النَصُّ المُنَضَّد للقاء سماحة القائد السيد مقتدى الصدر اعزه الله مع قيادات الخط الصدري بتاريخ 4 / 7 / 2021

أعوذ بالله من الشيطان اللعين الرجيم، توكلت على الله رب العالمين، وصلى الله على خير خلقه محمد وآله أجمعين..

أهلاً وسهلاً بكم ومرحبا، وشكراً لكم على حضوركم، ونأسف لإزعاجكم.

لدي بعض النقاط نناقشها معاً، أرجو أن تكون جلسة ودّية أخوية، فقد طال الفراق بيننا، طال الزمن بين لقائنا، فاليوم نلتقي والأوراق كثيرة، والمشاكل أكثر.

عموماً، أنا أدري شتعانون من المجتمع ومن المصاعب ومن البلاءات، لكن الصبر جميل، وإخلاصكم ومحبتكم أجمل.

لكن هواي فكرت في أي آية أبدي بكلامي، فوقعت عيني على هذه الآية: بسم الله الرحمن الرحيم ((فَرَجَعَ مُوسَىٰ إِلَىٰ قَوْمِهِ غَضْبَانَ أَسِفًا ۚ قَالَ يَا قَوْمِ أَلَمْ يَعِدْكُمْ رَبُّكُمْ وَعْدًا حَسَنًا ۚ أَفَطَالَ عَلَيْكُمُ الْعَهْدُ أَمْ أَرَدتُّمْ أَن يَحِلَّ عَلَيْكُمْ غَضَبٌ مِّن رَّبِّكُمْ فَأَخْلَفْتُم مَّوْعِدِي)).

كأنما المشكلة في التيار الصدري هو الاعتماد مليون بالمية على هذا الشخص - عليه ما عليه - اذا ماكو كل شيء يخرب، اذا موجود (نص ونص)، مو كل شي ينصلح، فمجرد أن نبتعد وما نتلاقه، شيصير؟ المشاكل تزيد، والخلافات تزيد، والبلاءات تزيد.

خل أكول بصورة أخرى هو لقاء ودّي، انا لذلك عبرت عنه، ولكن علينا أن نعلم امور عديدة؛ أنَّ التيار الصدري مكوَّن من جهتين، الجهة الاولى والأهم هو أنتم والقاعدة الشعبية، الجهة الاولى والأهم هو أنتم والقاعدة الشعبية، الجهة الثانية هي القيادة، هو المسؤول، اللي هو - أعوذ بالله من قول أنا - المفروض آني، وكلما ترابطت هاتين الجهتين كان العمل أفضل، والإنتاج أكثر، وكان رضا الله سبحانه وتعالى أكثر، وكلما افترقنا زادت المشاكل وقلَّ رضا الله تعالى علينا أو عنَّا.

فعليه يجب أنْ شوية نرص صفوفنا، شوية نتعلم مما مضى من تجاربنا ، يعني بالأحرى خل أكول بصورة أدق: كبرنا، خل لا ندور بعد مشاكل، خل ندوّر شلون تمشي السفينة.

فهاتين الجهتين المهمتين في التيار كلما تقاربت زاد الإنتاج، وزاد رضا الله سبحانه وتعالى، يرجع الترابط الاولي ما بين هاتين الجهتين؛ الجهة الأولى والجهة الثانية، طبعاً أنا ما اريد اذب العتب كله عليكم، وأنا دائماً أكلكم: لا ادّعي العصمة، ولا أدّعي الكمال، قد يصدر مني أمور خاطئة، وقد يصدر منكم أمور خاطئة، يجب أنْ نضع لها حداً، لأنه احنا هدفنا يجب ان يكون أمام أعيننا، إذا نريد أنْ نوصل إلى الهدف علينا بتذليل هذه الصعاب، اذا ما ذُللت هذه الصعاب خل اروح اكعد ببيتي وروحوا اكعدوا ببيتكم أحسن (كَول لا؟!).

وعليه، اكدر أمثّل التيار الصدري بشجرة، والشجرة لها جذور، ولها ساق، ولها أغصان، ولها أوراق، ولها فروع، أنتم الشجرة كلها من جذورها الى أوراقها، ياهو الأهم بالشجرة بالله؟ الجذور، الساق، الورق؟ اكو واحد يكدر يجاوبني ياهو أهم؟! ماكو واحد يجاوبني! كلها مهمة، قد تشوف الأوراق مثلاً تافهة (آسف يعني) لكنك تصور انه الشجرة بلا أوراق، شنو فائدتها؟ شجرة بلا ثمار، شنو فائدتها؟ شجرة بلا ساق، بلا جذور، كلها، بعضهم يقوّم بعضاً، ماكو قسم أفضل من آخر، الأوراق حالها حال الجذور، والجذور حالها حال السيقان، وحال الفروع وهكذا، فاحنا خل نقتنع بهذا الشيء، أنْه الشجرة كلها واحد، ماكو واحد أفضل من الآخر، لكن هسه تكلي: إذا كنا نحن الشجرة، أنت شنو؟ المفروض، المفروض انه آني الفلّاح، اللي أسقي الشجرة، اللي اقلّم الشجرة، اللي اشذّب الشجرة، اللي اطيها دواء للشجرة، مو هيجي؟ فعليه إذا الفلاح كعد وسكت شيصير بالشجرة؟ تذبل! وإذا الشجرة ما رادت الفلّاح وما صارت تتجاوب وياهه، شيصير؟ هم تذبل الشجرة، والفلّاح يروح ويسكت ويصير عاطل وما عنده شغل .

أمثّل لكم مثالاً آخر للتيار الصدري، اعتبروه التيار الصدري فريق كرة قدم، فريق كرة القدم منين يتكون؟ دفاع، هجوم، حارس مرمى، خط وسط، كذا، رأس حربة، مو هيجي؟ ياهو اللي يجاوبني من السادة والمشايخ والأفاضل، انه ياهو احسن بالله؟ حارس المرمى، الدفاع، الهجوم؟ كلهن نفس الشي، كلٌ يقوم بدروه، وتصوَّر انه فريق ما بي دفاع، شيصير؟ مو هيجي ؟! فريق ما بي هجوم، شيصير بي؟ ما يسجل ولا كول، ما ينتج، فريق ما بي حارس مرمى، شيصير بي؟ يصير هتيكة، بعد هايهية، زين آني وين بالموضوع، إذا التيار الصدري هو الفريق؟ المفروض آني المدرًّب (كَول لا؟!) فعليه إذا المدرًّب ما درّب زين، شيصير؟ يصير فريق عادي، وهكذا.

اما شجرة تمثلون روحكم والشجرة كلها واحد، واما فريق كرة قدم، او فريق أي لعبة اخرى، كل الفريق مستوى واحد، واللي يكول غير هذا منكم ، او مني ، او من القاعدة الشعبية، او من خارج التيار، فهو اما مرجف، واما مشكك، واما ان لا يثق بالقائد، او انه ترك محمد الصدر اصلا، اكول هاي وسمعوها ترى اني كل كلمة داحجيها عن علم وعمد، احنا كلنا واحد كلنا شجرة وحدة او فريق واحد، زين اذا كلنا فريق واحد اللي يقصر بعمله شنو؟ تطرده من الفريق؟ مو شرط، قد تكعده وين؟ بالاحتياط، يعني استغنيت عنه؟ يعني الطايح رايح؟ مو شرط، قد يكون يدربله يوم يومين، لعله المدرب قاصر، لعله تعاون الاخوة وياه بالدفاع والهجوم كان مو على كد المستوى، قصّر بعمله، احنا هم مو نصير مثل هذا، اكو .. ذاك اليوم تقرير رياضي قديم، اكو واحد لاعب اسمه اسكوبار، اسووله هذا؟ كولومبيا كاس العالم اول مرة صعدت، شصار؟ اللعبة الاولى عبالهم يصعدون للدور الثاني ما صعدوا، سجل على نفسه كول، واضح؟ دخل طوبة بالخطأ بهدفه، ماشي، طبعا همه يقال انه جانوا الفريق في ضغوط في خوف من شعبهم، شعبهم شوية مشاغب.

اذن ما عليكم ضغوط كفريق، داحجي كلها، كون تفتهمون شداحجي.

زين، هذا اسكوبار سجّل على روحه شنو؟ كول، خايفين همه من شعبهم وهذا سجّل على روحه كول، كبل واحد.. سيد ابراهيم من اتسجل على روحك كول شيصير بيك؟ أي وهكذا، سجّل على روحه كول، كال اني راح ارجع لبلدي، راح رجع لبلده طبله مطعم اجوه ثلاثة رموه صلوه ومات.

هاي الضغوطات كلها انلغت، فأنت جاي تشتغل بإرادتك بقلبك بعقلك بقناعتك بثقتك، ماكو واحد جاي يضغط عليك، تريد ما تشتغل الله ومحمد وعلي وياك، روح اكعد ببيتك، روح اشتغل غير مكان، بس ان تشتغل اهناه وتزعزع الوضع مو صالح، خيانة لله ولرسوله ولأهل البيت ولمحمد الصدر، هسه خيانة اليَّ هم خل تولي، بس محمد الصدر مو مال نخونه، هوايَّ قدم إلنا اشياء اخرها دمه، اخرها اولاده، ونجي نخونه شويه صعبة، من حيث لا نعلم يجوز، ما ادري، ويجوز آني يجوز مو انتم، يجوز القاعدة الشعبية، احݘي عموما اجمالا، فخل نترابط خل نتحد حتى نتقدم، والا ما نتقدم انملة واحدة، فانتم فريق واحد، اكرر انتم فريق واحد انتم شجرة واحدة، كلكم سواسية، لا افضلية لأحدٍ بما فيهم مقتدى عليكم وبينكم، وكل من يقول خلاف ذلك فهو كاذب، فهو مرجف، بعد اكول شي آخر؟ واللي يكول هذا الشيء كولولي حتى أعرفه مرجف، حتى اكله في أمان الله، واضح؟ اللي يحݘي بهذا الموضوع انه فلان احسن مني انا احسن من فلان كلولي، امانة بيناتنا محمد الصدر الما يكلي إلي هم خائن.

لكن يبقى الفريق بي أفضلية من اي ناحية ؟ ان اكرمكم عند الله اتقاكم، طبعا هاي تمشي بامور الدين بامور الاخلاق، بالفريق تمشي هاي؟ لا، افضلكم من؟ اكثركم عملا اكثركم انتاجا احسنكم لعبا (كفريق)، اكثركم يسجّل اهداف، احسنكم يدافع، احسنكم يُنظّر لاهدافه لقائده لمسؤوليه لمرجعه.

فعليه، احسن اللاعبين مَن؟ احسن الاداريين مَن؟ احسن القاعدة الشعبية مَن؟ هو افضلهم عملا، اكملهم عملا، اكثرهم عملا، لا افضلية لاحد، اما بالتقوى واما بالعمل، العمل الصالح طبعاً مو الطالح.

هدفنا مو مالي، اللي جمعنا محمد الصدر، اللي جمعنا العقيدة، واللي جمعنا الايمان، اللي جمعنا الاسلام، اللي جمعنا المرجعية الناطقة، اللي جمعنا خدمة الناس، رضا الله، اذا صار هدفنا المال خل نكعد ببيتنا ونسكت، فهي خيانة لمحمد الصدر، كول لا، كلت لا؟! محد، فدير بالكم، أمور دقيقة كلها بحسابات محسوبة اخرويا ودنيويا، لا هدفنا المال ولا هدفنا الدنيا، ولا هدفنا ما يشابه ذلك، هدفنا هو رضا الله سبحانه وتعالى والسير على نهج محمد الصدر. ما يخص الوباء ما يخص كرونا، الوباء له أحكامه الشرعية الخاصة به، وكلكم متفقهين وتعرفون، من واحد مريض ويمرّض واحد آخر شيصير؟ إذا قتله عليه دية، كول لا، إذا عداه وما مات عليه كذا مستحقات مالية وكذائية، يعني مو حاله حال الأمراض الأخرى، له أحكامه الشرعية الخاصة به، وهذا مو أمرنا، الأمر المهم، شيكول السيد الوالد (قدس الله سره) مادام البلاء، هسه آني يجوز ما حافظه بالضبط، مادام البلاء موجود فيعني غضب الله موجود، يعني كرونا بعدها، يعني شنو؟ يعني غضب الله لازال علينا، إذا غضب الله مازال موجودٌ فينا يعني شنو؟ يعني لو قاصرين لو مقصرين، وعليه كيف نرفع هذا البلاء، كيف نرفع هذا التقصير والقصور؟ بأحد أمرين، الأمر الأول: هو الدعاء والتضرع والرجوع الى الله سبحانه وتعالى، هذا الحل الأخروي، أكو حل ثاني، مسبب الأسباب منو هو؟ فإذا اجه لقاح وأنت تستشكل منه لأنه سبّبه الله، على كولة ذاك أنه صنع الذين يصنعون هذا الشيء، خلقهم لكي يأتون بهذه الأسباب، فأما السبب الدنيوي وأما السبب الأخروي، ما شاء الله أحنا كلنا لا السبب الدنيوي ولا السبب الأخروي مستعمليه، لا نرفع ولا نتضرع ولا نرفع أيدينا للدعاء ليرفع عنا البلاء، ولا جاي نستعمل اللقاحات والأدوية الضرورية والوقاية الصحية، تركنا هذا وتركنا ذاك فشراح يصير؟ راح يتفاقم أكثر البلاء، وأنا أنذركم بتفاقم البلاء، مو اتكولون ما كال مقتدى، فعليه يجب الالتزام بالوقاية الصحية وبما يلزم بعدم الإضرار بالآخرين، وأنتم بعد كلكم متفقهين وطلبة وفضلاء وتعرفون شنو النتائج، زين، فعليه يجب التمسك أما بالأسباب الأخروية والسماوية وأما بالأسباب الطبيعية، واللي ما يتمسك بالأسباب الطبيعية من الآن فصاعداً بعد لا يحضر أي إجتماع ولا يدخل أي مؤسسة من مؤسسات التيار إلا لضرورة، هذا أكو استثناءات طبية، ما أعرف إلها آني.

أي شيء تريدون بخصوص إنجاح البنيان المرصوص أنا جاهز لإنجاحه، وأكرر إنه البنيان المرصوص كتبته قبل أكثر من ثلاثة سنوات، لا له دخل بالانتخابات ولا له دخل بالعمل السياسي، وأي واحد يقول خلاف ذلك فهو كاذب، وإلا كبل، كبل 15، 20 سنة، إذا مقتدى الصدر لقّح أكو واحد يخاف من التلقيح؟! أو إذا وقّع على البنيان المرصوص وسجّل أكو واحد يظل ما مسجل وراه؟! شوفوا شلون أكو اختلاف ما قبل وما بعد، فإذا ما تتنظم هذه الأمور إقروا الفاتحة عليَّ وعليكم وعلى القواعد الشعبية، بس الظاهر أكو فد شي ينشّط التيار الصدري، منو يعرفه منكم؟ محد يعرفه، وهو موتي أو قتلي، شوية يلله يتنشط، وذاك الوكت ها بعد مقتدى مات، ويصير شهيد جديد، دم جديد لإحياء ما اندثر، ان شاء الله قريباً، أبشرّكم أيضاً بقرب موتي أو قرب إستشهادي إذا الله وفقني، وجزاكم الله خير جزاء المحسنين، وأهلاً وسهلاً ومرحباً بكم وآسف على التقصير معكم، وأكرر يجب أن يكون هذا أول لقاء وليس آخر لقاء، ممنون.

احسنتم النشر