس انت حضرتك حضرت الاجتماع أللي صار في كربلاء ابصفتيش حضرت
السيد القائد مقتدى الصدر أعزه الله ـ بمشروع الإصلاح، ردت اسمع وجهة نضرهم فقط
المحاور ـ مو كان تحالف وطني هذا
السيد القائد مقتدى الصدر أعزه الله ـ هم سموه تحالف وطني أني سميته تخالف وطني
المحاور ـ شني أللي أنطرح في هذا الاجتماع
السيد القائد مقتدى الصدر أعزه الله ـ ماكو فساد ماكو فقر
المحاور ـ حضرتك اطلعت من الاجتماع
السيد القائد مقتدى الصدر أعزه الله ـ في امان الله، في امان الله
المحاور ـ ما وافقوك والا كيف
السيد القائد مقتدى الصدر أعزه الله ـ على شنو؟ ما عندي مطالب أني غير الإصلاح هم ايكولون أحنا مو مفسدين ولا هناك فساد في الحكومة أصلا ينفوه كتلت لا فقر ولا فساد احدهم ايكلي اكو شسمه أني رحت للكلحاء لكيت طفل بيده موبايل أيفون مدري كلكسي كال هذا غني وهذا الشعب العراقي متطور مالياً بعد وأنت قيس على ذلك
المحاور ـ وانت تركت الموضوع واطلعت، طيب الانتخابات القادمة انت كيف تجد نوع التحالف الجديد أللي ممكن يكون بيه وألا أنت حضرتك تقول اني ما ادعم
السيد القائد مقتدى الصدر أعزه الله ـ أني ادعم شي واحد مو كشخص أو ألي أو تيار، كتلة عابرة للمحصاصة والطائفية إن وجدت وهذا أتصور كلش عسير وسَيُحارب بكل ماأُتوا من قوة بس أن شا الله اعمل أله أذا إنا بقيت بالحياة
المحاور ـ طيب ردت أسألك عن المرجعية هل المرجعية راضية عن خطواتكم بالذات موضوع اقتحام البرلمان اقتحام مجلس الوزراء
السيد القائد مقتدى الصدر أعزه الله ـ ما اكدر اجاوب نيابة عنها كاقتحام ما اعرف بس كمشروع أصلاحي اكدر أكول إي
المحاور ـ اكو تواصل وياهم اكو تنسيق
السيد القائد مقتدى الصدر أعزه الله ـ هم اكدر أكول أي ، بطريقة أو أخرى اكو ان شاء الله
المحاور ـ بس أنت حضرتك يعني مرجعيتك مع السيد الحائري اعتقد هل هناك تنسيق مع السيد الحائري فيما تتخذون
السيد القائد مقتدى الصدر أعزه الله ـ أي مرجعية تمثل الشعب انا معها ماعندي شي من هذه الناحية. التقليد هذا وحد تقليدي للسيد الوالد لا اقلد مرجعاً حالياً
المحاور ـ الان متقلد السيد
السيد القائد مقتدى الصدر أعزه الله ـ لا، لا قد يكون فد مستحدثه مستحدثتين هذا أمر فقهي
المحاور ـ طيب علاقتك بإيران لما كل فترة تذهب إلى ايران الى قم يعني علاقة اجتماعية
السيد القائد مقتدى الصدر أعزه الله ـ لا عائلة
المحاور ـ قصدي بهاي الفترة ما تصير بيها تواصل مع سياسيين
السيد القائد مقتدى الصدر أعزه الله ـ لا، لا من زمن طويل ماكو لعله روحتي الرسمية اللي طلعت بالتلفزيون وهاي بعده أبدا ماكو نهائياً
المحاور ـ بس انت المرة الاخيرة اللي ذكرت بيها رحت الى ايران هذه قبل فترة
السيد القائد مقتدى الصدر أعزه الله ـ لا خو هاي صارلي عشرة ايام من رجعت هاي زيارة عائلية ما احسبها زيارة رسمية
المحاور ـ بس قصدي الطرف الايراني ما متواصل وياك بهاي الفترة
السيد القائد مقتدى الصدر أعزه الله ـ بطريقة ــ ما ــ اكو تواصل ليش ما مقطوعة مو عداء او فد شي لا بس اني اشياء رسمية ماكو
المحاور ـ اللي لمستة من الايرانيين وين توجهم
السيد القائد مقتدى الصدر أعزه الله ـ كشعب، كحكومة
المحاور ـ لا، كحكومة قصدي حريصين مثلا على وحدة التحالف الوطني يعني يدفعوك الى انه تكون ضمن التحالف الوطني
السيد القائد مقتدى الصدر أعزه الله ـ لا، لا من ضمن الامور الجيدة اللي حدثت بتدخل ايران وي الحشد الشعبي انه شافت الحقائق موجوده في الارض وعرفت شنو تحالف وشنو مو تحالف وشنو تيار وشنو مو تيار شنو الاحزاب وشنو مو احزاب يعني من الداخل عرفت جانت عدها ضبابية كلش جبيرة الان هاي الضبابية شويه قلت فاذا كانت هذه الميزة الوحيدة هم زين شوية
المحاور ـ زين اكو فترة من رحتوا الى ايران اكو شائعات انه اكو نوع من الاقامة الجبرية او شيء من هذا القبيل راجت بين الناس لانه جاءت بعد ما تصاعدت التظاهرات
السيد القائد مقتدى الصدر أعزه الله ـ لا، ميكدرون ميسوون هيج شي ولا يريدون يسوون هيج شي اقل من ذلك هُمَ
المحاور ـ طيب نرجع على التيار الصدري وعلى كتلة الاحرار وحضرتكم ممثلين في الحكومات العراقية السابقة
السيد القائد مقتدى الصدر أعزه الله ـ حاليا ــ لا ــ ترى
المحاور ـ الحكومات السابقة قصدي من 2003
السيد القائد مقتدى الصدر أعزه الله ـ مو حدد حاليا او كذا
المحاور ـ اي اكيد لكن اقصد اللي اريد اوصلة انه لمن انتفضتوا للاصلاح و لمحاربة الفساد كان حري بكم طبعا اكيد ان تبدءون بعناصركم بلجانكم بنوابكم بوزرائكم
السيد القائد مقتدى الصدر أعزه الله ـ وهو كذلك اني كتلهم قناه الشرقية خل تَطلع على بعض الامور
المحاور ـ اني ردت اسألك بالذات على امثلة على السيد بهاء الاعرجي
السيد القائد مقتدى الصدر أعزه الله ـ اول واحد كتلة روح استقيل واستقال واجاني خبر انه ممستقيل جاي يداوم جريتله اذنه كتلة لداوم بعد و بعدين جبتة استضافة ثلاثة اشهر
المحاور ـ ما، هو هذا اللي اريد اسألك عليه الاستضافة ثلاثة اشهر لمن تكول اي واحد عدة شكوى خلي يقدمها اليس الاجدى انة يُقدم الى القضاء
السيد القائد مقتدى الصدر أعزه الله ـ ياريت... اذا اكو قضاء هيج نزيه ياريت
المحاور ـ سيدنا اريد احجي وياك بشكل واضح وصريح
السيد القائد مقتدى الصدر أعزه الله ـ نعم، نعم
المحاور ـ يعني هناك حديث عن السيد بهاء الاعرجي مثلا عندهُ ثروة طائلة وهو بالنهاية يمثلكم
السيد القائد مقتدى الصدر أعزه الله ـ بس جيبلي دليل واحد ما اريد اعمل بالظن والتهمة تخليني اعمل بالظن والتهمة
المحاور ـ بس هاي مهمتكم ,مهمتكم التحقق يعني لانه بالنهاية يمثلكم
السيد القائد مقتدى الصدر أعزه الله ـ يعني احنه خو مو شسمه شارلوك هولمز
المحاور ـ يعني قصدي
السيد القائد مقتدى الصدر أعزه الله ـ احنه تجينا دعوة اهلا وسهلا
المحاور ـ سيدنا اقصد اما تكلي اي عنده او ما عنده ليش لأن يمثلكم بالنهاية
السيد القائد مقتدى الصدر أعزه الله ـ صحيح، ولذلك جبته إتلث تشهر فيابه أي دليل على أي فساد يابه انطينياه آني أعرف إشلون أصرف وياه غير الكصاكيص , أكو اشياء جديدة بس ماكو ما إجاني اي دليل
المحاور ـ بس كصاكيص
السيد القائد مقتدى الصدر أعزه الله ـ مو هذا , كل إتلث تيام اربعة اخابرله ها يابه أسأل أكو إجه دليل ماكو
المحاور ـ ما كو تواصل وي القضاء بالموضوع
السيد القائد مقتدى الصدر أعزه الله ـ لا ماكو
الحاور ـ ما كو شكوى ضده
السيد القائد مقتدى الصدر أعزه الله ـ ما ادري هسه هو راح للقضاء والقضاء براه
المحاور ـ والان هو وين موقفه هو
السيد القائد مقتدى الصدر أعزه الله ـ ما اعرف ما سألت عنه مع شديد الاسف
المحاور ـ يعني مو يمكم
السيد القائد مقتدى الصدر أعزه الله ـ لا ما اعتقد لا زال يعني يؤمن بآل الصدر والتيار الصدري أتصور هيجي
المحاور ـ يعني بعيد عن الاضواء
السيد القائد مقتدى الصدر أعزه الله ـ إي بعيد عن الاضواء، وياريت يبقى بعيد عن الاضواء
المحاور ـ بعيد عن الاضواء لو مجبر ان يبتعد عن الظهور عن الساحة الاعلامية والسياسية وله ابإرادته
السيد القائد مقتدى الصدر أعزه الله ـ يعني آنه اكله اطلب منه ان يبتعد احسن له مصلحة عامة
المحاور ـ ليش اتكله اذا اتكول صارله إثلث تشهر ما عنده شي ومحد مشتكي عليه
السيد القائد مقتدى الصدر أعزه الله ـ يعني فترة نقاها خلي انسميها هيج فترة راحة
المحاور ـ أكيد عندك حدس انه أكو شي عنده مو صحيح
السيد القائد مقتدى الصدر أعزه الله ـ صحيح آنه اكلك أياها صحيح
المحاور ـ بس ما كو يقين
السيد القائد مقتدى الصدر أعزه الله ـ ماكو يقين
المحاور ـ والسيد الدراجي وزير الاسكان ايضاً ماكو شي عليه
السيد القائد مقتدى الصدر أعزه الله ـ اكو بعض الاشياء بس قليله اقل مما تصور يعني إي
المحاور ـ طيب آنه استغل هذه الصورة سواء
السيد القائد مقتدى الصدر أعزه الله ـ جريتله اذنه يعني جريت اذنه زين يعني
المحاور ـ جريت اذنه بشكل يعني اهنا...
السيد القائد مقتدى الصدر أعزه الله ـ تياري , مالي علاقه قضائي مو قضائي آنه ما ادخل بقضية عمل القضاء
المحاور ـ زين الاموال العامة اهنانه وين إبهل الحالة
السيد القائد مقتدى الصدر أعزه الله ـ لا.. هو منو كال اموال
المحاور ـ لمن جريت اذنه غير على فد شي عليه
السيد القائد مقتدى الصدر أعزه الله ـ لا مو شرط اموال ليش ,كتلك قليله , اكثر مما تتصور لانه يجوز مو اموال ,لو اموال ــ لا ــ مو اجر إذنه غير شي مو هيجي
المحاور ـ آنه هذا قصدي , قصدي المحاسبة الداخلية , المحاسبة الداخلية هذا شي يعنيكم ولكن اذا كان الشيء يمس المال العام فهذا يعتبر نوع من التغطية عليه
السيد القائد مقتدى الصدر أعزه الله ـ ما اغفرله ( قسماً بالله ) حتى لو كان درهم فضلاً عن الملايين او المليارات لا مو جرت اذن ذاك الوكت ايصير غير تصرف
المحاور ـ طيب في نفس الموضوع بس في شبها اخرى لمن صار انتشار لسرايا السلام في بغداد كان هناك ظهور لأفلام للفيديو لأبو درع
السيد القائد مقتدى الصدر أعزه الله ـ انتشار مال شنو
المحاور ـ انتشار لسرايا السلام لمن صارت التظاهرة , هسه قبل اشوية من كتلي انتشروا لفترة محددة وانسحبوا , مو صحيح
السيد القائد مقتدى الصدر أعزه الله ـ إي
المحاور ـ مو لو
السيد القائد مقتدى الصدر أعزه الله ـ إي الاسبوع الثالث أتصور من التظاهرات , إي
المحاور ـ إي يمكن ساعتين او ثلاثة قصدي إللي أثار انتباهنا هو ظهور ابو درع كان اعتقد هو معاقب من حضرتك
السيد القائد مقتدى الصدر أعزه الله ـ و لا زال معاقب
المحاور ـ فكيف يظهر بهذا الشكل هو يعني هذا هم اساءة
السيد القائد مقتدى الصدر أعزه الله ـ على اساس هو إيريد يثبت للناس انه لا زلت مخلص، كثير من الامور حتى بعض المنشقين هم يكلك من توصل يم مقتدى ادافع عنه لأن لا زالوا وان كانوا منشقين اذا صار تهديد المقتدى شخصي آنه ادخل لمساعدته
المحاور ـ حتى اذا كان خارج عن القانون
السيد القائد مقتدى الصدر أعزه الله ـ هسه هذا وحد انت تقول ليش أدخل لو هو خارج عن القانون اذا خارج عن القانون ارجعة
المحاور ـ هو ابو درع لمن يظهرمعناه كان بحمايتكم هذه الفتره كلها لمن حضرتك انت معاقبة ولمن يظهر مرة ثانية مستغل هذا الموضوع
السيد القائد مقتدى الصدر أعزه الله ـ لا مو ابحمايتي , اصلاً ما كان داخل العراق خارج العراق بس من رجع، رجع بالحشد، الحشد كام يلملم منا, منا هو آني ,و آنه مو قيادي بالحشد
المحاور ـ بالحشد وتحت اي راية بالحشد هو مو تحت راية سرايا السلام
السيد القائد مقتدى الصدر أعزه الله ـ لا،لا مو بسرايا السلام لا
المحاور ـ اذن هو من ضمن غير تشكيل
السيد القائد مقتدى الصدر أعزه الله ـ إي ,غير تشكيل ما اعرف شنوا اسمه والله ما حافظ تسمياتهم
المحاور ـ طيب عندي سؤال اخر عن بعض الشبهات إللي تخصك , هل لديك طيارة خاصة
السيد القائد مقتدى الصدر أعزه الله ـ لا ابداً
المحاور ـ أريد اذكرلك كل اللي عندي
السيد / مرة وحدة وصارت بالاشتباه ردت اروح لتركيا على اساس ايحجزولنه طيارة حجزونه طيارة طلعت ما مدفوع افلوسها وتعالوا يا تيار ادفعوا افوسها هاي مرة صارت
المحاور ـ هاي إللي اخذت بيه صورة وله غيرها
السيد القائد مقتدى الصدر أعزه الله ـ لا،لا هذه مال اتصور مال بشار الأسد من رحت الى سورية دزلي طيارة هو لأيران اخذني ورجعني
المحاور ـ اي هاي إللي بيها الصورة
السيد القائد مقتدى الصدر أعزه الله ـ اي هاي الطيارة الخاصة مال بشار مو مالتي ومال كردستان من رحت دزوا طيارة هم خاصة بس اني بيه زغيرة بس طيارتي ملكي ــ لا ــ على اساس احتراماً إلي
المحاور ـ بس تعرف لمن صورتك تظهر وطيارة خاصة اشوية ترويج بيه
السيد القائد مقتدى الصدر أعزه الله ـ لمن يدزون لي طيارة اركب بيه ما اكول لا طبعاً آني اجنب الطيارة الخاصة لانه امنياً مو صحيحه مع ذلك لأنه ايدزونه (اسكت)
المحاورــ في قرار أخير لحضرتك بخصوص الفساد ، حتى نخلص من هذا الملف ، أنه عينت شخصين
السيد القائد مقتدى الصدر أعزه الله ـ شي يخلصنا من هذا الملف
المحاورـ يعني حديثاً عينت شخصين إللي همه
السيد القائد مقتدى الصدر أعزه الله ـ إي هو واحد قديم وواحد لحقته بيه حتى اوسع العمل
المحاورـ إي ، عينتهم لمحاربة الفساد بالداخل
السيد القائد مقتدى الصدر أعزه الله ـ بداخل التيار مو بالحكومة
المحاورــ اي اعرف بس قصدي هذا الفساد بالداخل ما له تأثيرات على المال العام
السيد القائد مقتدى الصدر أعزه الله ـ لا... لا ، امور تيارية قطع اراضي ما أدري شنو فد كذا مو اموال دولة مو مجهول مالك وحكومة
المحاورــ وذكرت بالبيان انت حضرتك عبارة اتكول بيها حتى الناس اللي ينفصلون، فهذه أريد أشوف منو المثال هذا
السيد القائد مقتدى الصدر أعزه الله ـ هاي اريد اكوله للمرة الاولى من قناتك من اتكله تعال يا فلان انت مفسد عليك دعوة شراح ايكول واحد من عذرين يا اما ايكلي مريض يا اما ايكلي آني مو من التيار الصدري ولك صارلك عشر اسنين اتصيح مقتدى وبأسم التيار هسه من جينه ناخذك اتصيح آني مو تيار فاكول قطعاً لهذا حتى لو كلت مو تيار جيبه ، طبعاً هو تيار مية بالمية بس هو من توصل يريد ايجيبوه يتبره ايكلك آني مو تيار
المحاور. طيب ادارة المرقد الشريف لأمير المؤمنين علي عليه السلام الآن هو تحت ادارتكم ولا
السيد القائد مقتدى الصدر أعزه الله ـ لا... لا ، أتصور يم المرجعية السيد السيستاني ما اعرف
المحاورــ لأنه بالماضي لما صارت الاشتباكات مع بدر ونوع من الخلاف كان ، كان يقال انه حول
السيد القائد مقتدى الصدر أعزه الله ـ مال حرق البراني تقصد
المحاورــ اي
السيد القائد مقتدى الصدر أعزه الله ـ مو بدر كان المجلس الاعلى
المحاورــ اي مو جان بدر بالمجلس الاعلى في وقتهه مو صحيح
السيد القائد مقتدى الصدر أعزه الله ـ بس احنه انكول مو بدر احسن
المحاورــ هاي ما شاء الله علاقتكم حيل قوية ويه بدر ..بس قصدي هاي الخلافات ماله وجود الآن
السيد القائد مقتدى الصدر أعزه الله ـ لا ... المفروض (لا)
المحاورــ المفروض لا
السيد القائد مقتدى الصدر أعزه الله ـ المفروض لا ، يعني بالنسبة الي كشخص اكيد لا عندي خلافات الآن مع المجلس عندي خلافات باعتبار هم ما ايقدمون على عملية الاصلاح ، بس انه هذا السابق آني قلبي مو حاقد
المحاورـ هو هذا قصدي اكو خلاف خفي مع بدر غير مُعلن
السيد القائد مقتدى الصدر أعزه الله ـ مجلس اعلى ، بدر ، اتركها بدر ماعدنه شي وياهم
المحاورــ راح اجيها هسه ، بس أريد أجي مرة ثانية على بدر لأن الحجي يم وزير الداخلية المستقيل
السيد القائد مقتدى الصدر أعزه الله ـ مجلس اعلى ، هيج خلي انكول سابقا اي خلاف مسحته وصارت شراكة جديدة لكن صار اكو خلاف على مشروع الاصلاح
المحاورــ اني اشكرك عل صراحتك الاكثر من المتوقع ، لكن اتحدث عن بدر والسيد وزير الداخلية المستقيل الخلاف معه
السيد القائد مقتدى الصدر أعزه الله ـ اجندة خارجية هذا خلافي معه ، مو وطني ، رجال مو وطني
المحاورــ عندك يقين بهذا الشي
السيد القائد مقتدى الصدر أعزه الله ـ اي نعم عندي يقين ، وما يراد يقين هي الوقائع تتحدث
المحاورــ اي وقائع
السيد القائد مقتدى الصدر أعزه الله ـ هسه مو كلشي ينكال
المحاورــ يعني قصدك هاي التفجيرات
السيد القائد مقتدى الصدر أعزه الله ـ لا... لا ، مقصر من راسه لساسه بالتفجيرات اي صحيح هذا هو وزير الداخلية منو يتحمل المسؤولية ، آني شنو دخلي آني كاعد هنانه ولا عندي سلاح ، ولا يخلوني هم احمي ، وصحنه من زمان من اول ما جاءت داعش احموا بغداد قبل ما تحررون اي منطقة ، احمو المحافظات الجنوبية قبل ما تحررون اي منطقة ، عفوا يعني الانبار والموصل وصلاح الدين ، ما سمعوا ولذلك هم من حرروا الانبار بدت التفجيرات ببغداد ، يعني خطط عسكرية ماكو ، هي هاي المشكلة
المحاورــ لا ، بس سماحة السيد لما اتكول بشكل قاطع اجندة خارجية هذا كلام خطير جدا يعني
السيد القائد مقتدى الصدر أعزه الله ـ اي انه هذا اكرره اجندة خارجية وانا اهيب بالأخ هادي العامري بانه اشويه ايشكمه ، كون ايجر اذنه
المحاورـ يعني تعتقد مو بالتنسيق وياه
السيد القائد مقتدى الصدر أعزه الله ـ لا اذا هيج تختلف ، اني خل اكول اتفائل لا مو بالتنسيق وياه
المحاورــ بس تنطيني فد مؤشر ازغير عالأجندات ، فد مثل زغير حتى نربط يعني
السيد القائد مقتدى الصدر أعزه الله ـ اقلني اقالك الله
المحاورــ طيب هذا الخلاف الاخير الي صار بخصوص موضوع صقر بغداد ، ايضا هو بين وزير الداخلية وبين محافظ بغداد
السيد القائد مقتدى الصدر أعزه الله ـ مال متفجرات وما متفجرات
المحاورــ إي ، هاي موضوع السيارات ومتابعته بس محافظ بغداد ايضا هو ايعود الكم
السيد القائد مقتدى الصدر أعزه الله ـ اي صحيح بس ما يكدر ايقدم ويأخر شيسوي ، كلشي الذي قاله ما يوقعوله ما يكولوله ، ما كذا ، حماياته سحبوها ، ما أدري شنو سحبوها ، ثلاثة أرباع بغداد مو عليه تره ، المناطق الي دتصير بيها تفجيرات كرادة مو كرادة مو من اختصاصه
المحاور مقاطعاً ــ بس الاعلام مو مال اختصاصه مو اختصاصه
السيد القائد مقتدى الصدر أعزه الله ـ يكمل... بس آني ما اكول انه مو مقصر ، مقصر لا ، هي المشكلة اجت بغداد بمشكلة ، والمحافظ من صار إذا اتشيله تعال تسلمه بيد منو ، وراح اتصير لفلان وفلان ، هاي خل تعبر هذه الفترة لأن هو مقصر مو تكول مفسد ، لو مفسد علي التميمي اشيله ما يهمني
المحاورــ انت تعتقده مقصر
السيد القائد مقتدى الصدر أعزه الله ـ اعتقده ، أكدر أكول ثلاثة أرباعه قصور واكو تقصير ، قصور باعتبار ما يخلوه يشتغل كتلك حتى حماياته جره ، هو وزير الداخلية سحبها منه كلها ، ماكو حمايات كام يفتر وحده
المحاورــ بس قصدي ما دام حضرتك انت حريص جدا على سمعتكم وسمعت التيار ، موضوع صقر بغداد لما أعلن وزير الداخلية هذا موضوع وهمي وكذب وافتراء على الناس وتم سحب فلوس ، والذي يرعى هذا الموضوع هو محافظ بغداد
السيد القائد مقتدى الصدر أعزه الله ـ اذا شريك بيها ويدري بالخلفيات مالتهه خل يكعد ويستقيل احسن له آني اكلك اياها بصريح ، آني ما عندي صاحب صديق ، آني صاحبي العراق صاحبي الله ( انتهت )
المحاورــ بس قصدي ما في أي تحقيق بالموضوع
السيد القائد مقتدى الصدر أعزه الله ـ نبهتني ، راح احولها على لجنة مكافحة الفساد يحققون بالموضوع ، صار
المحاورــ لا بس قصدي هذا الموضوع رائج بين الناس ويثير غضبهم ، أنه تم استغفال كل اصحاب المركبات في بغداد والمحافظات الاخرى ، فهذا طبعا هو يُسيء للتيار ولسمعتكم
السيد القائد مقتدى الصدر أعزه الله ـ ماشي راح اتحقق بالموضوع وتشوف
المحاورــ نوصل الى الجرح النازف ، حديث الموضوع محرقة الكرادة الي صارت ، برأيك هذا الموضوع شويه اخذ بعض الجوانب ربما للغموض وربما لتقصير الحكومة ولحد الآن ما نطتنا فد بيان واضح
السيد القائد مقتدى الصدر أعزه الله ـ صحيح
المحاورــ وبدأت الاقاويل وبدأت الناس اتكول هذا الانفجار غير شكل ، وناس اتكول هذا بتخطيط ، فردت اشوف انت موقفك
السيد القائد مقتدى الصدر أعزه الله ـ اي على اساس حفرة ما موجودة على الارض
المحاورــ ما موجود اي اثر على الأرض
السيد القائد مقتدى الصدر أعزه الله ـ المهم هو حادث سقط فيه عدد كبير من الشهداء بالمئات ، ولعله اكبر حادث لحد الآن ، ولذلك صارت له ضجة اكبر من غير التفجيرات وإلا هي التفجيرات بين يوم ويوم وكل يوم وباليوم اكثر من مرة ، بس هذا حادث مؤلم حقيقةً ومحزن جدا وتقصير مو قصور ، تقصير حكومي لا سيما من وزير الداخلية ورئاسة الوزراء ، حتى يقول انه حريق جايبيلهم سيارات اطفاء وحده ما يعرفون اشلون ايطفون الحريق ، ما يعرفون اشلون ايطلعون الذي بالداخل، الى ان احترقوا بالداخل ومحد اجاهم فد قصور وتقصير عجيب الى حد اللامتناهي ، ولذلك ادعو العبادي اذا مو هو يستقيل فكل القوى الامنية المقصرة في هذا الحادث ان تستقيل ، مو فقط تستقيل وتقدم الى قضاء عراقي نزيه لكي يُعرف منو السبب حتى قيل انه الشارع جان مكطوع وبعدين انفتحت وطبت ، ما ادري هذه الاحداث ، مو آني احقق بيها المفروض ، المفروض القضاء والجهات المختصة ، فعلى الحكومة اذا ما توصلت خلال هذه الايام القلائل الى نتيجة بالكرادة ان تستقيل شلع قلع ، لأنه عيب بعد يعني اذا شنو تريد الدماء هيج تجري مو قليلة ، الدم العراقي تره عزيز مو يعني فد شي هين ، فضلا عن انه ثلاث مئة شهيد وجريح محد يحجي
المحاورــ انت تحليلك داعش وراء الموضوع أو غير جهة
السيد القائد مقتدى الصدر أعزه الله ـ اتمنى ان تكون داعش حتى اكدر شلون انتقم منها بس اذا مو داعش فإنا لله وإنا إليه راجعون
المحاورــ يعني اكو شك انه مو داعش
السيد القائد مقتدى الصدر أعزه الله ـ ارجو الا يكون شك
المحاورــ يعني تعتقد انه توصل الخلافات والتقاطعات الى ان تصير جريمة بهل الشكل
السيد القائد مقتدى الصدر أعزه الله ـ الكرسي مهم ، بس اتمنا ان يكون داعش ، وهو تقريبا خمس وثمانين خمس وتسعين بالمية داعش فهو عدونا الاكبر
المحاورــ تعتقد هذا الحادث راح يأسس لانعطافة قادمة بشكل الاحتجاج والتظاهر
السيد القائد مقتدى الصدر أعزه الله ـ نعم ، هو ليش كتلك آني بالبداية ، كتلك انه هذا الاحتجاج سيزيد بعد هذه التفجيرات ، والعراقيين شويه صحوا وعرفوا منو عدوهم من صديقهم منو القاصر منو المقصر
المحاورـ تعتقد بغداد بعدها تكون في خطر
السيد القائد مقتدى الصدر أعزه الله ـ طبعا بعدنا بأولها ، خصوصا بعد تحرير الانبار ، وإذا اجه تحرير الموصل هاي خلايا نائمة ببغداد مطشرين على فلس ، مية بالمية اتسوي تفجيرات
المحاورــ بس الكلام الخطير الي تحدثت بيه حضرتك لما اتكول وزير الداخلية
السيد القائد مقتدى الصدر أعزه الله ـ (مقاطعاً) مقصر
المحاورــ مو مقصر ، يتبع اجندة خارجية واحنه منا عدنه خطر داعش يتعاظم
السيد القائد مقتدى الصدر أعزه الله ـ السياسة الدنيوية لا قلب لها ما ترحم
المحاورــ يعني قصدي هذا ما يدفعكم ان تحسمون الامور بشكل
السيد القائد مقتدى الصدر أعزه الله ـ سنحسمها ان شاء الله ، شويه شويه ، خو مو عصا سحرية هيج تطخها وكل شي يتغير ، يراد اشويه زمن طويل ، والنفس الطويل اكو انشاء الله ، بس كون تبقى الحياة نمشي بيها ، وين ما تريد توصل خل توصل ، ننقتل كل الثوار هم خل ننقتل كل الثوار بس كون العراق بمأمن
المحاورــ طيب بالنسبة لداعش بعد الفلوجة انت تعتقد راح الخطر يتعاظم في بغداد
السيد القائد مقتدى الصدر أعزه الله ـ كمفخخات و اعمال ارهابية مثلاً ، انتقامية يعني
المحاورــ لكن هاي العملية ممكن راح تنتهي بالتقدم نحو الموصل
السيد القائد مقتدى الصدر أعزه الله ـ لا بالعكس ، تزيد
المحاورــ تزيد
السيد القائد مقتدى الصدر أعزه الله ـ لأنه راح ايصير ضغط عليهم اكثر راح يفتحون جبهة اخرى علينا من غير مكان
المحاورـ متفائل انت حضرتك بإخراج داعش
السيد القائد مقتدى الصدر أعزه الله ـ داعش كداعش يجوز اي ، بس داعش وره داعش امور اخرى ، يعني داعش مسمى ، داعش فكر ، داعش طشّت بكل البلدان الاسلامية والاوربية هم اجمالة
المحاورــ وهذا الفكر له ارضية بالعراق
السيد القائد مقتدى الصدر أعزه الله ـ مية بالمية وخصوصا مع تصاعد الطرف الاخر الشيعي ضدهم حتى لو مو داعشي هم صار داعشي ايكلك اوكع بحضن سني احسن لي من أني اوكع بحضن شيعي متشدد
المحاورــ هو هذا الذي أردت أن أطرحه وي حضرتك استغلال فرصة ، حضرتك من ابرز الزعماء الدينيين في العراق، يعني قصدي وين دوركم في ردم هاي الفجوة بين السني والشيعي ، في تعزيز الثقة بالآخر
السيد القائد مقتدى الصدر أعزه الله ـ صعبة شيعيا ، لأنه الطائفية متعلقة بالسياسة ، والسياسة متعلقة بالانتخابات اذا ما يصيح اني طائفي ، إلا لعنة الله على كذا وكذا وكذا ، ماراح يوصل للكرسي ، سنيا يخافون من داعش فما ايصيح اني معتدل ، وميخالف اهلا وسهلا بالشيعة هم صعبة ، أكلتُ الآن المقسوم من الحجي والاعلام ضدي بالمطالبة ، يابه الوحدة الاسلامية ، يابه الكذا ، يا وحده اسلامية ذولة ارهابيين اتريد اتصير وي الارهابيين ، احنه انكول الشيعة المعتدلين خل ايكونون موحدين ويه السنة المعتدلين ، اذا ايكدرون ايطلعون راسهم هذوله الأثنين اهلا وسهلا بيهم ماكو ماكو ، لا كلام لنا مع المتشدد الشيعي إلي شويه ازيد من اللزوم الي شويه عقله ملوث ، ولا ويه السني المتشدد الي هو وهابي او سلفي او كذا، كذا
المحاور ــ بس سماحتك لثقلك المعنوي الكبير في اوساط الشيعة ، وربما في اوساط السنة ايضا ، والاحترام ايضا ، يعني هذا اعتقد يأهلك للعب دور مهم جدا يمكن
السيد القائد مقتدى الصدر أعزه الله ـ تدري شنو يعتبروك سياسي ، اعطاء مغنم من سياسي الى سياسي تدري بيه مستحيل ، ما يتصورون انه آني اريد هيج صدك للصلح وللكذا ولترتيب الامور ، فمنو اكله يابه تعال اكعد وي شيعي تعال اكعد وي سني ، هذا مغنم لمقتدى ، راح ايصير ايصد ويرد، ماكو ما نوصل لنتيجة بل بالعكس مو فقط بالعراق حتى في خارج العراق حاولت
المحاورــ طيب هناك الآن اكو شعب كامل يعني هو مهجر ونازح ، اكثر من اربع ملايين ، فما هي المبادرة التي تبادروها ، حتى واحد يعزز الثقة ، ويزيد من جسور التواصل
السيد القائد مقتدى الصدر أعزه الله ـ فقط نوصلهم المساعدات ما نكدر ، هاي اذا خلونه انوصللهم المساعدات اصلا ، يعني آني حتى دزيت ابو دعاء بسيارات لنفس الفلوجة ونفس مكان القتال وصلتلهم مساعدات للمدنيين والنساء والرجال
المحاورــ ومنو يمنع
السيد القائد مقتدى الصدر أعزه الله ـ يعني ايكلولك ماتكدر تطب وبعدها حرب وكذا ،
اما المناطق الاخرى يعني جاي نحاول حتى اهنا نازحين في النجف وبالجنوب وفي مناطق اخرى ، جاي انوصللهم هلعدنه والجود بالموجود اكثر من ذلك ما اكدر ، ما اكدر اكلهم ارجعوا لمناطقكم ، المناطق التي تحرر وتمسك من قبل اقوياء وشجعان المفروض ترجع بيها اهاليها ، منع رجوع الاهالي هذا فد شي يعني ايضا اكدر اسميه خيانة للوطن ، اما تريد اتسوي اتجيب ناس اخرين اتكعدهم بيها ، وانت تعرف شنو القصد ، هذا أمر خاطأ
المحاورــ بس هذا سياسيا ما مترجم مثلا في ديالى يعني تيار الاحرار
السيد القائد مقتدى الصدر أعزه الله ــ جمدتهم آني كلهم تيار احرار وسرايا كلها
المحاورــ ماشي بنفس الخط مع ، يعني من ضمن الخط الطائفي
السيد القائد مقتدى الصدر أعزه الله ــ بريء منهم الى يوم الدين واي واحد عندك دليل جيبه وشوف اني شسوي بيه
المحاورــ لا... لا ، آني قصدي كفعل سياسي
السيد القائد مقتدى الصدر أعزه الله ــ فعل سياسي يعني شيسوي ، اذا هو مثلا نفر واحد بديالى اشيكدر ايسوي ، يكدر ايسوي شي كله ايسوي شي ، مايكدر يعني هناك النفس بديالى مو طائفي ، يعني اكبر من الطائفية نفسها اي فد شي كلش يعني مقيت من الطرفين ها مو بس من الشيعة ، السني خشمه براسة والشيعي خشمه براسة ومتكدر اتحصل منهم شي
تابـــــــــع

المحاورــ هسه هناك دور اتباعك شنو ، على الحياد
السيد القائد مقتدى الصدر أعزه الله ــ يعني اللي مو على الحياد كلتلهم انتم طالعين من السرايا ومن جيش المهدي من التيار من كلشي من احرار من مفاصل كلها ، بعد لتحجون بأسمي
المحاورــ يعني اي واحد من اتباع الصدر بديالى يقوم بعمل طائفي
السيد القائد مقتدى الصدر أعزه الله ــ فهو ليس مني
المحاورــ ما يمثلك
السيد القائد مقتدى الصدر أعزه الله ــ ما يمثلني ، ملعون بعد
المحاورــ طيب تعتقد أنهم السياسيين السنة هم ، يعني كانوا لهم الدور الاكبر في معاناة اهل السنة في محافظاتهم
السيد القائد مقتدى الصدر أعزه الله ــ خو مقصرين اكيد حالهم حال السياسيين الاخرين ، آني من استهدف الاصلاح في البلد ما استهدف الشيعة فقط ، هم مو بس الشيعة مفسدين حتى السنة مفسدين فيهم حتى غير السنة والشيعة وغير الاسلاميين هم مفسدين ، هو كتلك النظام الحكومي كُله قائم على فساد فاليدخل بيه للظرورة انه يفسد يعتبر نفسه
المحاورــ طيب الآن نجي على موضوع الموصل ، انت تعتقد انه الحشد يجب ان يشترك في الموصل ام لا ؟
السيد القائد مقتدى الصدر أعزه الله ــ هذا قرار يم الجيش العراقي اذا ايشوف نفسه ميكدر وحده ويريد نساعده ويساعده الحشد بالخدمة ، يكدر وحده ياريت ، واكرر إلحاق العناصر المنضبطة بالجيش ولو لفترة مؤقتة لتحرير المناطق المغتصبة امر جيد وأنصح به ، حتى يكون جيش ضد إرهاب ، مو شيعة ضد سنة ، ويتصاعد بالخارج الغضب الطائفي
المحاورــ بالضبط هذا صحيح .. طيب وماذا عن مشاركة الطيار الامريكي تعتقدها ضرورية
السيد القائد مقتدى الصدر أعزه الله ــ لا حتى لو ضرورية هم لا نحتاجها
المحاورـ شلون حتى لو ضرورية ما تحتاجه
السيد القائد مقتدى الصدر أعزه الله ــ لا نستعين بالكافر ، ولا نستعين بالاجنبي فنحن قادرون على تحرير اراضينا
المحاورــ بس هذا الكافر يعني هو متواصل من 2003 لحد الآن
السيد القائد مقتدى الصدر أعزه الله ــ آني ما قابله وآني ضده وراحت شهداء وراحوا قتلة ومعتقلين آني من يمي الاحتلال خط احمر بكل جنسياتهم مو بس الامريكي
المحاورــ بس حضرتك يعني مو كان في تمثيل للتيار من 2003 لحد 2011 ، لحد خروج الامريكان يعني هذا ما يعتبر نوع من
السيد القائد مقتدى الصدر أعزه الله ــ بالحكومة
المحاورــ نعم
السيد القائد مقتدى الصدر أعزه الله ــ اجاني ويجوني وزراء انه يريد يشوفني السفير الامريكي ، وزير الزراعة فترة اجاني بالبداية ، جان وزير الزراعة تيار صدري ، وكلي وزير الزراعة الامريكي جاي ويريد ينطي فلوس كتله لو ينطي مليارات انت لا تكعد وياه خل يروح يكعد وي رئيس الوزراء خل يروح يكعد وي شخص اخر ، انت ما تكعد وياه نهائيا
المحاورــ يعني حتى لو هذا الطيار الامريكي هو يساعدنا بالمعركة
السيد القائد مقتدى الصدر أعزه الله ــ لا، ما يساعدنه ، جذب مية بالمية ما يساعد ، كل المساعدات جاي ايذبها لداعش واحنه ننحصد ، امريكا بعظمتها على اساس ، مو تكولون عظيمة ما تكدر اتخلص داعش اللي همه يكولون اشكم واحد ثلاثة الاف مو ، ما تكدر تخلص ثلاثة الاف واحد ويومية جاي تتمدد داعش وامركا جاي تتقلص وين شو ماكو شي
المحاورــ يعني تعتقد غير جديين
السيد القائد مقتدى الصدر أعزه الله ــ لا، غير جديين مئة بالمئة وحتى لو كانوا جديين هم ما نريدهم بعد اذا مو هم دزوهم اصلا ومكنوهم
المحاورــ على الجانب الآخر أردت اسألك الحضور الكثيف لسليماني اثناء المعارك ، هل هو حضور لضرورات المعركة برأيك ام انه اعلام
السيد القائد مقتدى الصدر أعزه الله ــ اسأل الحكوميين ، اسأل الحشد الشعبي ، ما اعرف آني بالعراق اصلاً ما ملتقي بيه يمكن مرة وحدة ، ما اعرف شوكت يجي ، شوكت يطلع ، ما اعرف تحركاته نهائيا
المحاورــ اني قصدي بس هذا الايحاء انه هو المنقذ ، هو المخلص لما يحضر بهاي المعركة راح ينتصر الجيش ، لما يحضر في هذه الجبهة
السيد القائد مقتدى الصدر أعزه الله ــ هو غير تريد الصدك كشخصية اي عنده قوة وشجاعة
المحاورـــ يعني هسه العراق قاصر من الشجعان
السيد القائد مقتدى الصدر أعزه الله ــ ما ادري هسه هم يجوز يحبوه وينفعلون وياه يجوز ، ما اعرف ، آني ما شايفه اصلا
المحاورــ ما يحبون واحد عراقي يعني
السيد القائد مقتدى الصدر أعزه الله ــ اي ، آسف لهذا المثال مغنية الحي لا تطرب
المحاورــ طيب على الجانب الآخر مادام دا اخذ دول الجوار آني دا اخذهن بالسرة بديت بامريكا الولايات المتحدة الامريكية و ايران كان في بيان لحضرتك مؤخرا حول التفجيرات اللي حدثت في المملكة العربية السعودية
السيد القائد مقتدى الصدر أعزه الله ــ اي بالخصوص المسجد النبوي واستهداف المسجد النبوي كان حادثة يعني اليمة وحادثة وسابقة خطيرة يعني اول مرة تحدث لعله ، يعني وصلت داعش الى انه اتفجر النبي اللي هي اتريد اتروح تتعشا يمه ، زين انت اتفجر النبي وتتعشه يمه لو النبي ما يريد قبر اله ما اعرف شنو
المحاورــ قصدي هاي التفجيرات ما تشفع للمملكة العربية السعودية براءتها من دعم داعش
السيد القائد مقتدى الصدر أعزه الله ــ اني اللي اسميه انه السعودية واقعة تحت ضغوط داعش ، ما تكدر تمنع هذا الشي
المحاورــ واقعة تحت ضغط داعش
السيد القائد مقتدى الصدر أعزه الله ــ قبل عدة سنوات من جان شويه بعدها الامور بيها مجال كلتلهم آني اريد اروح للسعودية كالو انخاف عليك لا تجي
المحاورــ بس قبلها انت رحت
السيد القائد مقتدى الصدر أعزه الله ــ هاي وين بالحج ، لا اقصد قبل ثلاث سنين اربعه قبل ما تسوء كلش الامور بحيث اتصير علناً وقبل اليمن ، طبعاً بعد اليمن بعد ماكو
المحاورــ انت اتريد اتروح للحج
السيد القائد مقتدى الصدر أعزه الله ــ لا الحج رحت قبل اكثر من عشر سنين
المحاورــ لا ، لمن فاتحتهم
السيد القائد مقتدى الصدر أعزه الله ــ لا ردت اروح اصلح شوية من بعض الامور مال البحرين ومال العراق فكالوا نخاف عليك لا تجي ، يعني شوف اشكد هم ذولاكة ضاغطين عليهم
المحاورــ لو ما رادوك تجي يعني
السيد القائد مقتدى الصدر أعزه الله ــ هسه اني كلت انه يجوز عذر ادبي ، إن جاز التعبير ، بس لا ينبأ عن شيء ينبأ على ان هناك جهة قوية ومتنفذة في السعودية ، لا يستطيعون كبح جماحها
المحاورـ طيب انت رأيك بالسياسة السعودية بالعراق هل هناك دور ايجابي ام سلبي ، ودور السفير السعودي بيه كثير من الاعتراضات اللي صارت على تصريحاته
السيد القائد مقتدى الصدر أعزه الله ــ اي شويه تدخلاته مزعجة اي صحيح
المحاورــ بس كسياسة سعودية
السيد القائد مقتدى الصدر أعزه الله ــ يعني اذا ما مضغوط عليها فهي سيئة
المحاورــ بس السفير السعودي تصريحاته تعتبر تدخل بالشأن الداخلي
السيد القائد مقتدى الصدر أعزه الله ــ المفروض كل سفير هو ما له علاقة بهيج شغلات هسه هو يشوف اله دخل ما اعرف هو كون يمشي على القضايا الدبلوماسية مالته
المحاورــ لا مو اني اريد اطرح هل سؤال لأنه اريد اقارنه ويه حضرتك ، لما حضرتك تصدر بيان وتندد بيه ، بخصوص اعدام الشيخ النمر ، قصدي هو مواطن بالنهاية ، مواطن سعودي وتم اتخاذ اجراء قضائي بحقه
السيد القائد مقتدى الصدر أعزه الله ــ علمائنا ما نعتبرهم جنسية محددة ، العلماء عابرين للجنسيات حبيبي والدول يعني مثلا السيد الصدر مثلا عراقي هو صحيح عراقي بس هو للجميع تقلده حتى بألمانيا اذا كان شيعي مثلا يعني او السيد السستاني او اي مرجع او اي عالم اخر يكون قائد عام لكل المسلمين في اي مكان ، ما يعتبر ان هذا يحدد بهذا البلد فقط ، فمن يصير فد شي كون انه اتدخل كقضية عامة اسلامية شيعية عقائدية اخوية
المحاورــ بس انت اعتقد العبارة اللي كلته هذا يأتي من ضمن الطائفية العالمية
السيد القائد مقتدى الصدر أعزه الله ــ احسنت ها ، فشفت هذا ، خصوصا وهي صارت استهدافات عديدة شيخ علي السلمان ، شيخ الزكزكي ، الشيخ النمر
المحاورــ دا اتعدد دول
السيد القائد مقتدى الصدر أعزه الله ــ احسنت ، في نيجيريا وسوريا ومصر والبحرين وكذا ، صار استهداف لقيادات معتدلة شيعية وسنية
المحاورــ بس ما تؤمن هذا شأن داخلي
السيد القائد مقتدى الصدر أعزه الله ــ كاستهداف علماء لا مو شأن داخلي
المحاورــ لما تسميها الطائفية العالمية تعتقد انه اكو حركه عالمية
السيد القائد مقتدى الصدر أعزه الله ــ طائفية مية بالمية
المحاورــ سنية ضد الشيعة
السيد القائد مقتدى الصدر أعزه الله ــ لا... لا ، خو شيعية ضد السنة ، صحيح المبتدأ السنة ضد الشيعة ، وردة الفعل
المحاور مقاطعاً ــ من يقود هاي السنة ضد الشيعة
السيد القائد مقتدى الصدر أعزه الله ــ الحركة الوهابية هنا، هنا من زمان من عشرات السنين
المحاورـ يقودها عالمياً
السيد القائد مقتدى الصدر أعزه الله ــ اي موجودة ، ذولة لا سنة ولا شيعة ، ولا هاي ايريدوهم ولا هاي ايريدوهم دخلوا بالنص وخربو بيناتنه ، دنكلهم طلعوا هاي تصفه بين السنة والشيعة
المحاورــ يعني انت تعتقد الحرب او الصراعات هي صراعات مذهبية وليست هي سياسية
السيد القائد مقتدى الصدر أعزه الله ــ لا ، تطورت بالبداية كانت عقائدية كان اليجي يريد يقتل شيعي عقائديا ما جان يم السياسة ويوصل للكرسي بعدين تطورت فصارت سياسية واجتماعية
المحاورــ مو العكس هي تاخذ رداء المذهب والطائفة حتى تنفذ مآرب سياسية
السيد القائد مقتدى الصدر أعزه الله ــ الآن اي ، بالبداية كانت حركة طائفية يعني عقائدية دينية خل نسميها
المحاورــ لأن حتى تصريحاتك بخصوص البحرين ايضا يعني هو شخص بحريني وتم سحب الجنسية منه
السيد القائد مقتدى الصدر أعزه الله ــ عالم مجتهد هذا ، ما يعتبر فقط لبلده هو اعم من ذلك اكبر من ذلك ، يعني مثلا القرضاوي مصري لو لا ما يعتبروه مصري اصلا كاعد بقطر هو قطري ما يعتبروه قطري باعتبار هو لجميع محبيه واتباعه ويسمعون كلامه اهواي ، مثلا البابا مال المسيح كاعد بالفاتيكان شله علاقه بـ بولونيا
المحاورــ بس هو هسه ما داخل بالصراعات
السيد القائد مقتدى الصدر أعزه الله ــ لا ، اكول عالم
المحاورـــ لا ، بس آني قصدي لما السفير السعودي يصدر فد تصريح نحن قلقين على أوضاع السنة بالعراق يعتبر هذا تدخل في شؤون العراق لما حضرتك تكول استنكر
السيد القائد مقتدى الصدر أعزه الله ــ ذاك دبلوماسي آني شعبي ، آني مو دبلوماسي آني مو شخصية دبلوماسية المفروض يمشي وفق النظم الدبلوماسية اذا خرج عيب يخرج عنه ، واذا خرج المفروض انكله في امان الله مو هيج ، باعتباري آني هم ، وآسف يجوز بيها تكبر ، باعتباري آني هم رجل دين فمو اختصاصي فقط عراقي اذا صار فد شي خارج العراق اكو من ينتقد ليش رحت للكويت وزرته لما صار تفجير، لو تدري اشكد كيفو شيعة الكويت من دخلت هناك مثلا وكذا ، شافو اجاهم واحد من الخارج ما المفرض انه ، حتى لو سنة رحت آني هناك صليت
المحاورــ بس هذا مو يذكي الخلاف بين الشيعة والسنة
السيد القائد مقتدى الصدر أعزه الله ــ المفرض لا ، المفروض بالعكس اذا يذكي ما اروح
المحاورــ شيعة العراق تنتصر لشيعة الكويت وسنة السعودية تنتصر لسنة العراق
السيد القائد مقتدى الصدر أعزه الله ــ ماشي خلي تفجير شيعي يصير على سنة معتدلين آني هم اروح ازور السنة المعتدلين ، ماكو هيج شي ، الحمد لله لحد الآن ماكو هيج شي ، اكثر التفجيرات من المتشددين السنة على الشيعة مطلقا سواءً كان متشدد او مو متشدد ، متى يكون هناك تفجير شيعي ضد سنه معتدلين اروح ازورهم حتى لو ما أدري وين حتى لو في مشارق الأرض ومغاربها ما رايح لهم كشيعة رايح لهم كمظلوم انتهت نقطة راس سطر
المحاورــ اذن ماكو صراع خل انكول مذهبي إلا بإطار هو سياسي
السيد القائد مقتدى الصدر أعزه الله ــ حالياً اي طبعا ، قد يكون تاريخيا مو هيج بس حاليا اغلبه سياسي
المحاورــ بالنسبة لإيران شتعتقد
السيد القائد مقتدى الصدر أعزه الله ــ (يكمل) طبعاً هم مو هيج ، هاي الكبار السياسيين مالتهم بس من يجي واحد لابس حزام فقير مالتهم ، هذا مقنعينه بأمور عقائدية واحد اثنين شنو سياسي ، مو أروح أكله تعال أنطيك كرسي وهو راح يتفتت ، إي هذا عقائديين بس كبارهم سياسيين
المحاورــ بس قصدي الدور الايراني بالعراق شتنظرله ، نصرة لشيعة العراق حباً بالعراقيين
السيد القائد مقتدى الصدر أعزه الله ــ فلنتمنى أن يكون نصرة للمظلومين إللي بالعراق ، أتمنى
المحاورــ الامنيات وحد
السيد القائد مقتدى الصدر أعزه الله ــ بعد ، إن شاء الله هاي ، إن شاء الله
المحاورــ أنت تجده دور بناء
السيد القائد مقتدى الصدر أعزه الله ــ كدعم للحرب ضد الارهاب ، كما أكو منهم منّ يكول تعالوا يا امريكان ساعدونا ، كما تعالوا يا سعودية ساعدونا ، ذولاه هم يكولون يا إيران تعالوا ساعدونا ، مو هي هاي شوية النفس الطائفي شوية مع شديد الاسف
المحاورــ بس تعتقد اكو مساعدة خالصة لوجه الله
السيد القائد مقتدى الصدر أعزه الله ــ خلي نكون متفائلين
المحاورــ خل نكون بريئين شوية
السيد القائد مقتدى الصدر أعزه الله ــ إي ، أحسنت ، هاي نكون متفائلين أن المساعدة لا يُطلب منها مقابل
المحاورــ طيب ، ننتقل إلى موضوع الاحزاب الاسلامية بشكل عام ، الاحزاب الدينية ، تعتقد هي فشلت
السيد القائد مقتدى الصدر أعزه الله ــ احزاب اسلامية ماكو
المحاور ــ احزاب دينية
السيد القائد مقتدى الصدر أعزه الله ــ احزاب دينية بيها مجال، اسلامية لا رجاءا
المحاور ــ قصدي الحزب الاسلامي العراقي حزب الدعوة مثلا المثال الصارخ للسنة والشيعة
السيد القائد مقتدى الصدر أعزه الله ــ دائما اكرر ان المسلمين لا يمثلون الاسلام الذي يمثل الاسلام فقط هو المعصوم لا غير فمن يخطأ المسلم مو معناتها الاسلام اخطأ اذا أخطأ المعصوم وهذا لا يحدث إذن اخطأ الاسلام
المحاور ـ يمثل الاسلام بكله
السيد القائد مقتدى الصدر أعزه الله ــ احسنت، ولذلك نقول بالعصمة حتى لا يخطأ حتى يمثل فد شي ( عنوان جبير مو زغير الاسلام ترى )
المحاور ــ انا اتحدث عن هؤلاء اتحدث عن الناس
السيد القائد مقتدى الصدر أعزه الله ــ سميهم دينيين، اسلامية ماكو
المحاور ــ الاحزاب الدينية تعتقد اخذت كفايتها و فشلت بالعراق لو ممكن تستمر بالعراق
السيد القائد مقتدى الصدر أعزه الله ــ اني من اول سنة كلت يا شيعة لا تستلمون الحكم راح يسلموكم الحكم و يفشلوكم ويكولون الشيعة فشلوا محد سمع
المحاور ــ ليش كنت متيقن يفشلون
السيد القائد مقتدى الصدر أعزه الله ــ ما منها هاي هي هيج المعطيات هيج اتكول احتلال وناس مكزكزة على العراق بس تريد تقطع منه من الداخل من الخارج نتيجتها مئة بالمئة هاي ما تقبل خطأ المعطيات هيجي واحد زائد واحد شكد اثنين انتهت واحد زائد واحد يطلع عشرة مستحيل
المحاور ــ وعليهي
السيد القائد مقتدى الصدر أعزه الله ــ وعليهي فشلوا وعليهم بالتنحي فورا
المحاور ــ والبديل
السيد القائد مقتدى الصدر أعزه الله ــ البديل حكومة تكنطراط مستقلة عسى ان تكون حل اتمنى ان تكون حل واني كتلهم اجتمعت وياهم من شكلت حكومة تكنقطراط مو حكومتي والمفرض ممنوع اتدخل بعملهم، المهم النتيجة كتلهم مو تصير انه حزب جاي ايبوك بعدين يصير فرد جاي ايبوك اذا المليار جان يوصل الحزب او تتقاسم ابيناتهم هسه الفرد راح ايحصل مليار ما ستفدنه شي راح يصير البوك بعد اكثر كأشخاص بس عسى ولعله هذا السستم الجديد لينظم نظام جديد واسس ودستور جديد على ان تقوم على حقوق المواطنة والوطن والكذا
المحاور ــ بس كيف تعتقد حكومة من المهنين الناس المخلصين جدا ومهنين ولكن ماكو حائط يسندهم ما عدهم احزاب تسندهم فكيف ينجحون؟
السيد القائد مقتدى الصدر أعزه الله ــ الحكومة اذا احس منها انها وطنية وراعية لشعبها حقا ولم ترعا كرسيها الشعب كله يدعمها المرجعيات كلها تدعمها اني اول واحد ادعمها اصير تحتها مو فوكها
المحاور ــ وهذا ما تدعوا له الان
السيد القائد مقتدى الصدر أعزه الله ــ هذا ما ادعو له
المحاور ــ بالعبادي او بدون العبادي
السيد القائد مقتدى الصدر أعزه الله ــ كل الخيارات مفتوحة اتمنى ان تكون بالعبادي ميريد الله ومحمد وعلي وياه خل يستقيل ويفتح باب الغيرة والله اني لو تفجير الكرادة صاير واني بالحكومة والعياذ بالله جان اسقلت اطلع ابشرف احسن من الخزي
المحاور ــ إسقال وزير الداخلية هذا موقف يشكر عليه
السيد القائد مقتدى الصدر أعزه الله ــ بعد ما صار شي يُقال انه استقال
المحاور ــ بس تحييه اذا قدم استقالته
السيد القائد مقتدى الصدر أعزه الله ــ احييه ميخالف ولو على مضض بس احييه
المحاور ــ المظاهرات اللي صارت هي التحاق بالمدنيين اذا كان هذا ميضرك القول كانوا المدنيين هم البادئين
السيد القائد مقتدى الصدر أعزه الله ــ مو مشكلة ( كلنا شعب عراقي )
المحاور ــ لكن هم تقريبا صوتهم صار ضعيف جدا لما دخل التيار الصدري
السيد القائد مقتدى الصدر أعزه الله ــ انقوي مو مشكلة
المحاور ــ هذا قصدي، قصدي انتم مؤمنين بالقيم المدنية
السيد القائد مقتدى الصدر أعزه الله ــ هُمَ مؤمنين بيها ميخالف ما نعتدي على ايمانهم او هم، هُمَ لا يعتدون على ايمانه
المحاور ــ ميصير تقاطع
السيد القائد مقتدى الصدر أعزه الله ــ لا، ان شاء الله ميصير تقاطع انا كعدت وياهم وحجيت وياهم اكثر من مرة كتلهم يجب ان تجتمع الاسلامية و المدنية
المحاور ــ شلون تجتمع
السيد القائد مقتدى الصدر أعزه الله ــ شلون ما جان المهم نرهمها صعبة هي بالعقول
المحاور ــ المسلم يأمر بالمعروف و ينهى عن المنكر
السيد القائد مقتدى الصدر أعزه الله ــ هُمَ، هم يأمرون بالمعروف و ينهون عن المنكر، هُمَ انسانيتهم طاغية احنه اسلاميتنه طاغية احنه كون نجعل الاسلامية والانسانية في خط واحد حتى تصير صحيح يعني واحد ايبسبس ويصلي ويصوم بس انسانية ما عنده فلسين بس واحد مثلا يعمل الموبقات او اصلا ما يعمل الاحكام الشرعية هم فلسين فكون نجمع بين الاثنين
المحاور ــ بس مرات اتباع التيار الصدري يتبرعون ايروحون يهجمون على مكانات بيها بيع خمر او على نوادي تعتقد هاي من مهمتهم
السيد القائد مقتدى الصدر أعزه الله ــ لا، لا سيما الثوار منهم لا مو مهمتهم اكيدا حكومة اكو قانون اكو ايسدوه، بالقانون ينسد اذا ابغير القانون واكفة، خو اني اكدر ... بس طالبت بالخطبة التي قروها عني انه غلق جميع البارات و مناطق الشرب ان جاز التعبير خو اني اكدر من جوه الجوه واشتغل و فجرها بس اني ما اريد اني اريد قانونيا تنسد هذا من تفجره راح بدل البار الواحد يفتح اثنين راح يفتح عشرة اني اريد اهديه ما اريد اظله
المحاور ــ منو المثال اللي ابالك لدولة ممكن انصير مثلها او تطمح الها كطريقة حكم
السيد القائد مقتدى الصدر أعزه الله ــ هذا السؤال ما جاي ابالي
المحاور ــ يعني على الطريقة الجمهورية الاسلامية مثلا لو على طريقة تركيا
السيد القائد مقتدى الصدر أعزه الله ــ السيد الوالد قدس سره جان يكول ما اريد حكومة اسلامية الا اذا وجد مجتمع اسلامي المجتمع اذا صار اسلامي ورتضى الحكومة الاسلامية ممكن اما من دونها لا، نسعى الى مجتمع اسلامي تثقيف المجتمع اما مجتمع ما يعرف شني الاسلام او تجي اطبق عليه الاسلام انصير مثل امريكا اجت اطبق الديمقراطية على ناس ما يعرفون شني الديمقراطية او صار اللي صار
المحاور ـ هو يؤخذ على الأسلاميين دائماً أيجوز أنت اضوج من هذه العبارة، خل أنكول الدينيين
سماحة السيد القائد مقتدى الصدر أعزه الله ـ لا... أسلاميين ميخالف بس الآسلام.. لا
المحاور ـ يؤخذ على الأسلاميين دائماً أنهم يستخدمون المعايير والطرق الديمقراطية للوصول للسلطة
سماحة السيد القائد مقتدى الصدر أعزه الله ـ أو بعدين أيعوفونها
المحاور ـ لضرب الديمقراطية
سماحة السيد القائد مقتدى الصدر أعزه الله ـ هاي الأسلاميين مو الأسلام
المحاور ـ فهذا الخوف منكم أذا أستحكمت يعني قصدي بكل
سماحة السيد القائد مقتدى الصدر أعزه الله ـ أني ما أريد أستحكم أصلاً لو أريد أستحكم أيجوز أسويها أو ما أسويها ما أدري بس ما أريد أستحكم أصلاً لا يشرفني أن أكون في حكومة أصلاً
المحاور ـ طيب مرحلة ما بعد داعش علامة أستفهام يعني أذا راح داعش هناك حديث يدور
سماحة السيد القائد مقتدى الصدر أعزه الله ـ مئة علامة أستفهام مئة علامة أستفهام مو وحدة
المحاور ـ مستقبل العراق وين راح أيكون أنت أبرأيك أشوفه؟
سماحة السيد القائد مقتدى الصدر أعزه الله ـ أرجو أن لا نخرج من تشدد ونقع في تشدد آخر
المحاور ـ لا أشويه أتوضحنه لازم
سماحة السيد القائد مقتدى الصدر أعزه الله ـ خاف نطلع من تشدد داعش ونقع في تشدد آخرين يكونوا مسلطون على رقابنا بطريقة أخرى وبلباس آخر وأذا داعش نكدر أنصدهم ذولاك أيجوز من أبناء جلدتنه ما نكدر أنصدهم أسأل الله أن يبعد هذا الشر عن العراق
المحاور ـ أو يمكن بهيمنة المنتصرين
سماحة السيد القائد مقتدى الصدر أعزه الله ـ هسه إليعتبرون روحهم منتصرين هو الجيش دا أيقاتل وسيل دماء من الجهتين تنكتل ويروحلك ذاك شايل علم ويسوي روحه هو منتصر هو أصلاً ما منتصر بس راح أيسوي روحه منتصر
المحاور ـ أنت تخشى من هيمنة التنظيمات المسلحة
سماحة السيد القائد مقتدى الصدر أعزه الله ـ المتشددة
المحاور ـ المتشددة
سماحة السيد القائد مقتدى الصدر أعزه الله ـ المعتدلة على راسي
المحاور ـ الوقحة...مو هاي تعبيرك الوقحة ممكن أكو خشية أن هي أسيطر على مقاليد الأمور أو هي اللي أدير الأمور أكو هيج خشية
سماحة السيد القائد مقتدى الصدر أعزه الله ـ أكو هيج توقع وأذا أدير بنفس العقلية راح نطلع من دكتاتور نوكع أبطاغية فرعون العصر
المحاور ـ يعني هم فاتني أسألك موقع التفجير بالكرادة زاره السيد قيس الخزعلي والسيد هادي العامري وطالبوا بأن يستلم الحشد الشعبي الملف الأمني في بغداد ما تعليقك على ذلك
سماحة السيد القائد مقتدى الصدر أعزه الله ـ عيب على الحكومة هيجي أمور كون تخجل الحكومة مو آني أخجل الحكومة ماكوا حتى تلزم المكان حتى هو يلزم المكان أو غيره أو آني
المحاور ـ مو الحكومة موجودة دا أتصير هالتفجيرات
سماحة السيد القائد مقتدى الصدر أعزه الله ـ هو أكلك أذن ما قايمه أبواجبها عيب خل أتروح أتقوم أبواجبها ولّو أني من البداية أول داعش كلت إلهم ألزموا الجنوب ألزموا بغداد ما فاد
المحاور ـ أنت مع أن يستمر الجيش هو لازم بغداد
سماحة السيد القائد مقتدى الصدر أعزه الله ـ طبعاً
المحاور ـ الى وزارة الداخلية
سماحة السيد القائد مقتدى الصدر أعزه الله ـ القوى الأمنية كعموم
المحاور ـ هو الرسمية
سماحة السيد القائد مقتدى الصدر أعزه الله ـ الرسمية أحسنت مو فقط في بغداد في الجنوب وفي الموصل وفي الأنبار
المحاور ـ طيب أنعود الى موضوع الى مستقبل العراق بعد داعش هذا الحديث هناك خشية عن هيمنة المليشيات أو الناس اللي في من ضمن الحشد الشعبي المتشددين ممكن أيهيمنون على مقاليد الأمور في بغداد بعد ما أيزول خطر داعش
سماحة السيد القائد مقتدى الصدر أعزه الله ـ أذا شاء الله
المحاور ـ لكن أسألك عن شكل التعايش بين مكونات العراق بين الشيعة والسنة والكرد بعد داعش الكرد يعني يبدوا حاسمينها بشكل أو بآخر
سماحة السيد القائد مقتدى الصدر أعزه الله ـ أنفصال يعني ما أعتقد
المحاور ـ أكو هناك دعوات
سماحة السيد القائد مقتدى الصدر أعزه الله ـ ما يكدرون يعتمدون على ثرواتهم حتى ينفصلون لو يكدرون ينفصلون بعدهم متعلقين بالأم أن جاز التعبير العاصمة فا ما ينفصلون
المحاور ـ طيب هو زاد الحديث عن الأكراد
سماحة السيد القائد مقتدى الصدر أعزه الله ـ الأكراد غالبيتهم مو كلهم يتعاملون تعامل سياسي أذا أعطوا رضوا وأذا منعوا سخطوا أما الخوف من السنة والشيعة مو الأكراد
المحاور ـ السنة تتوقع راح أيطالبون بأقليم
سماحة السيد القائد مقتدى الصدر أعزه الله ـ ممكن بس بعيدة الآن
المحاور ـ بعيدة هناك دعوات لإستفتاء في مناطق السنة أتأيدها
سماحة السيد القائد مقتدى الصدر أعزه الله ـ أتمنى أنه بس يحفظ التسنن المعتدل فقط
المحاور ـ أنت مع إستفتاء في مناطق السنة لتقرير مصيرهم كأقليم كافدرالية
سماحة السيد القائد مقتدى الصدر أعزه الله ـ هو الدستور يكفل ألهم هذا آني ما أكدر آني ما افضل مع هذه الظروف وجود الأعتدال وجود الخطر الإرهاب كذا يقسم العراق راح أيكون أضعف بس كاحق، حق شكو بيها
المحاور ـ من حقهم
سماحة السيد القائد مقتدى الصدر أعزه الله ـ بس يحتاج الى آليات وتوقيت
المحاور ـ أنت مؤمن بأن العراق باقِ موحد بعد داعش
سماحة السيد القائد مقتدى الصدر أعزه الله ـ يعني كا فدرالية
المحاور ـ باقي كا كيان واحد
سماحة السيد القائد مقتدى الصدر أعزه الله ـ هو الآن مو موحد حتى موحد يبقى موحد كلً يجر النار الى قرصه بس بدون فدرالية
المحاور ـ راح أيزيد السوء بعد داعش
سماحة السيد القائد مقتدى الصدر أعزه الله ـ إذا تسلط المتشددون أي وإذا لم يتسلط لا
المحاور ـ ولهذا أتحاول تقطع الطريق من الآن
سماحة السيد القائد مقتدى الصدر أعزه الله ـ أحاول بقدر الممكن
المحاور ـ سماحة السيد مقتدى الصدر شكراً جزيلاً
سماحة السيد القائد مقتدى الصدر أعزه الله ـ ممنون
المحاور ـ لوقتك وسعة صدرك شكراً جزيلاً
سماحة السيد القائد مقتدى الصدر أعزه الله ـ تعبناكم حياكم الله

اللهم صل على محمد وال محمد وعجل فرجهم والعن عدوهم
اسأل الله لكم التوفيق وشكراً على الجهود المميزه
موفقين جميعاً

بارك الله فيك اخي العزيز